ការ​ប្រកួត​ឃីក​បុក​ស៊ីង​ជើង​ឯក​អាស៊ី​២០២៤ នៅ​កម្ពុជា​មាន​ទាំង​វិញ្ញាសាសម្តែង

ការ​​ប្រកួត​កីឡា​ឃីក​បុក​ស៊ីង​​ជ្រើស​រើស​ជើង​ឯក​​អាស៊ី ឆ្នាំ​២០២៤ នឹង​ធ្វើ​នៅ​ពហុកីឡដ្ឋាន​ជាតិ​អូឡាំពិក រាជ​ធានី​ភ្នំពេញ ប្រទេស​កម្ពុជា ចាប់​ពី​ថ្ងៃ​ទី​​៦ ដល់​ទី​១៣ ខែ​តុលា ដែល​មាន​ច្រើន​ប្រភេទ​​កីឡាឃីក​បុក​ស៊ីង។

​ព្រឹត្តិការណ៍​ប្រកួត​ឆ្នាំ​២០២៤​មាន​​ប្រភេទ​​លើ​សង្វៀន (Ring Styles) ​គឺ​ Full Contact, Low Kick និង K1-Styles ខណៈ​ប្រភេទ​​​លើ​កក្តារ​កម្រាល (Tatami Stayles) មាន Points Fighting, Light Contact, Kick Light និង Musical Forms។ សម្រាប់​ Musical Forms គឺ​ជា​ប្រភេទ​ប្រកួត​​សម្តែង។

តាម​លក្ខន្តិកៈ​ដែល​បាន​ចែងសរុប​ទាំង​អស់​មាន​១១០​វិញ្ញាសា ក្នុងនោះ​វិញ្ញាសា​ប្រយុទ្ធ​មាន​ចំនួន​​១០២ និង​វិញ្ញាសា​សម្តែង​មាន​៨។​ ទោះ​បី​ជា​យ៉ាង​ណា ការ​ប្រកួត​​អាច​នឹង​មិន​ដំណើរ​ការ​ទាំង​​១១០​វិញ្ញាសា​នោះ​ទេ។ គ្រប់​វិញ្ញាសា​ទាំង​អស់​ត្រូវ​តែ​មាន​អត្តពលិក​ចុះ​ឈ្មោះ​ចាប់​ពី​៤​នាក់​ឡើង​​ទៅ​ទើប​​អាច​រៀប​ចំ​ការ​ប្រកួត​បាន​ ប៉ុន្តែ​​ប្រសិន​បើ​វិញ្ញាសា​ណា​​​មាន​អត្តពលិក​ចុះ​ឈ្មោះ​​ត្រឹម​តែ​៣​នាក់​គឺ​លុប​ចោល ហើយ​អត្តពលិក​ដែល​ចុះ​ឈ្មោះ​ត្រឹម​៣​នាក់​ចុះ​ក្រោម​​ នឹង​ប្រកួត​ក្នុង​វិញ្ញាសា​ដែល​មាន​ទម្ងន់ផ្សេង​​។​

ប្រភេទ​កីឡា​ឃីក​បុក​ស៊ីង និង​វិញ្ញាសា​ចំនួន​១១០​វិញ្ញាសា

• ប្រភេទ Full Contact មាន​១៩​វិញ្ញាសា (បុរស​១២​វិញ្ញាសា និងនារី​៧​វិញ្ញាសា)
• ប្រភេទ Low Kick មាន​១៩​វិញ្ញាសា (បុរស​១២​វិញ្ញាសា និង​នារី​​៧​វិញ្ញាសា)
• ប្រភេទ K1 Style មាន​១៩​វិញ្ញាសា (បុរស១២​វិញ្ញាសា និង​នារី៧​វិញ្ញាសា)
• ប្រភេទ Point Fighting មាន១៥​វិញ្ញាសា (បុរស​៩​វិញ្ញាសា និង​នារី៦​វិញ្ញាសា)
• ប្រភេទ Light Contact មាន១៥​វិញ្ញាសា (បុរស៩​វិញ្ញាសា និង​នារី​៦​វិញ្ញាសា)
• ប្រភេទ Kick Light មាន១៥​វិញ្ញាសា (បុរស​៩​វិញ្ញាសា និង​នារី​៦​វិញ្ញាសា)
• សម្តែង​ Creative Forms មាន​៤វិញ្ញាសា (បុរស​២​វិញ្ញាសា និង​នារី​២​វិញ្ញាសា)
• សម្តែង Musical Forms មាន៤វិញ្ញាសា (បុរស​២​វិញ្ញាសា និង​នារី​២​វិញ្ញាសា)

អត្ថបទ៖ វីរបុត្រ