កីឡា

លោក Honda ហៅកីឡាករ ៣ រូប ដែលមិនបានជាប់ឈ្មោះស៊ីហ្គេម ដើម្បីផ្ដល់ការណែនាំ

បានផុស

៤ years មុន

នៅ

ថ្ងៃសុក្រ ២៩ មេសា ២០២២

ដោយ

អ្នកចាត់ការក្រុមជម្រើសជាតិកម្ពុជា លោក Keisuke Honda បានកោះហៅកីឡាករយុវជនកម្ពុជា ៣រូប ដែលមិនបានជាប់ឈ្មោះចេញទៅប្រកួតស៊ីហ្គេម នៅប្រទេសវៀតណាម ជាការផ្ដល់សេចក្ដីណែនាំ និងលើកទឹកចិត្ត ដើម្បីអាចមានឱកាសជាប់លើកក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករទាំង ៣ នាក់ ដែលត្រូវបាន លោក Keisuke Honda ហៅជួបនោះរួមមានកីឡាករ ឡេង ណូរ៉ា, វុធ តុលា និង រដ្ឋ វីរៈ ដែលសុទ្ធសឹងជាកីឡាកររបស់ក្លិបវិសាខា ខណៈពួកគេទាំង ៣ ធ្លាប់ជាប់ជម្រើសជាតិកម្ពុជា ទាំងឈុត U-23 និងឈុតធំរៀងៗខ្លួន។

ប្រាប់មកកាន់ ‘កម្ពុជាថ្មី’ វុធ តុលា បានឱ្យដឹងថា៖ «គាត់បានហៅខ្ញុំទៅជួបដើម្បីសួរមូលហេតុអីបានអត់សូវបានលេង ហើយពេលបានដឹងពីមូលហេតុហើយ គាត់បានឱ្យពួកខ្ញុំខិតខំប្រឹងប្រែងហ្វឹកហាត់ឡើងវិញ និងភាគច្រើនហាត់បន្ថែមដោយខ្លួនឯង»។ កីឡាករវ័យ ១៩ ឆ្នាំរូបនេះ បង្ហើបឱ្យដឹងទៀតថា៖ «គាត់ថា គាត់នឹងតាមមើលរហូតពេលយើងប្រកួត ហើយកុំឱ្យពួកខ្ញុំមានការអន់ចិត្តអី ប្រឹងប្រែងហាត់បន្តទៀត លើកក្រោយគាត់នឹងអាចហៅទៅស៊ីហ្គេម ២០២៣ ពេលយើងធ្វើម្ចាស់ផ្ទះ។»

គួរដឹងដែរថា វុធ តុលា និង ឡេង ណូរ៉ា ធ្លាប់ស្ថិតក្រោមការដឹកនាំបង្ហាត់ និងបញ្ជាក្នុងការប្រកួតដោយផ្ទាល់ពី លោក Keisuke Honda កាលពីពេលដែលរូបគេជាប់ជម្រើសជាតិកម្ពុជាឈុតធំ ចេញទៅប្រកួតវគ្គជម្រុះបាល់ទាត់ពិភពលោក នៅប្រទេសបារ៉ែន កាលពីខែមិថុនា ឆ្នាំ ២០២១ ដោយសុទ្ធតែបានបង្ហាញខ្លួន ហើយប្រកួតជាមួយក្រុមខ្លាំងៗទៀតដូចជា បារ៉ែ, អ៊ីរ៉ាក់ និងអ៊ីរ៉ង់ ជាដើម។

ដោយឡែក កីឡាករ រដ្ឋ វីរៈ ដែលគេស្គាល់ថាជាកូនកាត់ខ្មែរបារាំងនោះ បានជាប់ជម្រើសជាតិអាយុក្រោម ២៣ ឆ្នាំកម្ពុជា ប្រកួតក្នុងពានរង្វាន់ AFF U-23 Championship ដែលកម្ពុជា ធ្វើជាម្ចាស់ផ្ទះ បើទោះបីជារូបគេមិនបានបង្ហាញខ្លួនក៏ដោយ។ ណូរ៉ា ក៏បានជាប់ឈ្មោះប្រកួតក្នុងពានរង្វាន់នេះផងដែរ លើកលែងតែ តុលា ដែលខកខានមិនបានជាប់ក្រោយត្រូវបានជម្រុះចេញ ក្នុងដំណាក់កាលធ្វើតេស្ត៕

អត្ថបទ៖ មន្នីរ័ត្ន

Related Topics: