ដើមឆ្នាំ ២០២៦ ផ្លូវក្នុងក្រុងបាត់ដំបងចំនួន ៧ ខ្សែ​ ចាប់ផ្តើម​ផ្តើមស្ថាបនាកែលម្អឲ្យធំទូលាយ

ផ្លូវ​ក្នុងក្រុងបាត់ដំបចំនួន ៧ ខ្សែ ត្រូវបានអាជ្ញាធរ​ខេត្ត​បាត់ដំបងចាប់ផ្តើមស្ថាបនាជួសជុលឲ្យកាន់តែមានភាពទូលំទូ​លាយ ផ្តល់ភាពងាយស្រួលសម្រាប់ពលរដ្ឋធ្វើដំណើរ។

បើតាមរដ្ឋបាលក្រុង ផ្លូវដែលត្រូវស្ថាបនាជួសជុលកែលម្អក្នុងនោះមានផ្លូវ​មុខពេទ្យជីគក់ ស្ថិតក្នុងសង្កាត់វត្តគរ មានប្រវែង ៨៥០ ម៉ែត្រ និងទទឹង ១២ ម៉ែត្រ។ ផ្លូវស្រែ១០០០ ស្ថិតក្នុងសង្កាត់អូរចារ មានប្រវែង ៣២៩០ ម៉ែត្រ និង​ទទឹង ១០ ម៉ែត្រ​។ ផ្លូវ​ក្រោយវត្តទទួលតាឯក ស្ថិតក្នុងសង្កាត់ទួលតាឯកមានប្រវែង ២៦០០ ម៉ែត្រ និងទទឹង ​១០ ​ម៉ែត្រ។ ផ្លូវស្រែ ១០០ ស្ថិតក្នុងសង្កាត់ស្លាកែត មានប្រវែង ១៥០០ ម៉ែត្រ និង​ទទឹង ១០ ម៉ែត្រ។ ផ្លូវជីបស្រេង ស្ថិតក្នុងសង្កាត់ស្វាយ​ប៉ោ​មាន​ប្រវែង ៥៥០ ម៉ែត្រ និងទទឹង ១០ ម៉ែត្រ។ ផ្លូវផ្សារពោធិ៍វង្ស ស្ថិតក្នុងសង្កាត់ចំការសំរោង មានប្រវែង​១៣៨០ ម៉ែត្រ និងទទឹង ៨ ម៉ែត្រ។ ផ្លូវ​ខាងត្បូងបូរីរោងចក្រ ស្ថិតក្នុងសង្កាត់ទួលតាឯកមានប្រវែង ៥៥០ ម៉ែត្រ និង ទទឹង ៥ ម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការ​ស្ថាបនាកែ​លម្អផ្លូវក្នុងក្រុងខាងលើ រដ្ឋបាលក្រុងសហការជាមួយប្រជាពលរដ្ឋឲ្យរុះរើសំណង់ដែលធ្វើប៉ះពាល់ដល់ចំណីផ្លូវ ខណះពលរដ្ឋ​ក៏ស្នើ​ឲ្យមានការសម្របសម្រួលសងការខូចខាតមួយចំនួនផងដែរ។

បើតាមការគូស​បញ្ជាក់បន្ថែមពី​មន្រ្តីអាជ្ញាធរបាន​ឲ្យ​ដឹង​ថា ផ្លូវដែលត្រូវជួសជុលទាំង ៧ ខ្សែ មួយចំនួន​ក៏​ត្រូវរៀបចំកាយដាក់ប្រព័ន្ធលូដើម្បីបញ្ចៀសការកកស្ទះទឹកក្នុងក្រុងនារដូវវស្សារខាងមុខ ខណះគម្រោងសាងសង់ស្ថាបនាជួសជុលប្រព័ន្ធ​លូក្នុងក្រុង ទាំងត្រើយខាងកើតនិងខាងលិចស្ទឹងសង្កែ​បាន​សាងសង់បញ្ចប់រួចរាលជាស្ថាពរ។

លោក ព្រួញ រិទ្ធីថា ប្រធានមន្ទីរសាធារណះការនិងដឹងជញ្ជូនខេត្តបាត់ដំបង​បានបញ្ជាក់ឲ្យដឹងថា ខាងមន្ទីរកំពុងរៀបចំនីតិវិធីបន្ត ដើម្បីដាក់ដេញថ្លៃលើគម្រោងការស្ថាបនាជួសជុលផ្លូវចំនួន ២១ ខ្សែទៀត នៅក្នុងដើមខែកុម្ភៈនេះ ក្រោយគម្រោងស្ថារប្រព័ន្ធលូក្នុងខេត្តទាំងខាងកើតនិងខាងលិចស្ទឹងសង្កែបានស្ថាបនារួចរាល់ហើយ គិតតត្រឹមថ្ងៃទី១៤ ខែកមរា ឆ្នាំ២០២៦៕

អត្ថបទ÷សៅ សារិទ្ធ