សម្តេច ម៉ែន សំអន ៖ សន្តិភាពមានតម្លៃបំផុតមិនអាចកាត់ថ្លៃបានសម្រាប់ គ្រប់ជាតិសាសន៍លើពិភពលោក

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់​ព្រះមហាក្សត្រ និងជាប្រធានសមាគម​នារី​កម្ពុជា ដើម្បីសន្តិភាព និង​អភិវឌ្ឍន៍ បានថ្លែងថា សន្តិភាព មាន​តម្លៃ​បំផុតមិនអាចកាត់ថ្លៃបាន​សម្រាប់​ប្រជាជន​កម្ពុជា ក៏​ដូចប្រជាជននៅទូទាំងពិភពលោក​ប៉ង​ប្រាថ្នា​ចង់បាន។

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះក្នុងពេលអញ្ជើញជាអធិបតីក្នុងការប្រារព្ធពិធី​អបអរសាទរ ខួបលើកទី ១១៥ ទិវាអន្តរជាតិនារី ៨ មីនា ឆ្នាំ ២០២៦ ក្រោមប្រធានបទ «សន្តិភាព និងសន្តិសុខសម្រាប់ស្រ្តី និងគ្រួសារ» នៅអង្គភាពប្រឆាំងអំពើពុករលួយរាជធានីភ្នំពេញ កាលពីព្រឹកអង្គារ៍ ៧ រោច ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី ១០ ខែមីនា ឆ្នាំ ២០២៦។

លោកស្រី ចិន ច័ន្ទមុនី ឧបការី ប្រធានក្រុមប្រឹក្សាវិន័យ និងត្រួតពិនិត្យផ្ទៃក្នុង និងជាប្រធានសមាគម​នារី អ.ប.ព. បានលើកឡើងថា ការអញ្ជើញចូលរួមរបស់ សម្តេចកិត្តិសង្គហបណ្ឌិត គឺជាប្រភព​លើក​ទឹក​ចិត្ត មិនអាចកាត់ថ្លៃបាន ដែលជំរុញឱ្យនារីទាំងអស់ដែលជាថ្នាក់ដឹកនាំ និងមន្រ្តី អ.ប.ព. កាន់តែ​មាន​ឆន្ទៈ​មោះមុត​ក្នុងការបំពេញភារកិច្ច​ជូន អ.ប.ព. ប្រកបដោយស្មារតីទទួលខុសត្រូវខ្ពស់។

លោកស្រី ចិន ច័ន្ទមុនី បានអំពាវនាវដល់មន្រ្តី អ.ប.ព. ទាំងអស់ ចូលរួមបង្កើតគ្រួសារ អ.ប.ព. ដែល​ពោរពេញ​ដោយក្ដីស្រឡាញ់ និងមានសាមគ្គីភាពរឹងមាំ និងចូលរួមចំណែកកសាង និងថែរក្សា​សន្តិភាព និងសន្តិសុខ ដើម្បីវិបុលភាពសង្គមជាតិ។

សម្តេចកិត្តិសង្គហបណ្ឌិត ម៉ែន សំអន បានថ្លែងនូវ​ការ​កោតសរសើរ​ចំពោះ លោកស្រី ហ៊ុន ចាន់ធី មៅ ធនិន បានខិតខំ​ប្រឹងប្រែង​អស់ពី​សមត្ថភាព កម្លាំងកាយចិត្ត ប្រាជ្ញា ស្មារតី អនុវត្តឱ្យបាននូវ​ទិសដៅ ភារកិច្ច ដោយឈរលើ សាមគ្គីភាព ឯកភាព សហការគ្នាល្អ និងមាន​ទំនាក់ទំនង​ជិតស្និទ្ធ​ជាមួយអាជ្ញាធរគ្រប់លំដាប់ថ្នាក់ ដៃគូពាក់ព័ន្ធ ព្រមទាំង​ប្រជាពលរដ្ឋ។

សម្តេចកិត្តិសង្គហបណ្ឌិត បានលើកឡើងថា ទិវានារីអន្តរជាតិ ៨ មីនា ឆ្នាំ ២០២៦ នេះ ត្រូវបាន​ប្រារព្ធ​ធ្វើឡើងក្រោមប្រធានបទ «សន្តិភាព និងសន្តិសុខសម្រាប់ស្ត្រី និងគ្រួសារ» ក្នុង​គោលបំណង​បង្ហាញ​អំពី​សារៈសំខាន់​មិន​អាច​កាត់ថ្លៃ​បាន នៃសន្តិភាព និងសន្តិសុខសម្រាប់ស្ត្រី និងក្រុមគ្រួសារ និង​ការ​ចូលរួម​ចំណែក​យ៉ាង​សកម្ម​របស់ស្ត្រី ក្នុងកិច្ចខិតខំប្រឹងប្រែងដើម្បីកសាង និងថែរក្សា​សន្តិភាព ព្រមទាំងអំពាវនាវឱ្យមានកិច្ច​អន្តរាគមន៍​បន្ទាន់ក្នុងការការពារ និងលុបបំបាត់នូវរាល់​ឧបសគ្គ​រារាំង​ដែលមានផលអវិជ្ជមានដល់ស្ត្រី និងគ្រួសារ ដើម្បីទាញយក​អត្ថប្រយោជន៍​ពី​ភាគលាភ​យេនឌ័រ​ជូនគ្រួសារ ពង្រឹងសហគមន៍ និងវឌ្ឍនភាពសង្គម ជំរុញការអភិវឌ្ឍប្រកបដោយចីរភាព ពិធីអបអរសាទរខួបលើកទី ១១៥ ទិវានារីអន្តរជាតិ៨មីនា (៥-មីនា-២០២៦) ស្ថិរភាព​សង្គម និង​វិបុល​ភាព​សង្គម៕

អត្ថបទ ៖ វិមាន