កីឡា

វ៉ាត វណ្ណធុន មានការជំរុញពីអ៊ុំទើបក្លាយជាកីឡាករវាយសីលំដាប់ប្រទេស និងជាជម្រើសជាតិ

បានផុស

៤ ខែ មុន

នៅ

ថ្ងៃសុក្រ ៩ មករា ២០២៦

ដោយ

កីឡាករជើងខ្លាំងខាងកីឡាវាយសី វ៉ាត វណ្ណធុន ថាមានសមត្ថភាព និងកេរ្តិ៍ឈ្មោះដូចសព្វថ្ងៃនេះគឺដោយសារមានការជំរុញលើកទឹកចិត្តពីអ៊ុំប្រុស យ៉ង់ យ៉េ តាំងពីចាប់ហាត់លេងដំបូងៗបង្អស់នៅឯខេត្តកំពង់ឆ្នាំរហូតជាប់ជម្រើសជាតិ និងបានឈ្នះមេដាយជាតិ អន្តរជាតិជាច្រើនបែបនេះ។

កីឡាករ វ៉ាត វណ្ណធុន

ម្ចាស់មេដាយ ២គ្រឿងនៅឯសហរដ្ឋអាមេរិក វ៉ាត វណ្ណធុន បានឲ្យដឹងថា មុនដល់ថ្ងៃនេះមានទាំងសមត្ថភាព កេរ្តិ៍ឈ្មោះ និងសមិទ្ធផលមេដាយផ្សេងៗគឺលំបាកខ្លាំង ព្រោះចាប់ផ្ដើមពីដំបូងក្រុមគ្រួសារ ឪពុក ម្ដាយ មិនចង់ឲ្យហ្វឹកហាត់នោះឡើយ។ លោកឪពុកអ្នកម្ដាយបារម្ភខ្លាចប៉ះពាល់ដល់ការសិក្សា ព្រោះមើលឃើញចំណាយពេលវេលាច្រើនលើការហ្វឹកហាត់កីឡាមួយនេះដោយមិនដឹងថានៅថ្ងៃខាងមុខទទួលបានផ្លែផ្កាយ៉ាងណានោះឡើយ។

លោក យ៉ង់ យ៉េ អ៊ុំរបស់ វណ្ណធុន

យ៉ាងណាដោយសារតែមានអ៊ុំ យ៉ង់ យ៉េ ដែលជាគ្រូ និងធ្លាប់ជាអ្នកហ្វឹកហាត់កីឡាវាយសីនេះពីមុនគឺតែងតែជំរុញ និងសម្រប់សម្រួលជាមួយឪពុកម្ដាយរបស់ខ្លួនជានិច្ចឲ្យបានបន្តហ្វឹកហាត់រហូតមក។ រាល់ការជំទាស់ផ្សេងៗពីក្រុមគ្រួសារគឺអ៊ុំរបស់ខ្លួនតែងតែចេញមុខដោះស្រាយ។ បន្ថែមពីនេះអ៊ុំរបស់ខ្លួនបានជួយសម្រួលដល់ការចំណាយផ្សេងៗមិនថាតិច ឬច្រើននោះឡើយសម្ភារ ថវិកា រហូតជួយឲ្យបានមកហ្វឹកហាត់នៅរាជធានីភ្នំពេញ ជាប់ជាជម្រើសជាតិថ្នាល និងឈុតធំមកដល់សព្វថ្ងៃនេះ។

កីឡាករ វ៉ាត វណ្ណធុន

ជើងខ្លាំងមកពីខេត្តកំពង់ឆ្នាំរូបនេះបន្តទៀតថា រូបគេពិតជាអរគុណ និងដឹងគុណជាខ្លាំងចំពោះអ៊ុំ យ៉ង់ យ៉េ ដែលបានជួយបង្ហាត់បង្រៀន និងបើកផ្លូវក្នុងអាជីពកីឡាវាយសីនេះរហូតមកដល់ពេលនេះ។ ជាការតបស្នងសងគុណម្ចាស់មេដាយមាស World Police រូបនេះតែងតែដកថវិកាប្រាក់រង្វាន់របស់ខ្លួនមួយចំណែកជូនទៅអ៊ុំ យ៉ង់ យ៉េ រាល់ការប្រកួតកន្លងមក។

កីឡាករ វ៉ាត វណ្ណធុន

បញ្ជាក់ដែរថា វ៉ាត វណ្ណធុន ចាប់ហ្វឹកហាត់ និងលេងកីឡាវាយសីអំឡុងឆ្នាំ ២០១២ នៅឯខេត្តកំពង់ឆ្នាំ ជាមួយអ៊ុំប្រុសរហូតឆ្នាំ ២០១៧ ជាប់ជាកីឡាករថ្នាលរបស់សហព័ន្ធបន្ទាប់មកនៅឆ្នាំ ២០២០ បន្តជាប់ជាកីឡាករជម្រើសជាតិរហូតមកដល់ពេលបច្ចុប្បន្ននេះ។ នៅឆ្នាំ២០១៨ ឈ្នះមេដាយមាស ១គ្រឿងឯប្រទេសអាហ្សង់ទីន លើវិញ្ញសាវាយក្រុម ឆ្នាំ២០២៣ ឈ្នះមេដាយមាសស៊ីហ្គេម ១គ្រឿងនៅកម្ពុជាលើវិញ្ញសាវាយក្រុម ឆ្នាំ២០២៥ ឈ្នះមេដាយ ២គ្រឿង មាស១ សំរឹទ្ធ១ នៅឯសហរដ្ឋអាមេរិក លើវិញ្ញាសាវាយគូ និងវាយទោល និងចុងឆ្នាំ២០២៤ នេះប្រកួតឈ្នះមេដាយមាស ១គ្រឿងក្នុងកម្មវិធីជ្រើសរើសជើងឯកថ្នាក់ជាតិ លើវិញ្ញាសាវាយទោល។ មេដាយនេះដែរគឺសំខាន់សម្រាប់បេក្ខភាពណាដែលចង់ជាប់ជាកីឡាករជម្រើសជាតិនៅឆ្នាំថ្មី ២០២៦ នេះ៕