កីឡា

ប្រធានក្រុម៖ ការមើលស្រាលដៃគូធ្វើឲ្យកម្ពុជាចាញ់ឥណ្ឌូនេស៊ី ២សិត

បានផុស

៤ ខែ មុន

នៅ

ថ្ងៃពុធ ៣ សីហា ២០២២

ដោយ

Sovath

ក្រុមកីឡាករបាល់ទះអង្គុយជនពិការកម្ពុជាបានយកឈ្នះក្រុមម្ចាស់ឥណ្ឌូនេស៊ី ដោយលទ្ធផល ៣សិតទល់២សិត ដើម្បីឡើងវគ្គផ្តាច់ព្រ័ត្រដណ្តើមមេដាយមាស ប៉ុន្តែការមើលស្រាលដៃគូជាមូលហេតុធ្វើឲ្យឥណ្ឌូនេស៊ីអាចយកឈ្នះបាន២សិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមកីឡាករបាល់ទះអង្គុយជនពិការកម្ពុជាបានមើលឃើញថា ក្រុមឥណ្ឌូនេស៊ីគឺជាក្រុមមួយដែលមានកម្រិតសមត្ថភាពទាបជាងខ្លួន និងគិតថា មិនសូវពិការក្នុងការយកឈ្នះ ប៉ុន្តែការពិតនៅលើទីលានខុសពីការគិតស្ទើរទាំងស្រុង។

ក្រុមកម្ពុជាបានឈ្នះក្រុមឥណ្ឌូនេស៊ីដោយលទ្ធផល ៣សិត២ (២១-២៥, ២៥-១៥, ២១-២៥, ២៥-១៣, ១៥-១១) ក្នុងវគ្គពាក់កណ្តាលផ្តាច់ព្រ័ត្រដើម្បីឡើងទៅវគ្គផ្តាច់ព្រ័ត្រ។ ការប្រកួតពិតជាតាន់តឹងខ្លាំងមែនទែន ដោយសារសិតទី១ ក្រុមម្ចាស់ផ្ទះឥណ្ឌូនេស៊ីបានយកឈ្នះ ហើយកម្ពុជាបានយកឈ្នះសិតទី២ដើម្បីតាមស្មើ ប៉ុន្តែនៅសិតទី៣ ឥណ្ឌូនេស៊ីបានយកឈ្នះនាំមុខ ២សិត១។ ទោះបីជាយ៉ាងណា នៅសិតទី៤ និងទី៥ ក្រុមកម្ពុជាធ្វើបានល្អដើម្បីទទួលបានជ័យជម្នះឡើងទៅវគ្គផ្តាច់ព្រ័ត្រ។

កីឡាករ អ៊ូ ផល្លា ប្រធានក្រុមកីឡាករបាល់ទះអង្គុយជនពិការកម្ពុជាបានលើកឡើងថា ៖«មុនការប្រកួត ខ្ញុំគិតថាស្រួល តែដល់ពេលប្រកួតមិនដូចអ្វីដែលគិត។ យើងធ្វើអត់បានល្អ ព្រោះយើងប្រឹងពេក ដោយសារធ្លាប់មើលគេលេង យើងគិតថាគេអន់។ យើងប្រឹងចង់ឈ្នះពេក ធ្វើឲ្យយើងគាំងតែម្តងសិតទី១ តែសិតទី២ យើងបានកែលំអ បានធ្វើឲ្យយើងល្អប្រសើរ»។

កីឡាករ អ៊ូ ផល្លា បានលើកឡើងថា ៖«យើងមើលវីដេអូឥណ្ឌូនេស៊ីលេងជាមួយថៃអត់ល្អ ដល់លេងជាមួយកម្ពុជាយើងល្អមែនទែន។ គាត់ល្អទាំងម៉ាត់ ល្អទាំងបាំង បាំងរបស់គាត់ខ្ពស់។ ប្លែកច្រើនមែនទែនពេលលេងជាមួយថៃ និងលេងជាមួយកម្ពុជាយើង។ បញ្ហាលំបាកគឺគាត់ខ្ពស់ និងម៉ាត់។ ក្រោយមកពួកយើងបានប្រមូលស្មារតី និងបន្ធូរអារម្មណ៍ឲ្យល្អធម្មតាវិញ។ អ្វីដែលជាចំណុចខ្លាំងរបស់ឥណ្ឌូនេស៊ីគឺកម្លាំងស៊ុហ្វខ្លាំងដំបូង»។

ក្រុមកីឡាករបាល់ទះអង្គុយជនពិការកម្ពុជានឹងជាមួយក្រុមថៃ នៅថ្ងៃទី៤ ខែសីហា ដើម្បីដណ្តើមមេដាយមាស ខណៈម្ចាស់ផ្ទះឥណ្ឌូនេស៊ីត្រូវប្រកួតជាមួយមីយ៉ាន់ម៉ាដើម្បីដណ្តើមមេដាយសំរឹទ្ធ នៅថ្ងៃទី៣ ខែសីហា៕

អត្ថបទ៖ វីរបុត្រ

Related Topics:អាស៊ានប៉ារ៉ាហ្គេម