Rooney ទទូចឱ្យ Man UTD យកអតីតកីឡាករខ្លួនមួយរូបមកវិញ ដើម្បីជួយតំបន់ប្រយុទ្ធ

វីរបុរសក្រុម Manchester United លោក Wayne Rooney ពិតជាចង់ឃើញខ្សែប្រយុទ្ធក្រុម Brighton កីឡាករ Danny Welbeck មកលេងនៅទឹកដី Old Trafford ជាថ្មី ក្រោមការដឹកនាំរបស់លោក Ruben Amorim ណាស់។

ក្លិប​ Man UTD បច្ចុប្បន្នកំពុងមានបញ្ហាជាច្រើននៅត្រង់តំបន់ប្រយុទ្ធកណ្តាល ដោយកីឡាករភាគច្រើនលេងពុំទាន់ត្រូវជើងគ្នាល្អ ក្រោមការដឹកនាំរបស់អ្នកចាត់ការសញ្ជាតិ ព័រទុយហ្គាល់វ័យ៣៩ឆ្នាំ លោក Ruben Amorim។ កាលពីថ្ងៃ ចន្ទ ទី៣ ខែ​កុម្ភៈ​ ពួកគេទើបតែធ្លាក់ចេញពីពាន FA Cup ត្រឹមជុំទី ៥ បន្ទាប់ពីបញ្ចប់ការប្រកួត ១២០ នាទីស្មើគ្នាជាមួយ Fulham ១-១ និងចាញ់នៅវគ្គបាល់កាត់សេចក្តី ១១ ម៉ែត្រក្នុងលទ្ធផល ៣-៤។

ស្របពេល Man UTD កំពុងជួបបញ្ហានៅត្រង់តំបន់ប្រយុទ្ធ លោក Rooney បានសម្លឹងឃើញ Danny Welbeck ដែលជាអតីតខ្សែប្រយុទ្ធមួយរូបរបស់បិសាចក្រហមកាលពីអតីតកាលថា រូបគេនៅតែជាកីឡាករ ដែលមានសក្តានុពល និងអាចជួយក្រុមបាន ប្រសិនក្រុមម្ចាស់​ជើង​ឯក​លីគកំពូល​អង់គ្លេស ២០ សម័យចុះកុងត្រាយកគាត់មកវិញ។

ទាក់ទងនឹងរឿងខាងលើ លោក Rooney បានមានប្រសាសន៍នៅអំឡុងពេលប្រកួតយ៉ាងដូច្នេះថា ៖«Danny គឺជាកីឡាករដ៏អស្ចារ្យ ដែលខ្ញុំធ្លាប់លេងជាមួយ។ និយាយដោយស្មោះត្រង់ ខ្ញុំប្រហែលជានៅតែចង់ឃើញគាត់​លេង​នៅទីនេះលេងឱ្យ Manchester United ។ គាត់ស៊ុតបញ្ចូលទីបានពេញមួយអាជីពរបស់គាត់ នៅដើមនៃអាជីពរបស់គាត់។ គាត់មានបញ្ហារបួស ប៉ុន្តែមើលទៅគាត់ហាក់ដូចជាបានយកឈ្នះលើវាទាំងស្រុង ហើយឥឡូវនេះគាត់កំពុងមានរដូវកាលដ៏អស្ចារ្យ»។

គួរបញ្ជាក់ថា ការប្រកួតវគ្គ១៦ ក្រុមចុងក្រោយក្នុងពាន FA Cup បានបញ្ចប់ជាផ្លូវការហើយ ខណៈការប្រកួតវគ្គ ៨ ក្រុមចុងក្រោយនឹងប្រព្រឹត្តទៅនៅថ្ងៃទី២៩ ខែមីនា ឆ្នាំ​២០២៥៕

ប្រែសម្រួល៖ សេម កុសល
ប្រភព៖ Goal