ការដឹកលើសទម្ងន់បានបំផ្លាញផ្លូវថ្នល់ បង្កផលប៉ះពាល់ដល់សុវត្ថិភាពប្រជាជន និងសេដ្ឋកិច្ចជាតិ

រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការ​ដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ លោក សេង ឈួន បានអះអាងថា ការ​ដឹកលើសទម្ងន់ វាបានជះឥទ្ធិពលអាក្រក់ដល់ការបំផ្លិចបំផ្លាញផ្លូវថ្នល់ ក្រៅពីនោះ វាបានបង្កជាផលប៉ះពាល់ដល់សុវត្ថិភាព​អាយុជីវិតប្រជាជន និងសេដ្ឋកិច្ចសង្គមជាតិទាំងមូល។

លោកអះអាងបែបនេះ ក្នុងឱកាសដឹកនាំកិច្ចប្រជុំផ្សព្វផ្សាយអំពីច្បាប់ការងារទប់ស្កាត់ ការដឹកជញ្ជូនលើសទម្ងន់កម្រិតកំណត់ ដល់ម្ចាស់ការដ្ឋានអាជីវកម្មថ្ម ដេប៉ូខ្សាច់ គ្រឿងសំណង់ ដេប៉ូប្រមូលទិញកសិផល និងអាជីវកម្មជីកយកអាចម៍ដី ក្នុងភូមិសាស្រ្តខេត្តក្រចេះ នាថ្ងៃទី១០ ខែ ធ្នូ ឆ្នាំ ២០២៥។

ទោះជាយ៉ាងនេះក្តី លោករដ្ឋលេខាធិការក្រសួងបាន​គូស​បញ្ជាក់​ថា ក្រសួងនៅតែរក្សាឥរិយាបថទន់ភ្លន់ នៅក្នុងការផ្សព្វផ្សាយអប់រំដល់ប្រជាពលរដ្ឋ អំពីច្បាប់គតិយុត្តនានា ដោយសំដៅធ្វើយ៉ាងណា មិនឱ្យប៉ះពាល់ដល់ការប្រកបអាជីវកម្មទទួលទានចិញ្ចឹមជីវិត របស់ប្រជាពលរដ្ឋឡើយ។

ទន្ទឹមនោះ លោក​អំពាវនាវ​ដល់​ម្ចាស់អាជីវកម្មទាំងអស់ ត្រូវបន្តចូលរួមគោរពនូវច្បាប់បទដ្ឋានកិតិយុទ្ធនានា រួមនិងសារាចរណ៍ណែនាំរបស់ក្រសួង និងរាជរដ្ឋាភិបាលផងដែរ ទើបមានប្រសិទ្ធភាព។

យោងតាមការឱ្យដឹងពីលោក គង់ គឹមនី អភិបាលរងខេត្តក្រចេះ​បានឱ្យដឹងថា ការងារផ្សព្វផ្សាយទប់ស្កាត់ការដឹកជញ្ជូន​លើសទម្ងន់កម្រិតកំណត់ក្នុងភូមិសាស្ត្រខេត្តក្រចេះ នាពេលកន្លងមក រដ្ឋបាលខេត្តតែងតែចុះដឹកនាំ និងជំរុញដល់អាជ្ញាធរគ្រប់លំដាប់ថ្នាក់ មន្ទីរ-អង្គភាព ជំនាញពាក់ព័ន្ធ និងកម្លាំងសមត្ថកិច្ចពាក់ព័ន្ធ ផ្សព្វផ្សាយដល់ប្រជាពលរដ្ឋ ដែលជាម្ចាស់ ការដ្ឋានអាជីវកម្មថ្ម ដេប៉ូខ្សាច់-ក្រួស តំណាងក្រុមហ៊ុន និងម្ចាស់អាជីវកម្មការដ្ឋានផ្សេងៗទៀត បានយល់ដឹងចូលរួមគោរព និងអនុវត្តឱ្យបានត្រឹមត្រូវតាមច្បាប់ និងលិខិតបទដ្ឋានគតិយុត្តជាធរមាន។

ជាមួយនឹងលទ្ធផលសម្រេចបាន ក៏នៅមានបញ្ហាប្រឈមមួយចំនួន ពាក់ព័ន្ធនឹងការមិនចូលរួមរបស់ប្រជាពលរដ្ឋ ដែលជា​ម្ចាស់ការដ្ឋានអាជីវកម្មថ្ម ដេប៉ូខ្សាច់-ក្រួស តំណាងក្រុមហ៊ុន និងម្ចាស់អាជីវកម្មការដ្ឋានផ្សេងៗទៀត ដែលនៅតែបន្ត​ដឹកជញ្ជូនលើសទម្ងន់កម្រិតកំណត់ ហើយក្រុមការងារតែងតែចុះផ្សព្វផ្សាយនិងណែនាំជាប់ជាប្រចាំ ព្រមទាំងបានធ្វើការដាក់ពិន័យជាបន្តបន្ទាប់ផងដែរ៕

អត្ថបទ៖ ប្រុញ វិធិន