វិញ្ញាសា​ឃីកបុកស៊ីងព្រឹត្តិការណ៍​ស៊ីហ្គេម កម្ពុជាឈ្នះ ១ និងចាញ់ ៣ ប្រកួត​ម្សិលមិញ

ប្រភេទកីឡា​ចំនួន ២ របស់​ក្រុម​កម្ពុជា​ដែល​ចូលរួមព្រឹត្តិការណ៍​ស៊ីហ្គេម​នៅប្រទេស​វៀតណាមសម្រាប់ការ​ប្រកួត​កាលពី​ម្សិលមិញ​ បាន​បញ្ចប់​ដោយ​ធ្វើពុំសូវបានល្អឡើយ​។

វិញ្ញាសា​កីឡាឃីកបុកស៊ីងវិញ កីឡាករ-កីឡាការិនីកម្ពុជា ​លទ្ធផល​ ចាញ់ ៣ ឈ្នះ ១។ ពោលគឺកីឡាករ ខាំ ខ្លានាង បានចាញ់ពិន្ទុកីឡាករម៉ាឡេស៊ី Masdor Mohammad Rifdean លើវិញ្ញាសាទម្ងន់ ៥១​គីឡូក្រាម​។ បន្ទាប់មកកីឡាការិនី ទូច ចាន់វត្តី ក៏ខកខានឡើងវគ្គបន្ដដូចគ្នា បន្ទាប់ពីចាញ់ពិន្ទុកីឡាការិនីថៃ Namrak Surachada លើវិញ្ញាសាទម្ងន់ ៥៦គីឡូក្រាម។ ប៉ុន្តែចូលដល់គូទី៣ កីឡាករ ឈឿង ល្វៃ បានរកជ័យជម្នះឱ្យកម្ពុជា ក្រោយយកឈ្នះកីឡាករសិង្ហបុរី Nazri Bin Sutari Muhammad ដោយពិន្ទុ ឡើងវគ្គពាក់កណ្ដាលផ្ដាច់ព្រ័ត្រ កក់មេដាយសំរឹទ្ធ លើវិញ្ញាសា ៧១គីឡូក្រាម។ ចុងក្រោយកីឡាករ ឈុត សេរីវ៉ាន់ថង បានចាញ់ពិន្ទុកីឡាករម្ចាស់ផ្ទះវៀតណាម Nguyen Quang Huy លើវិញ្ញាសា ៦០គីឡូក្រាម។

ដោយឡែក​ប្រភេទកីឡាបាល់ទាត់ វិញ្ញាសានារីកម្ពុជា បានរងបរាជ័យក្រោមថ្វីជើង ក្រុមនារីហ្វីលីពីន ដោយលទ្ធផល ៥-០។ ក្នុងការប្រកួតហ្វីលីពីន ដែលគេស្គាល់ថាជាក្រុមត្រូវលេងបាល់ទាត់នារិពិភពលោកនៅឆ្នាំក្រោយនោះ បាន​គៀប​សង្កត់​ក្រុមនារីកម្ពុជា ដោយព្យាយាម​រកគ្រាប់បាល់ឱ្យបានច្រើនតាមដែលអាចធ្វើទៅបាន គឺជាគោលដៅក្នុងការប្រកួត។ ប៉ុន្តែយ៉ាងណាមិញ នៅវគ្គទី១ គេអាចរកបានត្រឹមតែ ១គ្រាប់ប៉ុណ្ណោះនៅនាទី២៧។

វគ្គទី២ ហ្វីលីពីន នៅតែបង្ហាញភាពរឹងមាំរបស់ខ្លួននាមជាក្រុមខ្លាំង ដោយព្យាយាមរកគ្រាប់បាល់ម្ដងហើយម្ដងទៀត ប៉ុន្តែពន្យាពេលដល់នាទី៦៤ ទើបអាចរកគ្រាប់បាល់ទី២ បានសម្រេច និងជាបន្តបន្ទាប់រកគ្រាប់បាល់ទី៣ ទី៤ និងទី៥ បាននៅនាទី៦៨, ៧៦, ៨០ ធ្វើឲ្យលទ្ធផលបញ្ចប់ជាផ្លូវការ ហ្វីលីពីន ឈ្នះ កម្ពុជា ៥-០។

លើ​វិញ្ញាសា​ប្រកួត​កីឡាចែវទូក ក្រុម​កម្ពុជាធ្វើពុំបានល្អឡើយ ដោយស្ថិតនៅចំណាត់ថ្នាក់ចុងក្រោយ ទាំងពីរវិញ្ញាសា ពោលគឺប្រកួតផ្នែកបុរសពីរនាក់ចម្ងាយ ២០០០ម ស្ថិតនៅចំណាត់ថ្នាក់លេខ៥ ក្នុងចំណោម ៥ក្រុម ស្របពេលប្រកួតផ្នែក​បុរស បួននាក់ កម្រិតស្រាលចម្ងាយ ២០០០ម ក៏ស្ថិតនៅចំណាត់ថ្នាក់លេខ៥ ក្នុងចំណោម ៥ក្រុមដូចគ្នា។

យ៉ាងណាមិញ កាលពីម្សិលមិញ​កម្ពុជាធ្វើបានល្អលើប្រភេទកីឡាបាល់ទាត់ វិញ្ញាសាបុរស (អាយុក្រោម ២៣ឆ្នាំ) ដែលបានឈ្នះ ឡាវ ៤-១៕

អត្ថបទ៖ មន្នីរ័ត្ន