Ronaldo បញ្ជាក់ពីអនាគតរបស់ខ្លួននិងកម្រិតលីគអារ៉ាប៊ីសាអ៊ូឌីត

ខ្សែប្រយុទ្ធ Cristiano Ronaldo នឹងមិនវិលត្រឡប់ទៅកាន់ក្លិបនៅតំបន់អឺរ៉ុបវិញទេ​ ក្រោយរូបគេ​បាន​ផ្លាស់ទៅលីគកំពូលអារ៉ាប៊ីសាអ៊ូឌីត និងបាន​និយាយពាក់ព័ន្ធអំពីគុណភាព និងកម្រិតលីគអារ៉ាប៊ីសាអ៊ូឌីត។

Cristiano Ronaldo បាននិយាយថា៖«ខ្ញុំប្រាកដ ១០០% គឺថា ខ្ញុំនឹងមិនវិលត្រឡប់​ទៅកាន់ក្លិបនៅតំបន់អឺរ៉ុបវិញទេ។ ខ្ញុំមានអាយុ ៣៨ ឆ្នាំហើយ។ ណាមួយបាល់ទាត់នៅអឺរ៉ុបបានធ្លាក់ចុះនិងបាត់បង់គុណភាពជាច្រើន តែរឿងមួយគត់ដែលខ្ញុំមិនអាចបដិសេធបាន គឺមានតែលីគ Premier League មួយទេដែលបន្ដធ្វើបានយ៉ាងល្អ។ លីគកំពូលរបស់ប្រទេស អង់គ្លេស នៅតែបន្តនាំមុខលីគផ្សេងៗទៀតទាំងអស់»។

ក្រោយពីដៃគូ​ប្រកួតប្រជែងចាស់កីឡាករ Lionel Messi បានផ្ទេរទៅក្លិប Inter Miami នៅទឹកដីសហរដ្ឋអាមេរិករួច កីឡាករប្រធាន​ក្រុម​ជម្រើស​ជាតិព័រទុយហ្គាល់​ ក៏បាននិយាយដែរថា៖«លីគអារ៉ាប៊ីសាអ៊ូឌីតល្អជាងលីគសហរដ្ឋអាមេរិក។ ឥឡូវនេះកីឡាករជាច្រើនកំពុងមកលីគអារ៉ាប៊ីសាអ៊ូឌីត»។

តារា​ជើង​ស៊ុត​ឆ្នើមរបស់ព័រទុយហ្គាល់​បាន​លើក​ឡើង​បែប​នេះដោយសារ​ពេលបច្ចុប្បន្នមានកីឡាករនៅតំបន់អឺរ៉ុបជាច្រើនបានផ្ទេរទៅកាន់លីគអារ៉ាប៊ីសាអ៊ូឌីត​រួមមាន កីឡាករ Benzema , N’Golo Kante, Kalidou Koulibaly, Edouard Mendy, Rúben Neves, Roberto Firmino, Marcelo Brozovic និងតារាបាល់ទាត់ឆ្នើមៗជាច្រើនទៀត។

យ៉ាងណាមិញទាំងនេះគ្រាន់តែជាយល់ឃើញ និងលើកឡើងរបស់តារាឆ្នើមសញ្ជាតិព័រទុយហ្គាល់​ផ្ទាល់​ខ្លួន​ប៉ុណ្ណោះ។ សម្រាប់បងប្អូនអ្នកគាំទ្របាល់ទាត់ប្រាកដជាយល់ច្បាស់អំពីបច្ចុប្បន្នភាពរបស់វិស័យបាល់ទាត់នៅលើពិភពលោកច្បាស់ជាមិនខាន៕

ប្រែសម្រួល៖ ផា រតនា
ប្រភព៖ ESPN