កីឡា

ខ្សែបម្រើជប៉ុន Hikaru Mizuno បន្តប្រកបអាជីពនៅលីគកំពូលកម្ពុជា ក្នុងឆ្នាំទី៦

បានផុស

៦ years មុន

នៅ

ថ្ងៃអង្គារ ៨ ធ្នូ ២០២០

ដោយ

កីឡាករជនជាតិជប៉ុន Hikaru Mizuno លេងក្នុងខ្សែបម្រើ បានសម្រេចបន្តអាជីពក្នុងឆ្នាំ៦ របស់ខ្លួននៅលីគកំពូលកម្ពុជា ដោយបន្ថែមកិច្ចសន្យា១ឆ្នាំទៀតជាមួយក្លិបជើងឯក ៤សម័យកាលបឹងកេតអែហ្វស៊ី ក្នុងនាមជាកីឡាករបរទេសកូតាកៅអីកីឡាករអាស៊ី ខណៈរូបគេបានមកដល់កម្ពុជាដំបូងកាលពីឆ្នាំ២០១៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅដើមសប្ដាហ៍នេះក្រុមបឹងកេត បានប្រកាសពីបេក្ខភាពកីឡាករបរទេសទី១របស់ខ្លួន គឺកីឡាករ Hikaru Mizuno ដែលក្លិបសម្រេចចុះបញ្ជីត្រៀមប្រកួតរដូវកាលឆ្នាំ២០២១ ខាងមុខក៏ដូចជាប្រកួតក្នុងវគ្គចែកពូលពានរង្វាន់លំដាប់ទី២ប្រចាំទ្វីបអាស៊ី AFC Cup 2021 ក្នុងនាមជាក្រុមជើងឯកលីគកំពូលកម្ពុជាឆ្នាំ២០២០។ លីគកំពូលកម្ពុជា កំណត់ឲ្យក្រុមជាសមាជិកអាចចុះបញ្ជីកីឡាករបរទេសបាន៥នាក់ តែក្នុងនោះមាន១នាក់ជាសមាជិកប្រជាជាតិក្នុងទ្វីបអាស៊ី។

កីឡាករជប៉ុនរូបនេះ ត្រូវបានវិបសាយផ្លូវការរបស់ក្លិបស្រង់សម្តីថា «គោលដៅបន្តទៀតរបស់ខ្ញុំនៅឆ្នាំ ២០២១ គឺនៅតែជាជើងឯក តែងអ្វីដែលពិសេសនោះ គឺខ្ញុំនឹងព្យាយាមឈ្នះការប្រកួតក្នុងពានរង្វាន់ AFC CUP ព្រោះខ្ញុំបានលេង ២ដងហើយ (ឆ្នាំ ២០១៧ និង ២០១៨) ប៉ុន្តែមិនទទួលបានលទ្ធផលល្អសម្រាប់យើង អញ្ចឹងយើងនឹងព្យាយាមឱ្យបានលទ្ធផលល្អជាងនោះ»។

នៅក្នុងរដូវកាល ២០២០នេះ Mizuno Hikaru បានបង្ហាញខ្លួនក្នុងជម្រើស១១នាក់ដំបូង ចំនួន ១៤ប្រកួត ក្នុងចំណោម១៦ប្រកួត ឱ្យក្លិបបឹងកេត ហើយរកគ្រាប់បាល់បាន ១គ្រាប់ និង បញ្ជូនបាល់ទាត់មិត្តរួមក្រុមទាត់ចូលទីចំនួន ១លើក។ «ខ្ញុំពិតជារីករាយ ដែលពួកយើងបានក្លាយជាជើងឯកឆ្នាំ ២០២០នេះ ហើយពិសេសគឺ យើងមិនបរាជ័យ ខ្ញុំពិតជាមានមោទកភាពជាមួយលទ្ធផលនេះ។ ពួកយើងធ្វើការជាក្រុមបានល្អជាងឆ្នាំមុន ហើយទំនាក់ទំនង គឺល្អចំពោះគ្រប់គ្នា មិនថានៅក្នុងទីលាន និងក្រៅទីលាន»។ កីឡាករវ័យ២៩ឆ្នាំរូបនេះបន្ថែម។

កីឡាករមានស្រុកកំណើតនៅ Chiba ប្រទេសជប៉ុនរូបនេះជាយុវជនថ្នាលនៅក្រុម Meiji University ហើយនៅឆ្នាំ២០១៤ រូបគេបានចូលរួមក្រុមសមាជិកលីគទី៣ប្រទេសជប៉ុន FC Ryukyu ហើយនៅឆ្នាំ២០១៥ បានបន្តទៅចូលរួមក្រុមAlbirex Niigata Singapore នៅឆ្នាំ២០១៥ ហើយនៅឆ្នាំ២០១៦រូបគេបានធ្វើដំណើរមកកាន់ប្រទេសកម្ពុជាជាលើកដំបូងដោយចូលរួមជាមួយក្រុមព្រះខ័នរាជស្វាយរៀង ហើយនៅឆ្នាំ២០១៧ រូបគេបានផ្លាស់ទៅក្រុមបឹងកេត វិញម្តង។ ក្រោយពេលមកដល់បឹងកេត កីឡាករ Mizuno បានជួយក្រុមលើកពានលីគកំពូលចំនួន២លើកមកហើយគឺនៅឆ្នាំ២០១៧ និង២០២០៕
ដោយ ៖ ម៉េង ហួរ