ព្រឹទ្ធសភាទាមទារឱ្យថៃទទួលខុសត្រូវទាំងស្រុងចំពោះមុខច្បាប់នូវទង្វើឈ្លានពានលើកម្ពុជា

ព្រឹទ្ធសភាកម្ពុជា​ នៅថ្ងៃទី២៥ ខែធ្នូនេះ បានចេញសេចក្តីថ្លែងការណ៍ជុំវិញសង្គ្រាមឈ្លានពានរបស់យោធាថៃមកលើដែនអធិបតេយ្យកម្ពុជា ដោយប្រកាសថ្កោលទោសចំពោះអំពើឈ្លានពានដ៏សាហាវយង់ឃ្នង និងខុសច្បាប់របស់យោធាថៃ។ ព្រឹទ្ធសភាទាមទារឱ្យប្រទេសថៃទទួលខុសត្រូវទាំងស្រុងចំពោះមុខច្បាប់នូវសកម្មភាពដែលបង្កឡើងដោយយោធាថៃមកលើកម្ពុជា។

ចាប់ពីថ្ងៃទី៧ ខែធ្នូ ឆ្នាំ២០២៥ រហូតមកដល់ពេលនេះ ព្រឹទ្ធសភាបានលើកឡើងដោយក្ដីកត់សម្គាល់ឃើញថា កងកម្លាំងប្រដាប់អាវុធថៃបានបើកការវាយប្រហារកាន់តែខ្លាំងក្លា និងមិនរើសគោលដៅ សូម្បីទីតាំប្រជាជនស៊ីវិល ដោយប្រើប្រាស់សព្វាវុធធុនធ្ងន់គ្រប់ប្រភេទ មានទាំងយន្តហោះចម្បាំង ដែលបណ្តាលឱ្យមានមនុស្សស្លាប់ របួស និងភៀសខ្លួន ខណៈផ្ទះសម្បែង ហេដ្ឋារចនាសម្ព័ន្ធស៊ីវិល និងប្រាសាទបុរាណ ក៏រងការបំផ្លិចបំផ្លាញយ៉ាងធ្ងន់ធ្ងរ។

ព្រឹទ្ធសភាកម្ពុជា ចាត់ទុកសកម្មភាពទាំងនេះ គឺជារំលោភបំពានយ៉ាងធ្ងន់ធ្ងរលើច្បាប់ និងគោលការណ៍អន្តរជាតិ ខណៈការវាយប្រហាររបស់យោធាថៃលើទីតាំងបេតិកភណ្ឌវប្បធម៌ ជាការបំពានបន្ថែមទៀតលើអនុសញ្ញាយូណេស្កូ​ ហើយក៏បានបង្ហាញពីការមិនគោរពរបស់ភាគីថៃចំពោះសាលដីការបស់តុលាការយុត្តិធម៌អន្តរជាតិ (ICJ) ស្តីពីរឿងក្តីប្រាសាទព្រះវិហារ ឆ្នាំ១៩៦២ ផងដែរ។ សាលដីការបស់តុលាការ ICJ បានបញ្ជាក់យ៉ាងច្បាស់នូវអធិបតេយ្យរបស់កម្ពុជាលើប្រាសាទព្រះវិហារ និងតំបន់ជុំវិញប្រាសាទនេះ។

ព្រឹទ្ធសភា ដឹកនាំដោយសម្ដេចតេជោ ហ៊ុន សែន បានអំពាវនាវដល់សហគមន៍អន្តរជាតិឱ្យថ្កោលទោសដោយឥតងាករេ លើការរំលោភបំពានទាំងនេះ ព្រមទាំងទាមទារឱ្យប្រទេសថៃទទួលខុសត្រូវទាំងស្រុងចំពោះមុខច្បាប់ និងបញ្ឈប់បន្ទាន់រាល់សកម្មភាពអរិភាពទាំងឡាយ ដែលកំពុងគំរាមកំហែងដល់សន្តិភាព និងស្ថិរភាពរបស់កម្ពុជា ក៏ដូចជាក្នុងតំបន់។

ព្រឹទ្ធសភាក៏អំពាវនាវឱ្យភាគីថៃ អនុវត្តឡើងវិញតាមកិច្ចព្រមព្រៀងឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពទីក្រុងគូឡាឡាំពួរ និងរាល់កាតព្វកិច្ចទាំងឡាយនៅក្រោមច្បាប់អន្តរជាតិឱ្យបានពេញលេញ និងដោយស្មោះត្រង់បំផុត៕

អត្ថបទ៖ ធឿន វ៉ាន់សុង