ជាងពាក់កណ្តាលនៃសមាជិកណាតូ គាំទ្រគំនិតផ្តួចផ្តើមទិញ​អាវុធអាមេរិកជួយ​អ៊ុយក្រែន

អគ្គលេខាធិការអង្គការណាតូ លោក ម៉ាក​ រូតេ បាននិយាយកាលពីថ្ងៃពុធ​ទី​១៥​ខែ​តុលា​ថា ជាងពាក់កណ្តាលនៃរដ្ឋជាសមាជិករបស់អង្គការណាតូបានចូលរួមក្នុងគំនិតផ្តួចផ្តើមបញ្ជីតម្រូវការអ៊ុយក្រែនជាអាទិភាព (PURL) ដែលផ្តល់ហិរញ្ញប្បទានដល់ការទិញអាវុធដែលផលិតដោយសហរដ្ឋអាមេរិកសម្រាប់អ៊ុយក្រែន។

លោក រូតេ បានធ្វើសេចក្តីប្រកាសនៅក្នុងសន្និសីទសារព័ត៌មានមួយក្នុងទីក្រុងព្រុចសែល បន្ទាប់ពីកិច្ចប្រជុំរបស់រដ្ឋមន្ត្រីការពារជាតិណាតូ ជាកន្លែងដែលលោកបានសង្កត់ធ្ងន់ថា សន្តិសុខរបស់អ៊ុយក្រែននៅតែជាប់ទាក់ទងដោយផ្ទាល់ទៅនឹងសម្ព័ន្ធមិត្ត។

លោក រូតេ បាន​លើក​ឡើង​ថា «អរគុណចំពោះការផ្តល់មូលនិធិពីសម្ព័ន្ធមិត្ត យើងកំពុងផ្តល់​ឲ្យអ៊ុយក្រែននូវឧបករណ៍សំខាន់ៗរបស់សហរដ្ឋអាមេរិកតាមរយៈ PURL។ វាកំពុងផ្ដល់​ឲ្យអាវុធអ៊ុយក្រែន​នូវ​អាវុធ​ដែលខ្លួន​ពិតជាត្រូវការដើម្បីការពារប្រជាជនរបស់ខ្លួន និងដើម្បីរក្សាជួរមុខ។ យើងបានចាប់ផ្តើមយ៉ាងខ្លាំងជាមួយនឹងសម្ព័ន្ធមិត្តចំនួន​៦​ដែលបានផ្តល់មូលនិធិដល់កញ្ចប់ PURL ដំបូង។ ថ្ងៃនេះ ជាងពាក់កណ្តាលនៃសម្ព័ន្ធមិត្តណាតូបានចុះឈ្មោះហើយ ដែលធានាលំហូរនៃការគាំទ្រដ៏សំខាន់នេះសម្រាប់អ៊ុយក្រែន»។

លោក រូតេ បានបន្ថែម​ថា រដ្ឋមន្ត្រីការពារជាតិអ៊ុយក្រែន លោក Denys Shmyhal និងតំណាងជាន់ខ្ពស់ EU លោកស្រី Kaja Kallas ក៏បានចូលរួមកិច្ចប្រជុំក្រុមប្រឹក្សា​ណាតូ-អ៊ុយក្រែន​ផងដែរ។ លោកបានរំលឹកឡើងវិញថា រុស្ស៊ីនៅតែបន្តកំណត់គោលដៅលើហេដ្ឋារចនាសម្ព័ន្ធស៊ីវិល និងថាមពលរបស់អ៊ុយក្រែន«ទាំង​យប់​ថ្ងៃ» នៅពេលដែលរដូវរងាខិតជិតមកដល់។

លោកបានមានប្រសាសន៍ថា «ការគាំទ្ររបស់យើងចំពោះអ៊ុយក្រែនគឺសំខាន់ណាស់។ ហើយវានឹងបន្តមិនឈប់ឈរ»។

គំនិតផ្តួចផ្តើម PURL ដែលបានចាប់ផ្តើមរួមគ្នាដោយសហរដ្ឋអាមេរិក និងអង្គការណាតូ អនុញ្ញាត​ឲ្យ​រដ្ឋជា​សមាជិក​ផ្តល់មូលនិធិ​រួមគ្នា​សម្រាប់​ការទិញអាវុធអាមេរិក​ ដោយផ្អែកលើតម្រូវការការពារជាតិជាអាទិភាពរបស់អ៊ុយក្រែន។ យន្តការនេះមានគោលបំណងពន្លឿនពេលវេលាចែកចាយដោយការប្រមូលផ្តុំធនធាន និងធានាការសម្របសម្រួលក្នុងចំណោមសម្ព័ន្ធមិត្ត ជាជាងពឹងផ្អែកលើការរួមចំណែកជាតិដាច់ដោយឡែក។

កម្មវិធីនេះបានក្លាយជាឧបករណ៍ស្នូល​មួយរបស់អង្គការណាតូសម្រាប់ទ្រទ្រង់ជំនួយយោធារយៈពេលវែងដល់ទីក្រុង​កៀវ​ ខណៈដែលសង្រ្គាមឈានចូលដល់ឆ្នាំទីបួន​៕

ដោយ៖ ឈាង