Update៖ ករណីផ្ទុះឆេះទូកុងតឺន័រក្នុងផែស្ងួត​ ហុង​ ឡេងហួរ ឆេះរថយន្ត៥គ្រឿង

ករណីផ្ទុះឆេះទូកុងតឺន័រក្នុងផែស្ងួត ហុង ឡេងហួរ ក្នុងភូមិកន្ទោកជេីង​ សង្កាត់កន្ទោក​ ខណ្ឌកំបូល បានបណ្ដាលឲ្យឆេះខូចខាតរថយន្ដនៅក្នុងទូកុងតឺន័រចំនួន៥គ្រឿង តែក្នុងករណីនេះមិនមានអ្នករងរបួសនោះទេ។ តាមព័ត៌មាន រថយន្ដដែលត្រូវអណ្ដាលភ្លើងឆេះ ជាប្រភេទរថយន្ដព្រូស មួយទូកុងតឺន័រមានរថយន្ដសរុប៥គ្រឿងត្រូវឆេះអស់ទាំងស្រុង។

តាមប្រភពព័ត៌មានបានឲ្យដឹងថា​ មុនពេលកេីតហេតុគេបានលឺសំឡេងផ្ទុះលាន់ដូចរន្ទះ​ ដោយសំបកទូកុងតឺន័រហោះចេញពីផែធ្លាក់ចម្ងាយប្រហែលជាង១០០ម៉ែត្រ​។ ភ្លាមនោះក៏កេីតជាអគ្គិភ័យឆាបឆេះយ៉ាងសន្ធោសន្ធៅតេម្ដង។ ក្រោយទទួលព័ត៌មានភ្លាម ក្រុមរថយន្តពន្លត់អគ្គិភ័យគ្រប់ស្ថាប័នពាក់ព័ន្ធបានចុះទៅអន្តរាគមន៍ដល់កន្លែងកើតហេតុ និងគ្រប់គ្រងបានទាំងស្រុង តែទោះបីយ៉ាងណាគេនៅមិនទាន់ដឹងពីមូលហេតុនៃការផ្ទុះឆេះនេះនៅឡើយទេ។

សូមជម្រាបថា ករណីផ្ទុះឆេះទូកុងតឺន័រនៅក្នុងផែស្ងួត ហុង ឡេងហុង នេះ បានបង្កការភ្ញាក់ផ្អេីលកាលពីវេលាម៉ោង៣និង៤០នាទីរសៀល​ ថ្ងៃទី២៦​ ខែមិថុនា​ ឆ្នាំ២០២៥​ នៅក្នុងផែស្ងួត​ ហុង​ ឡេងហួរ​​ នៅចំណុចផែស្ងួត​ ហុង​ ឡេងហួរ​ ភូមិកន្ទោកជេីង​ សង្កាត់កន្ទោក​ ខណ្ឌកំបូល រាជធានីភ្នំពេញ៕

អត្ថបទ៖ សុខា