ហ្សេលេនស្គី៖ ផែនការ២៨​ចំណុច​របស់ត្រាំ ត្រូវ​​កាត់ចោល​ខ្លះ ក្រោយ​កិច្ច​ពិភាក្សា​ក្រុង​ហ្សឺណែវ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី (Volodymyr Zelensky) បាន​ឲ្យ​ដឹង​កាលពីថ្ងៃចន្ទ​ទី​២៤​ខែ​វិច្ឆិកា​ឆ្នាំ​២០២៥​ថា គណៈប្រតិភូទីក្រុងកៀវ​បានត្រឡប់មកពីកិច្ចពិភាក្សានៅទីក្រុងហ្សឺណែវ ជាមួយមន្ត្រីអាមេរិក និងអឺរ៉ុប ដោយបញ្ជាក់ថា លក្ខខណ្ឌមួយចំនួននៅក្នុងផែនការសន្តិភាព​២៨ចំណុចដើមរបស់​ប្រធានាធិបតីអាមេរិក លោក ដូណាល់ ត្រាំ (Donald Trump) ត្រូវបានដកចេញពីសេចក្តីព្រាងចុងក្រោយ។

យោ​ង​តាម​ Kyiv Post លោកហ្សេលេនស្គី បានលើកឡើងថា ឯកសារនេះ«មិនមាន»២៨ចំណុចទៀតទេ ហើយឥឡូវវា​បាន​ឆ្លុះបញ្ចាំងពី«ចំណុច​ត្រឹមត្រូវជាច្រើន» ទោះបីជាលោកបានបន្ថែមថា អ្នកចរចានៅតែប្រឈមមុខនឹងការងារ«ដ៏លំបាកខ្លាំង» ដើម្បីបញ្ចប់ក្របខ័ណ្ឌនេះក៏ដោយ។

លោកហ្សេលេនស្គី បាន​រៀបរាប់​ថា «អ៊ុយក្រែននឹងមិនក្លាយជាឧបសគ្គដល់សន្តិភាពឡើយ» ដោយបន្ថែមថា ទីក្រុងកៀវ​ត្រៀមខ្លួនរួចជាស្រេចក្នុងការធ្វើការ«ឲ្យ​បានលឿនបំផុតតាមដែលអាចធ្វើទៅបាន» ដើម្បី​ឆ្ពោះទៅរកដំណោះស្រាយ«ប្រកបដោយសេចក្តីថ្លៃថ្នូរ»។

ការលើកឡើងរបស់លោកហ្សេលេនស្គី ស្របនឹងសេចក្តីរាយការណ៍ដែលថា បញ្ហាដ៏ចម្រូងចម្រាសបំផុត រួមទាំងការទាមទារ​ឲ្យ​អ៊ុយក្រែនកាត់ទឹកដីដែលត្រូវបានកាន់កាប់ និងបោះបង់ចោលបំណងចូលជាសមាជិកណាតូ (NATO) ត្រូវបានទុកសម្រាប់កិច្ចពិភាក្សាផ្ទាល់រវាងលោកហ្សេលេនស្គី និងលោកត្រាំ។ លោក​ហ្សេលេនស្គី បានមានប្រសាសន៍ថា «ខ្ញុំនឹងពិភាក្សាអំពីបញ្ហារសើបទាំងនេះជាមួយប្រធានាធិបតី ត្រាំ»។

លោកហ្សេលេនស្គី បានថ្លែងអំណរគុណដល់ដៃគូអន្តរជាតិ សម្រាប់អ្វីដែលលោកបានពណ៌នាថាជាការចូលរួមប្រកបដោយស្ថាបនាពីសំណាក់ទីក្រុងវ៉ាស៊ីនតោន និងការគាំទ្រយ៉ាងទូលំទូលាយពី«ពិភពលោកភាគច្រើន»។

យោងតាមជំនួយការវិមានក្រឹមឡាំង លោក យូរី អ៊ូសាកូវ (Yuri Ushakov) ដែលត្រូវបានស្រង់សម្តីដោយប្រព័ន្ធផ្សព្វផ្សាយរដ្ឋ រុស្ស៊ីបានច្រានចោលសំណើកែប្រែ​របស់អឺរ៉ុបចំពោះផែនការ​សន្តិភាព​របស់​អាមេរិក ដោយចាត់ទុកថា «គ្មានលក្ខណៈស្ថាបនាសោះឡើយ»។

ទីភ្នាក់ងារព័ត៌មាន AFP បានរាយការណ៍ដោយដកស្រង់សម្តីមន្ត្រីជាន់ខ្ពស់ម្នាក់ថា អាមេរិកបានជំរុញ​ឲ្យ​អ៊ុយក្រែនទទួលយកសំណើរបស់ខ្លួន ក្នុងអំឡុងកិច្ចពិភាក្សានៅហ្សឺណែវ។ ខណៈដែលទីក្រុងវ៉ាស៊ីនតោនមិនបានគំរាមដកការគាំទ្រដោយចំៗក៏ដោយ ក៏គណៈប្រតិភូអ៊ុយក្រែនត្រូវបានគេរាយការណ៍ថាបានយល់ច្បាស់​ពីហានិភ័យនេះ៕

ប្រែសម្រួល៖ ឈាង