ព័ត៌មានជាតិ

ក្រសួងព័ត៌មាន និង ក្រសួងទេសចរណ៍រួមដៃគ្នាជំរុញការផ្សព្វផ្សាយសក្តានុពលទេសចរណ៍កម្ពុជា

បានផុស

៣ ខែ មុន

នៅ

ថ្ងៃព្រហស្បតិ៍ ៥ កុម្ភៈ ២០២៦

ដោយ

ភ្នំពេញ ៖ ក្នុងកិច្ចពិភាក្សាស្តីពីវិស័យទេសចរណ៍ តំណាង ក្រសួងព័ត៌មានបានបង្ហាញពីលទ្ធផលផ្លែផ្កានៃកិច្ចសហការយ៉ាងជិតស្និទ្ធជាមួយក្រសួងទេសចរណ៍ ក្នុងយុទ្ធនាការផ្សព្វផ្សាយរូបភាពវិជ្ជមានរបស់កម្ពុជាទៅកាន់ពិភពលោកតាមរយៈប្រព័ន្ធផ្សព្វផ្សាយជាតិចម្រុះ។

លោកទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានមានប្រសាសន៍ថា «ក្នុងក្របខណ្ឌនៃយុទ្ធនាការទេសចរណ៍រដូវកាលបៃតង ក្រសួងទាំងពីរបានចាប់ដៃគ្នាផ្សព្វផ្សាយពីសក្តានុពលទេសចរណ៍របស់កម្ពុជាឱ្យកាន់តែរីកសុះសាយ ខណៈរាជរដ្ឋាភិបាលកម្ពុជាដាក់ចេញនូវផែនការសកម្មភាពដើម្បីទាក់ទាញពិភពលោកឱ្យធ្វើដំណើរកំសាន្តមកកាន់ប្រទេសកម្ពុជា។

លោកអនុរដ្ឋលេខាធិការបានមានប្រសាសន៍យ៉ាងដូច្នេះ ក្នុងឱកាសលោកបានអញ្ជើញចូលរួមជាវាគ្មិន ក្នុងកិច្ចពិភាក្សាពិសេសមួយក្រោមប្រធានបទ «បណ្ដាញសង្គម៖ សម្លេងឌីជីថលសម្រាប់វិស័យទេសចរណ៍កម្ពុជា» ដែលរៀបចំឡើងដោយក្រសួងទេសចរណ៍នៅសណ្ឋាគារសុខាភ្នំពេញ កាលពីថ្ងៃទី៤ ខែមករា ឆ្នាំ២០២៦ កន្លងទៅនេះ។

លោកបានបញ្ជាក់ថា ដើម្បីសម្រេចបានគោលបំណងនេះ ការផ្សព្វផ្សាយ និងការទទួលព័ត៌មានពិត ត្រឹមត្រូវ និងគ្រប់ជ្រុងជ្រោយ ពិតជាមានសារៈសំខាន់ ខណៈប្រព័ន្ធផ្សព្វផ្សាយបែបប្រពៃណី និងទំនើបទាំងជាតិ និងឯកជនបន្តដើរតួនាទីស្នូល និងយ៉ាងសកម្មក្នុងទិសដៅនេះ។ ជាក់ស្តែង ក្នុងឆ្នាំ២០២៥ បណ្តាញសារព័ត៌មានជាតិមានវិទ្យុជាតិ ទូរទស្សន៍ជាតិកម្ពុជា ទីភ្នាក់ងារសារព័ត៌មានAKP និងបណ្តាញផ្សាយព័ត៌មានរបស់មន្ទីរព័ត៌មានក្នុង២៥រាជធានី-ខេត្ត បានផលិត និងផ្សាយព័ត៌មានទាក់ទងនឹងវិស័យទេសចរណ៍ ចំនួនប្រមាណ ៣ ០០០ មាតិកា ក្នុងទម្រង់ចម្រុះដូចជា វីដេអូ សំណេរ រូបថតប្រកបដោយគុណភាព ដោយបានផ្សាយតាមរយៈគេហទំព័រ, APP និងបណ្តាញសង្គមរបស់ក្រសួងព័ត៌មាន មានFacebook, TikTok, យូធូប, X និង Instagram បន្ថែមលើការផ្សាយតាមប្រព័ន្ធប្រពៃណី មានវិទ្យុជាតិ ទូរទស្សន៍ជាតិកម្ពុជា។

ជាមួយគ្នានេះ មន្ទីរព័ត៌មាន២៥រាជធានីខេត្តបានសហការជាមួយមន្ទីរទេសចរណ៍ ក៏ដូចជាតួអង្គពាក់ព័ន្ធមានវិស័យរដ្ឋ និងឯកជន ដើម្បីបង្ហាញពីសក្តានុពលគោលដៅទេសចរណ៍សំខាន់ៗ ជាមួយរមណីយដ្ឋានថ្មី ប្លែក មានភាពទាក់ទាញពីនៅក្នុងមូលដ្ឋានរាជធានី-ខេត្តរបស់ខ្លួន តាមរយៈការផលិត និងផ្សព្វផ្សាយព័ត៌មាន និងរូបភាពជូនដល់ភ្ញៀវទេសចរជាតិ និងអន្តរជាតិដើម្បីឱ្យចង់មកទស្សនាកម្ពុជាម្ដងហើយម្ដងទៀត។ ជាងនេះទៀត តាមរយៈទីភ្នាក់ងារសារព័ត៌មានកម្ពុជា AKP ព័ត៌មានស្តីពីទេសចរណ៍កម្ពុជាត្រូវបានបញ្ជូនទៅកាន់ដៃគូសារព័ត៌មានអន្តរជាតិនៅក្រៅប្រទេសចំនួន១៨ ទីភ្នាក់ងារ ដែលមានសកម្មភាពគ្របដណ្ដប់នៅគ្រប់ទ្វីបទាំងអស់លើសកលលោក។

មានប្រសាសន៍ឆ្លើយទៅនឹងសំណួរទាក់ទងនឹងការទប់ស្កាត់ព័ត៌មានក្លែងក្លាយ លោកទេព អស្នារិទ្ធ បានមានប្រសាសន៍គូសបញ្ជាក់ថា កិច្ចសហការរវាងក្រសួងព័ត៌មាន និងក្រសួងទេសចរណ៍មានសារៈសំខាន់ណាស់ ក្នុងការប្រឆាំងនឹងការបំភ្លៃការពិត ការផ្សាយព័ត៌មានក្លែងក្លាយ ដែលមានចេតនាអាក្រក់បង្ខូចកិត្តិយសជាតិ និងវិស័យទេសចរណ៍ប្រទេសកម្ពុជា។ កិច្ចខិតខំនេះ សំដៅធានាសន្តិសុខព័ត៌មាននៅកម្ពុជា រួមចំណែកជំរុញសេដ្ឋកិច្ចតាមរយៈទេសចរណ៍ ព្រោះនៅពេលមានការផ្សព្វផ្សាយពិតយ៉ាងទូលំទូលាយ វានឹងទាក់ទាញការធ្វើដំណើរកំសាន្តរបស់ភ្ញៀវទេសចរជាតិ និងអន្តរជាតិដោយភាពជឿជាក់ កក់ក្តៅ និងមានទំនុកចិត្ត។

សូមបញ្ជាក់ថា ក្រសួងទេសចរណ៍បានរៀបចំកិច្ចពិភាក្សាពិសេសមួយដោយផ្តោតលើសារសំខាន់នៃការប្រើប្រាស់បណ្ដាញសង្គមដោយក្រមសីលធម៌ និងការទទួលខុសត្រូវ ដើម្បីផ្សព្វផ្សាយអំពីទេសចរណ៍និងសក្តានុពលប្រកបដោយនិរន្តរភាព និងនវានុវត្តន៍។ កិច្ចពិភាក្សាក៏បានផ្តោតផងដែរលើការគិតគូរ រិះរកវិធីសាស្ដ្រ និងមធ្យោបាយថ្មីៗ សម្រាប់ការផ្សព្វផ្សាយដោយប្រព័ន្ធបែបថ្មី ដើម្បីជំរុញការស្គាល់កម្ពុជាឱ្យកាន់តែច្រើន និងលើកកម្ពស់វិស័យទេសចរណ៍ប្រកបដោយភាពទាក់ទាញក្នុងយុគសម័យឌីជីថល។

កិច្ចពិភាក្សានេះត្រូវបានដឹកនាំ និងសម្របសម្រួលដោយ លោក ហ៊ុល សីលា អនុរដ្ឋលេខាធិការក្រសួងទេសចរណ៍ ដោយមានការអញ្ជើញចូលរួមពីវាគ្មិនកិត្តិយស តំណាងស្ថាប័នរដ្ឋ និងឯកជន និងអ្នកបង្កើតមាតិកាល្បីៗជាច្រើននាក់ទៀត។

អង្គពិភាក្សាបានសង្កត់ធ្ងន់ថាការប្រើប្រាស់បណ្ដាញសង្គមមិនត្រឹមតែជាឧបករណ៍សម្រាប់ផ្សព្វផ្សាយប៉ុណ្ណោះទេ ប៉ុន្តែជាភ្នាក់ងារផ្នែកទីផ្សារ (Marketing )ដ៏សំខាន់មួយ ក្នុងការបង្ហាញសក្តានុពលទេសចរណ៍ ផលិតផល និងគុណភាពសេវាកម្ម ទេសចរណ៍ របស់កម្ពុជា ដើម្បីទាក់ទាញចំណាប់អារម្មណ៍របស់ភ្ញៀវទេសចរច្រើនឡើងឱ្យអញ្ជើញមកទស្សនា និងកំសាន្តនៅកម្ពុជា។ ទាំងនេះជាគន្លឹះដ៏សំខាន់មួយរួមចំណែកក្នុងការអភិវឌ្ឍ និងធានានិរន្តរភាពវិស័យទេសចរណ៍ ខណៈបន្តលើកតម្កើងរូបភាពវិជ្ជមានរបស់កម្ពុជានៅលើឆាកអន្តរជាតិ៕