អាជ្ញាធរ​ព្រមានរោងចក្រ​​ផលិត​ដំណាប់ស្វាយ​ក្នុង​ស្រុករតនមណ្ឌល អាច​បិទរោងចក្រជាស្ថាពរករណីមិនគោរពវិធានការ​បរិស្ថាន

ក្រុមការងារក្រសួងបរិស្ថាន​បានចុះពិនិត្យជាមួយមន្រ្តីជំនាញនៃមន្ទីរបរិស្ថានខេត្ត និងរដ្ឋបាលស្រុក​រតន:មណ្ឌលនៅថ្ងៃ​ទី​២១-២២ ខែមេសា ឆ្នាំ២០២៦ បានរកឃើញរោងចក្រផលិតដំណាប់ស្វាយ បៃ ស៊ីង សេង ស្ថិត​នៅក្នុងស្រុក​រតន:​មណ្ឌលខេត្តបាត់ដំបង បានបញ្ចេញសំណល់រាវនៅក្នុងអូរត្រែង ដែល​បង្កឲ្យមានការបំពុលទឹក ងាប់ត្រី និងបំពុលបរិស្ថានដែលមានវិសាលភាពរយះចម្ងាយពីរោងចក្រ ២ គីឡូម៉ែត្រ។

ក្នុងការ​ដាក់​ចេញ​វិធានការ​ឆ្លើយតប​ ក្រសួងបរិស្ថានតម្រូវឲ្យរោងចក្រផលិតដំណាប់ស្វាយខាងលើត្រូវតែអនុវត្តលើលក្ខខណ្ឌ​ចំនួន ៣ ក្នុងនោះមាន÷

១-ផ្អាកដំណើរការផលិតកម្មរោងចក្រ រហូតដល់អាងប្រព្រឹត្តិកម្មសំណល់រាវបានសាងសង់រួចរាល់ និងដំណើរការអនុលោម​តាមបទដ្ឋានបរិស្ថាន។
២-ត្រូវធ្វើការបិទលូបង្ហូសំណល់រាវនិងទឹកភ្លៀងទាំងអស់ មិនឲ្យមានការបញ្ចេញពីទីតាំងរោចក្រចូលទៅក្នុងអូរត្រែង។
៣-ត្រូវទទួលរងពិន័យអន្តរការណ៍ ករណីមិនរាងចាលត្រូវផ្តល់សំណងការខូចខាតបរិស្ថាន តាមការវាយតម្លៃជាក់ស្តែងពីមន្ត្រីជំនាញ។

ជាថ្មីម្តងទៀត ក្រសួងបរិស្ថានបញ្ជាក់ថា នឹងបិទរោងចក្រជាស្ថាពរក្នុងករណីមិនគោរពតាមគោលការខាងលើ ឬនៅតែប្រព្រឹត្តកំហុសម្តងទៀត ខណះការចុះណែនាំនៅថ្ងៃទី២១-២២ខែមេសា ឆ្នាំ២០២៦នេះ មិនមែនជាលើកទី១នោះទេ ហើយមន្ត្រីជំនាញនឹងចាត់វិធានការតាមច្បាប់ បើសិនជាលក្ខខណ្ឌទាំង៣ គ្មានប្រសិទ្ធិភាពលើម្ចាស់រោងចក្រខាងលើនេះ៕

អត្ថបទ÷សៅ សារិទ្ធ