កីឡា

ក្រុមបាល់ទាត់នារីកម្ពុជាប៉ះវៀតណាមយប់នេះដើម្បីកៅអីវគ្គផ្តាច់ព្រ័ត្រ

បានផុស

១ year មុន

នៅ

ថ្ងៃសុក្រ ១២ ឧសភា ២០២៣

ដោយ

ក្រុមបាល់ទាត់នារីជម្រើសជាតិកម្ពុជានឹងប្រកួតជាមួយក្រុមនារីជម្រើសជាតិវៀតណាមនៅវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ វេលាម៉ោង៧យប់នេះនៅពហុកីឡដ្ឋានជាតិអូឡាំពិក។

មុនឈានដល់វគ្គពាក់កណ្តាលផ្តាច់ព្រ័ត្រ ក្រុមនារីម្ចាស់ផ្ទះកម្ពុជាបានប្រកួតឈ្នះក្រុមនារីឡាវ ២-០, ឈ្នះនារីសិង្ហបុរី ១-០ និងចាញ់នារីថៃ ០-៣ ដើម្បីទទួលបាន៦ពិន្ទុ ឈរចំណាត់ថ្នាក់លេខ២ក្នុងពូល B។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកក្រុមនារីវៀតណាម ក៏ឈ្នះ២ប្រកួត និងចាញ់១ប្រកួតដែរវគ្គសន្សំពិន្ទុក្នុងពូល A ដោយបានយកឈ្នះនារីម៉ាឡេស៊ី ៣-០, ឈ្នះនារីមីយ៉ាន់ម៉ា ៣-១ និងចាញ់ ហ្វីលីពីន ១-២ ប៉ុន្តែឈរលេខ១ក្នុងពូលដោយសារមានគ្រាប់បាល់ចំណេញច្រើនជាងមីយ៉ាន់ម៉ាដែលឈរលេខ២។

ក្រុមបាល់ទាត់នារីកម្ពុជាទើបត្រូវតែបានបង្កើតឡើងនាប៉ុន្មានឆ្នាំចុងក្រោយប៉ុណ្ណោះ និងមានបទពិសោធតិចតួចលើឆាកអន្តរជាតិ ប្រៀបធៀបនឹងក្រុមនារីវៀតណាមមានបទពិសោធលើឆាកអន្តរជាតិទាំងកម្រិតអាស៊ី និងជម្រុះជើងឯកពិភពលោក។

ក្នុងប្រវត្តិ ក្រុមនារីកម្ពុជាធ្លាប់ប្រកួតជាមួយក្រុមនារីវៀតណាម៣ដង ប៉ុន្តែមិនធ្លាប់ឈ្នះ ឬស៊ុតចូលវៀតណាមឡើយ។ ឆ្នាំ២០២២ ក្រុមនារីកម្ពុជាបានចាញ់នារីវៀតណាមដោយលទ្ធផល ០-៣ ក្នុងការប្រកួត AFF Championship។

ក្នុងព្រឹត្តិការណ៍កីឡាស៊ីហ្គេម លើកទី៣១ ឆ្នាំ២០២១ ក្រុមនារីកម្ពុជាបានចាញ់ក្រុមនារីវៀតណាមដោយលទ្ធផល ០-៧ វគ្គសន្សំពិន្ទុក្នុងពូល និងឆ្នាំ២០១៩ នារីកម្ពុជាចាញ់នារីវៀតណាម ០-១០ ក្នុងការប្រកួតជើងឯក AFF Championship។

ស្ថិតិប្រកួត៥លើកចុងក្រោយរបស់ក្រុមទាំងពីរគឺ កម្ពុជាឈ្នះ៣ប្រកួត និងចាញ់២ប្រកួត ខណៈនារីវៀតណាមឈ្នះ៤ប្រកួត និងចាញ់១។

ប្រសិនបើក្រុមនារីកម្ពុជាចាញ់ក្រុមនារីវៀតណាមយប់នេះហាក់ដូចជារឿងធម្មតា ដោយសារក្រុមនារីវៀតណាមជាជើងខ្លាំងតំបន់អាស៊ាន និងជាម្ចាស់មេដាយមាសស៊ីហ្គេម ឆ្នាំចាស់។ ផ្ទុយទៅវិញ ប្រសិនបើក្រុមនារីកម្ពុជាអាចយកឈ្នះនារីវៀតណាមបាននោះ រឿងភ្ញាក់ផ្អើលច្រើននឹងកើតឡើងសម្រាប់បាល់ទាត់នារីកម្ពុជា៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣