សន្តិសុខសង្គម

ឃាត់ខ្លួនអ្នកបើករថយន្តឈ្នួល និងអ្នកលក់សម្ភារៈជំនឿ ករណីបង្កហិង្សាដាក់គ្នា

បានផុស

២ សប្តាហ៍ មុន

នៅ

ថ្ងៃចន្ទ ៧ កក្កដា ២០២៥

ដោយ

បុរសអ្នកបើករថយន្តឈ្នួលម្នាក់ ត្រូវអ្នកលក់សម្ភារៈជំនឿ ព្រួតវាយ ក្រោយបើករថយន្តថយបុកតុលក់ខ្នាយតាន់ ក្នុងនោះ សមត្ថកិច្ចឃាត់ខ្លួនសរុប ៥ នាក់ កាលពីវេលាម៉ោង ១២ និង ១៥ នាទីថ្ងៃត្រង់ ថ្ងៃទី ៧ ខែកក្កដា ឆ្នាំ ២០២៥ ស្ថិតនៅតាមបណ្ដោយផ្លូវមហាវិថីសហព័ន្ធរុស្សី ត្រង់ចំណុចស្តុបយូអេង ភូមិក្បាលដំរី ២ សង្កាត់កាកាបទី ២ ខណ្ឌពោធិ៍សែនជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកលក់សម្ភារៈជំនឿ ឈ្មោះ បង វែង ភេទប្រុស អាយុជាង ៣០ ឆ្នាំ មានទីលំនៅភូមិប៉ប្រកខាងត្បូង សង្កាត់កាកាបទី ១ ខណ្ឌពោធិ៍សែនជ័យ។ បុរសនេះ រួមជាមួយប្រពន្ធ កូនម្នាក់ និងបងប្អូនម្នាក់ សរុប ៤ នាក់ ត្រូវនគរបាលឃាត់ខ្លួន។ ចំណែកអ្នកបើកបររថយន្តឈ្នួលឈ្មោះ សួន សាក់ ភេទប្រុស អាយុ ៣៨ ឆ្នាំ មានទីលំនៅភូមិអូរដឹម សង្កាត់ចោមចៅទី ៣ ខណ្ឌពោធិ៍សែនជ័យ ក៏ត្រូវនគរបាលឃាត់ខ្លួនដែរ។

តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ អ្នកលក់សម្ភារៈជំនឿ បានយកសម្ភារៈមួយចំនួនមានដូចជា ខ្នាយតាន់ បន្តោងខ្សែកព្រះ ខ្សែដៃអង្កាំជាដើម ទៅដាក់លក់តាមចិញ្ចើមផ្លូវត្រង់ចំណុចខាងលើ ដោយដាក់នៅលើកូនតុតូចមួយ។ លុះដល់ពេលកើតហេតុ ស្រាប់តែបុរសអ្នកបើករថយន្តឈ្នួល បានបើករថយន្ត ១ គ្រឿង ម៉ាកឡិចស៊ិស RX-300 ពណ៌ស្ករ ពាក់ស្លាកលេខ ភ្នំពេញ 2AL-3615 ថយក្រោយកិនសម្ភារៈទាំងនោះ ហើយអ្នកលក់សម្ភារៈជំនឿបានប្រាប់ថា ថយកិនរបស់គាត់ហើយ។

ប្រភពដដែលបានឲ្យដឹងបន្តទៀតថា ពេលនោះ អ្នកបើករថយន្តឈ្នួលបានឆ្លើយថា «តើតុរបស់អ្ហែងហ្នឹងថ្លៃប៉ុន្មាន?» រួចក៏ដើរចូលក្នុងរថយន្តប្រុងបើកចេញទាំងមិនទទួលខុសត្រូវ ហើយអ្នកលក់សម្ភារៈជំនឿ បានរត់ទៅឃាត់ និងដកយកសោរថយន្ត ទើបបណ្ដាលឲ្យមានទំនាស់គ្នា ហើយអ្នកបើករថយន្តឈ្នួលបានវាយ ៣ ដៃ។ បន្ទាប់មក អ្នកលក់សម្ភារៈជំនឿ ក៏បានខលហៅប្រពន្ធ និងកូនប្រុស ព្រមទាំងបងប្អូន ឲ្យទៅជួយព្រួតវាយលើអ្នកបើករថយន្តឈ្នួលនោះវិញយ៉ាងចាស់ដៃ។

ប្រភពខាងលើបានបន្ថែមថា បន្ទាប់មកក៏ត្រូវបានកម្លាំងនគរបាលប៉ុស្តិ៍កាកាបទី ២ ចុះទៅឃាត់ខ្លួនទាំងសងខាងតែម្ដង ដោយឃាត់អ្នកលក់សម្ភារៈជំនឿ ប្រពន្ធរបស់គាត់ រួមជាមួយកូនប្រុសម្នាក់ និងបងប្អូនម្នាក់ សរុប ៤ នាក់។ រីឯបុរសអ្នករត់រថយន្តឈ្នួលទ្រមខ្លួន និងត្រូវនគរបាលឃាត់ខ្លួនដែរ រួចនគរបាលបាននាំទៅកាន់ប៉ុស្តិ៍កាកាបទី ២ ដើម្បីដោះស្រាយគ្នា ប៉ុន្តែមិនទាន់ដឹងថា ត្រូវគ្នាបែបណាឡើយ៕

អត្ថបទ ៖ សុខា