វ៉ាង ស្រីណូ ប្រតិកម្មតបអ្នករិះគន់ ដែលយល់ខុសរឿងសុំជំនួយព្យាបាលបងប្រុស

អតីតតារាសម្តែង វ៉ាង ស្រីណូបានបង្ហាញការហួសចិត្ត និងបញ្ចេញប្រតិកម្មឆ្លើយតបភ្លាមៗ បន្ទាប់ពីមានការរិះគន់ថា ខ្លួនលើកដៃសុំជំនួយព្យាបាលជំងឺបេះដូងបងប្រុសដែលកំពុងឈឺធ្ងន់ ទាំងដែលការពិត អ្នកនាងគ្រាន់តែស្នើសុំឱ្យមហាជនជួយគាំទ្រដោយការទិញទំនិញ (ឡៃឡុង) របស់ខ្លួនប៉ុណ្ណោះ។

អតីតតារាស្រីរូបនេះ បញ្ជាក់ថា ខ្លួនមានអារម្មណ៍ហួសចិត្ត និងឈឺចាប់ចំពោះមតិអវិជ្ជមានមួយចំនួន ដែលចូលមករិះគន់ ខណៈដែលខ្លួនកំពុងប្រឈមមុខនឹងបញ្ហាគ្រួសារយ៉ាងលំបាក។ អ្នកបន្ថែមថា ខ្លួនបានខិតខំប្រឹងប្រែងលក់ទំនិញតាមអនឡាញ ដើម្បីរកថវិកាជួយសង្គ្រោះជីវិតបងប្រុស ដែលត្រូវការវះកាត់បេះដូងជាលើកទី២។

ក្នុងការឆ្លើយតប វ៉ាង ស្រីណូ បានគូសបញ្ជាក់ដែរថា ការសំពះសុំជំនួយរបស់ខ្លួន គឺគ្រាន់តែស្នើសុំឱ្យមហាជនជួយគាំទ្រដោយការទិញទំនិញ (ឡាយឡុង) របស់ខ្លួនប៉ុណ្ណោះ មិនមែនជាការសុំប្រាក់ឧបត្ថម្ភដោយផ្ទាល់ឡើយ។ អ្នកនាងថា “បើមិនទិញខ្ញុំក៏មិនខឹងដែរ ហើយហេតុអ្វីត្រូវមករិះគន់ខ្ញុំនៅពេលដែលខ្ញុំកំពុងមានទុក្ខបែបនេះ”។

លើសពីនេះ តារាស្រីរូបនេះក៏បានឆ្លើយតបទៅនឹងមតិខ្លះៗដែលសន្និដ្ឋានថាខ្លួនមានជីវភាពល្អ និងមិនគួរត្រូវការជំនួយនោះ ដោយបញ្ជាក់ថា “ជីវិតមនុស្សមិនអាចវាស់វែងតាមរូបភាពខាងក្រៅបានឡើយ ហើយមនុស្សគ្រប់រូបសុទ្ធតែអាចជួបវិបត្តិដោយមិនបានរំពឹងទុក”។

គួរឱ្យដឹងថា បច្ចុប្បន្ន វ៉ាង ស្រីណូ កំពុងរស់នៅសហរដ្ឋអាមេរិក និងប្រកបអាជីវកម្មលក់ទំនិញអនឡាញ ខណៈនាងក៏ជាស្នូលសំខាន់ក្នុងការទទួលខុសត្រូវលើគ្រួសារ។ ថ្មីៗនេះ បងប្រុសរបស់នាងត្រូវការវះកាត់បេះដូងជាលើកទី២ ដែលជាមូលហេតុនាំឱ្យនាងត្រូវខិតខំរកថវិកាជាបន្ទាន់៕ ដោយ៖ ចាន់រ៉ា