ហ្សេលេនស្គី តាម​យក​ចិត្ត​​ត្រាំ​ ក្រោយ​រង​ការ​រិះគន់​ថា «គ្មាន​ចេះ​ដឹងគុណ» ចំពោះ​ផែនការ​សន្តិភាព​

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានព្យាយាម​​ស្វះស្វែង​ផ្សះផ្សា​ទំនាក់ទំនងជាមួយ​លោក​ ដូណាល់ ត្រាំ​ ឡើង​វិញ បន្ទាប់ពីមេដឹកនាំអាមេរិក​រូប​នេះ​បានរិះគន់ទីក្រុង​កៀវ​​ជាសាធារណៈ អំឡុងពេលមានកិច្ចចរចានៅទីក្រុងហ្សឺណែវ ស្តីពីកិច្ចព្រមព្រៀងដើម្បីបញ្ចប់សង្គ្រាមជាមួយរុស្ស៊ី។

យោង​តាម AFP កាល​ពីថ្ងៃ​អាទិត្យ​ទី​២៣​ខែ​វិច្ឆិកា​ឆ្នាំ​២០២៥ លោកត្រាំ បានសរសេរនៅលើបណ្តាញសង្គម Truth Social របស់លោកថា ថ្នាក់ដឹកនាំអ៊ុយក្រែនបាន «គ្មាន​ចេះ​ដឹង​គុណស្រ័យ​​សម្រាប់កិច្ចខិតខំប្រឹងប្រែង» របស់​អាមេរិក​ទេ ដោយសំដៅទៅលើសំណើ២៨ចំណុចរបស់ទីក្រុងវ៉ាស៊ីនតោន ដើម្បីបញ្ចប់ជម្លោះជិត៤ឆ្នាំនេះជា​មួយ​ទីក្រុង​មូស្គូ។

ប៉ុន្មានម៉ោងក្រោយមក លោកហ្សេលេនស្គី បានបង្ហោះនៅលើបណ្តាញ X ថា «អ៊ុយក្រែនមានអំណរគុណដល់​អាមេរិក ចំពោះទឹកចិត្ត​របស់ជនជាតិអាមេរិកគ្រប់រូប ហើយជាពិសេសចំពោះប្រធានាធិបតីត្រាំ ចំពោះជំនួយដែលចាប់ផ្តើមពីមីស៊ីល​ Javelin ដែល​បានជួយសង្គ្រោះជីវិតជនជាតិអ៊ុយក្រែន»។

នៅទីក្រុងហ្សឺណែវ ក្រុមមន្ត្រីអាមេរិក និងអ៊ុយក្រែនបានបន្តកែសម្រួលសេចក្តីព្រាងផែនការ​សន្តិភាព​នេះ ដោយទីក្រុងកៀវ​​និយាយថា កំណែចុងក្រោយបំផុតនេះបានដាក់បញ្ចូលនូវជំហរស្នូលមួយចំនួនរបស់ខ្លួន។ លោក Rustem Umerov ដែលជាអ្នកចរចាជាន់ខ្ពស់របស់អ៊ុយក្រែន និងជាប្រធានក្រុមប្រឹក្សាសន្តិសុខ និងការពារជាតិ បានលើក​ឡើង​ថា ឯកសារនេះ «បានឆ្លុះបញ្ចាំងរួចទៅហើយនូវអាទិភាពសំខាន់ៗភាគច្រើនរបស់អ៊ុយក្រែន» ទោះបីជាវា​កំពុង​​ស្ថិត​នៅ​ក្រោមការត្រួតពិនិត្យក៏ដោយ។

គម្រោងដើមរបស់សហរដ្ឋអាមេរិក បានតម្រូវ​ឲ្យ​អ៊ុយក្រែនបោះបង់ទឹកដី កាត់បន្ថយកម្លាំងយោធារបស់ខ្លួន និងប្តេជ្ញាថានឹងមិនចូលរួមជាមួយអង្គការណាតូ​ឡើយ ខណៈពេលដែលផ្តល់ការធានាសន្តិសុខមិនច្បាស់លាស់ និងការប្រើប្រាស់ទ្រព្យសម្បត្តិរុស្ស៊ីដែលបង្កក សម្រាប់ការកសាងឡើងវិញ។

លោកត្រាំ បានកំណត់ពេលវេលា​ឲ្យ​ទីក្រុង​កៀវ​​រហូតដល់ថ្ងៃទី២៧ខែវិច្ឆិកា ដែលត្រូវនឹងទិវាដឹង​គុណ «Thanksgiving» នៅអាមេរិក ដើម្បីអនុម័តផែនការនេះ ប៉ុន្តែលោក​ត្រាំ​បានបង្ហើបថា ថ្ងៃកំណត់អាចបត់បែនបាន បើ​មាន​កិច្ច​សហការ​ល្អនិង​រលូន។

ចាប់តាំងពីចូលកាន់តំណែងសម្រាប់អាណត្តិទីពីរ ជំហររបស់លោកត្រាំ​​ចំពោះសង្រ្គាមបានផ្លាស់ប្តូរម្តងហើយម្តងទៀត។ លោកធ្លាប់​សរសើរប្រធានាធិបតីរុស្ស៊ី លោក វ៉្លាឌីមៀរ ពូទីន និង​ហៅលោកហ្សេលេនស្គី ថាជា «ជនផ្តាច់ការ» តែ​ក្រោយមកទៀតក៏បានដាក់ទណ្ឌកម្មធំៗជា​ច្រើន​លើទីក្រុងមូស្គូ ខណៈពេលដែលបង្ហើបថា អ៊ុយក្រែនអាចនឹងដណ្តើមបានទឹកដីដែលបាត់បង់មកវិញ៕

ប្រែសម្រួល៖ ឈាង