នគរបាលស្រុកត្រាំកក់បន្តឃាត់ខ្លួនក្រុមក្មេងទំនើងប្រដេញវាយគ្នានៅផ្សារអង្គតាសោមបាន​៣នាក់បន្ថែម

កម្លាំងនគរបាលនៃអធិការដ្ឋាននគរបាលស្រុកត្រាំកក់ ខេត្តតាកែវ បានស្រាវជ្រាវ និងឃាត់ខ្លួនក្រុមក្មេងទំនើងបាន៣នាក់បន្ថែមទៀត ពាក់ព័ន្ធករណីជិះម៉ូតូប្រដេញវាយគ្នានៅជិតផ្សារអង្គតាសោមកាលពីថ្ងៃទី២៨ ខែឧសភាកន្លងទៅ។

ការឃាត់ខ្លួនក្រុមក្មេងទំនើងដែលបង្កការអុកឡុកធ្វើឲ្យមានការភ័យក្លាចដល់ពលរដ្ឋនេះ បានធ្វើឡើងជាបន្តបន្ទាប់កាលពីថ្ងៃទី៤ និងថ្ងៃទី៥ ខែមិថុនា ឆ្នាំ២០២៤ ដោយឃាត់បានជនសង្ស័យឈ្មោះ អឿន​ ប៊ីប៊ី​ ភេទប្រុស​ អាយុ​១៧ឆ្នាំ​ រស់នៅភូមិព្រៃឈើទាលក្រោម ឃុំអង្គតាសោម ស្រុកត្រាំកក់ ខេត្តតាកែវ។ ឈ្មោះ​ គុណ​ សាហ៊ុយ​ ភេទប្រុស​ អាយុ​១៦ឆ្នាំ​ រស់នៅភូមិពោធិព្រះសង្ឃ​ ឃុំតាភេម​ ស្រុកត្រាំកក់ ខេត្តតាកែវ។ និងឈ្មោះ​ ណន​ ឌីណា​ ភេទប្រុស​ អាយុ​១៧ឆ្នាំ​ រស់នៅភូមិតាភេម​ ឃុំតាភេម​ ស្រុកត្រាំកក់​ ខេត្តតាកែវ។

គួររំលឹកដែរថា កាលពីថ្ងៃទី២៩ ខែឧសភា ឆ្នាំ២០២៤ កម្លាំងនគរបាលជំនាញនៃអធិការដ្ឋាននគរបាលស្រុកត្រាំកក់ និងកម្លាំងអាវុធខេត្តតាកែវ ក៏បានឃាត់ខ្លួនក្រុមបក្ខពួកក្មេងទំនើងទាំងនេះបានចំនួន២នាក់រួចហើយដែរដើម្បីអនុវត្តច្បាប់។

ក្រុមជនសង្ស័យបានជិះម៉ូតូប្រដេញវាយគ្នា​ប្រដាប់ដោយកាំបិត ពូថៅ យ៉ាងអនាធិបតេយ្យ នៅចំណុចខាងមុខផ្សារអង្គតាសោម លើបណ្ដោយផ្លូវជាតិលេខ៣ ស្ថិតនៅភូមិអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ កាលពីថ្ងៃទី២៨ ខែឧសភា ឆ្នាំ២០២៤៕

អត្ថបទ៖ សុខុម