សន្តិសុខសង្គម

ខឹងសុំចែកផ្លូវគ្នា បុរសជនជាតិចិនម្នាក់ យកកាំបិតចាក់ឪពុកសង្សាររងរបួស

បានផុស

១ year មុន

នៅ

ថ្ងៃព្រហស្បតិ៍ ១៣ មីនា ២០២៥

ដោយ

បុរសជនជាតិចិនម្នាក់ ព្រោះតែខឹងសង្សារដែលជាជនជាតិខ្មែរសុំចែកផ្លូវគ្នា បានស្ទុះយកកាំបិតចុងស្រួចមកគំរាម ហើយក៏ប្រតាយប្រតប់គ្នាចាក់ចំជើងឪពុកនារីជាសង្សារ បណ្ដាលឲ្យរបួស រួចគេចខ្លួនបាត់ស្រមោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ៩ និង ២៥ នាទី យប់ថ្ងៃទី ១២ ខែមីនា ឆ្នាំ ២០២៥ ស្ថិតក្នុងភូមិព្រៃកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។

តាមប្រភពព័ត៌មានបញ្ជាក់ពីនារីខ្មែរដែលត្រូវជាសង្សាររបស់បុរសជនជាតិចិន បានឲ្យដឹងថា ពួកគាត់មានទំនាក់ទំនងស្រលាញ់គ្នាជិត ១ ឆ្នាំ មកហើយ តែទើបរួមរស់នៅជាមួយគ្នាបាន ៤ ខែ ប៉ុណ្ណោះ។ ក្នុងនោះ ដោយខាងបុរសជនជាតិចិនបានផ្ដល់ដើមរកស៊ីចំនួន ៤ ០០០ ដុល្លារ ដើម្បីយកមកលក់កាហ្វេ និងលក់អីវ៉ាន់អនឡាញ។

ប្រភពដដែលបានបន្តថា លុះ ២ ខែចុងក្រោយ ពួកគេទាំង ២ នាក់ ចេះតែឈ្លោះប្រកែកគ្នាញឹកញាប់ ទើបទ្រាំមិនបានក៏សុំចែកផ្លូវជាមួយបុរសជនជាតិចិនរូបនេះតែម្ដង។ លុះវេលាម៉ោងកើតហេតុខាងលើ ជនសង្ស័យបានជិះផាសស្អាប់មកផ្ទះនារីជាសង្សារ ដើម្បីទារលុយដែលបានផ្តល់ឲ្យរកស៊ី តែនារីរងគ្រោះបាននិយាយថា បើចង់បានលុយត្រូវទៅប៉ុស្តិ៍ប៉ូលិសទាំងអស់គ្នា។ បន្ទាប់ពីអ្នកទាំង ២ បានឈ្លោះប្រកែកប្រតាយប្រតប់គ្នា ឃើញដូចនេះ ឪពុកម្តាយនារីជនជាតិខ្មែរ ក៏ចូលទៅជួយឃាត់ ហើយបុរសជនជាតិចិនខឹង ក៏រត់ចូលទៅក្នុងផ្ទះខាងស្រីយកកាំបិតចុងស្រួចមកគំរាម និងបានចាក់ចំជើងឪពុកនារីជនជាតិខ្មែរ ២ កាំបិត ហូរឈាម។ បន្ទាប់មក ពលរដ្ឋជិតខាងឃើញ ក៏នាំគ្នាទៅជួយអន្តរាគមន៍ឃាត់ខ្លួនបុរសជនជាតិចិន តែឃាត់មិនបាន ជនបង្កបានរត់គេចខ្លួនទៅបាត់ស្រមោលពីកន្លែងកើតហេតុ។ លុះក្រោយមកទើបកម្លាំងសមត្ថកិច្ចមូលដ្ឋានចុះមកដល់តាមរកជនបង្កគ្រប់ច្រកល្ហកនៅតែរកមិនឃើញ ក៏ខាងគ្រួសាររងគ្រោះទៅដាក់ពាក្យបណ្ដឹងនៅប៉ុស្តិ៍។

ក្រោយពេលកើតហេតុក្រុមគ្រួសាររងគ្រោះបាននាំគ្នាទៅដាក់ពាក្យបណ្ដឹងនៅប៉ុស្តិ៍រដ្ឋបាលសង្កាត់ភ្លើងឆេះរទេះ ដើម្បីឲ្យសមត្ថកិច្ចជួយអន្តរាគមន៍ស្រាវជ្រាវឃាត់ខ្លួនបុរសជនជាតិចិនខាងលើមកផ្ដន្ទាទោសតាមផ្លូវច្បាប់៕

អត្ថបទ ៖ សំណាង