ចរាចរណ៍

រថយន្តCRVបុករបាំងថ្មពុះចែកទ្រូងផ្លូវដាច់កង់ម្ខាង

បានផុស

២ years មុន

នៅ

ថ្ងៃព្រហស្បតិ៍ ៩ ធ្នូ ២០២១

ដោយ

បុរសម្នាក់បើករថយន្តម៉ាកCRVក្នុងល្បឿនលឿនរេចង្កូតជ្រុលបុករបាំងថ្មពុះចែកទ្រូងផ្លូវពេញទំហឹងបណ្តាលឱ្យដាច់កង់ម្ខាងខូចខាតរបាំងថ្មចំនួន១កង់។

ហេតុការណ៍នេះបានកើតឡើងកាលពីវេលាម៉ោង៣ទៀបភ្លឺ ថ្ងៃទី៩ ខែធ្នូ ឆ្នាំ២០២១ នៅចំណុចមុខស្ថានទូតជប៉ុន តាមបណ្តោយផ្លូវព្រះនរោត្តម ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញមានរថយន្តមួយគ្រឿងម៉ាកCRV ពណ៌គ្រាប់អំពិល ពាក់ស្លាកលេខភ្នំពេញ2AV 3785 ធ្វើដំណើរតាមបណ្តោយផ្លូវព្រះនរោត្តមក្នុងទិសដៅពីត្បូងទៅជើងក្នុងល្បឿនលឿន ខណៈមកដល់ចំណុចកើតហេតុក៏បានរេចង្កូតមកខាងឆ្វេងដៃជ្រុលបុករបាំងថ្មពុះចែកទ្រូងផ្លូវពេញទំហឹងតែម្តងបណ្តាលឱ្យរថយន្តដាច់កង់ខាងមុខផ្នែកខាងឆ្វេងចេញពីរថយន្តហើយរថយន្តមិនទាន់អស់ល្បឿនក៏រេទៅខាងស្តាំដៃវិញបន្តឡើងឃឿនផ្លូវផ្ទុះពោងសុវត្តិភាពទៅមុខលែងរួចចំណែករបាំងថ្មពុះចែកទ្រូងផ្លូវរងការខូចខាតចំនួនមួយកង់សំណាងមិនមានមនុស្សរងរបួស។

ក្រោយកើតហេតុម្ចាស់រថយន្តបង្កបានចុះពីរថយន្តគេចខ្លួនបាត់បន្សល់ទុករថយន្តនៅកន្លែងកើតហេតុត្រូវបានសមត្ថកិច្ចមូលដ្ឋានទាក់ទងទៅជំនាញការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ មកស្ទូចទៅរក្សាទុករង់ចាំម្ចាស់ចូលខ្លួនមកដោះស្រាយនៅពេលក្រោយ៕

អត្ថបទ៖ សុខា