ភ្លើងឆេះព្រៃនៅជើងភ្នំបាណង់ប្រមាណ ៣ ហិកតា

ព្រៃជើងភ្នំប្រមាណ ៣ ហិកតា ត្រូវបានអណ្ដាតភ្លើងឆាប់ឆេះ ដែលអគ្គិភ័យនេះត្រូវបានកម្លាំងសមត្ថកិច្ចរួម និងប្រជាពលរដ្ឋសហការគ្នាជួយពន្លត់បានទាន់ពេលវេលា។

ហេតុការនេះបានកើតឡើងកាលពីថ្ងៃទី ០១ ខែ មេសា ឆ្នាំ២០២៤ វេលាម៉ោង ១២៖៤៥ នាទី ថ្ងៃត្រង់នៅត្រង់ចំ​ណុចជើងភ្នំបាណង់ ភូមិដង្គត់ ឃុំស្តៅ ស្រុករតនមណ្ឌល ខេត្តបាត់ដំបង។

តាមការលើកឡើងពីសមត្ថកិច្ចមូលដ្ឋានបានបញ្ជាក់ថា នៅមុនពេលកើតហេតុគេឃើញមានផ្សែងចាប់ផ្ដើមហុយឡើងពីចំណុចជើងភ្នំបាណង់ ហើយមួយសន្ទុះក្រោយមកដោយសារពុំមានអ្នកចាប់អារម្មណ៍ក៏ស្រាប់តែឃើញអណ្ដាតភ្លើងចាប់ផ្ដើមឆាបឆេះទៅលើព្រៃនៃជើងភ្នំនោះយ៉ាងសន្ធោសន្ធៅតែម្ដង ធ្វើឲ្យកម្លាំងសមត្ថកិច្ចនៃអធិការដ្ឋាននគរបាលស្រុកប្រញាប់ប្រញាល់ចេញប្រតិបត្តិការ ដោយប្រើប្រាស់រថយន្តទឹកសម្រាប់ពន្លត់អគ្គិភ័យរួមនិងកម្លាំងមួយចំនួន បានចេញ ទៅដល់គោលដៅដែលនៅពេលនោះដែរបណ្ដាតភ្លើងបានឆេះរាលដាលទៅលើដីព្រៃក្នុងទំហំដីប្រមាណ ៣ ហិក​តា។

ដោយសារការព្យាយាម និងការខិតខំប្រឹងប្រែងទីបំផុតភ្លើងត្រូវបានរលត់ទាំងស្រុង ដែលករណីនេះពុំមានឆេះរាលដាលដល់ដីចម្ការ និងលំនៅឋានរបស់ប្រជាពលរដ្ឋឡើយ ដោយសារតែការពន្លត់បានទាន់ពេលវេលា៕

អត្ថបទ៖ សោ និយមរ័ត្ន