រដ្ឋបាលខណ្ឌឫស្សីកែវ ប្រជុំសាមញ្ញលើកទី២០ អាណត្តិទី៤ ដើម្បីពិនិត្យបន្តជំរុញការងារអភិវឌ្ឍក្នុងមូលដ្ឋាន

នាព្រឹកថ្ងៃសុក្រ ទី៣០ ខែមករា ឆ្នាំ២០២៦ នៅសាលប្រជុំរដ្ឋបាលខណ្ឌឫស្សីកែវ បានបើកកិច្ចប្រជុំសាមញ្ញលើកទី២០ អាណត្តិទី៤ របស់ក្រុមប្រឹក្សាខណ្ឌឫស្សីកែវ ក្រោមអធិបតីភាព លោក ជុំ បាយ័នវិបុល ប្រធានក្រុមប្រឹក្សាខណ្ឌឫស្សីកែវ និងលោក ស្មាស់ រិទ្ធី អភិបាលរងខណ្ឌ ជាតំណាងលោក ជិន ប៊ុនធឿន អភិបាលខណ្ឌឫស្សីកែវ។

កិច្ចប្រជុំនេះ មានការចូលរួមពីសំណាក់ សមាជិក និងសមាជិកាក្រុមប្រឹក្សាខណ្ឌ គណៈអភិបាលខណ្ឌ តំណាងលោកអធិការនគរបាលខណ្ឌ តំណាងលោកមេបញ្ជាការកងរាជអាវុធហត្ថ គណៈនាយក លោក លោកស្រី ប្រធានការិយាល័យទាំង១១ លោកចៅសង្កាត់ទាំង៧ ព្រមទាំងអង្គភាព និងមន្ត្រីពាក់ព័ន្ធជាច្រើនរូបផងដែរ។ ពិនិត្យពិភាក្សា និងអនុម័តលើរបៀបវារៈសំខាន់ៗ ចំនួន៩ ចំណុច រួមមាន៖ ការពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី១៩ អាណត្តិទី៤ កាលពីថ្ងៃទី២៦ ខែធ្នូ ឆ្នាំ២០២៥ ការពិនិត្យ និងអនុម័តសេចក្តីព្រាងរបាយការណ៍ស្តីពីការអនុវត្តសកម្មភាពការងាររបស់រដ្ឋបាលខណ្ឌឫស្សីកែវ ប្រចាំខែមករា ឆ្នាំ២០២៦។

ជាមួយគ្នានេះដែរ អង្គប្រជុំក៏បានពិនិត្យ និងអនុម័តសេចក្តីព្រាងសេចក្តីណែនាំស្តីពីដំណើរការរៀបចំកសាងកម្មវិធីវិនិយោគបីឆ្នាំរំកិល (២០២៧–២០២៩) ព្រមទាំងប្រតិទិនការងារសម្រាប់ការកសាងកម្មវិធីវិនិយោគបីឆ្នាំរំកិល (២០២៧–២០២៩) របស់រដ្ឋបាលខណ្ឌឫស្សីកែវ។ បន្ថែមពីនេះ អង្គប្រជុំបានអនុម័តលើសេចក្តីព្រាងការបង្កើតសមាសភាពក្រុមការងារ កសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិល (២០២៧–២០២៩) ក៏ដូចជាការបង្កើតសមាសភាពក្រុមការងារចុះសិក្សាគម្រោងមូលនិធិអភិវឌ្ឍន៍ខណ្ឌឫស្សីកែវ សម្រាប់ឆ្នាំ២០២៧។

អង្គប្រជុំក៏បានពិនិត្យ និងអនុម័តលើសេចក្តីព្រាងការបង្កើតគណៈកម្មការគ្រប់គ្រងគម្រោង ដាក់ប្រព័ន្ធលូ ជួសជុលអណ្តូងលូ ស្តារលូ ស្ថាបនាផ្លូវបេតុងឆ្អឹងដែក ជួសជុលជង្ហុកសំបុកមាន់ និងការងារអ៊ុតកៅ AC ព្រមទាំងការជួសជុលអគារ សម្រាប់ឆ្នាំ២០២៧ របស់រដ្ឋបាលខណ្ឌឫស្សីកែវ។

ក្រៅពីនេះ អង្គប្រជុំបានអនុម័តលើសេចក្តីព្រាងតារាងបែងចែកប្រាក់រង្វាន់លើកទឹកចិត្តជូនមន្ត្រីរាជការប្រចាំខែមករា ឆ្នាំ២០២៦ របស់រដ្ឋបាលខណ្ឌឫស្សីកែវ និងពិភាក្សាលើបញ្ហាផ្សេងៗ (បើមាន) ដោយមានការឯកភាព និងយល់ព្រមជាឯកច្ឆន្ទ៕ អត្ថបទ ៖ សំណាង