កីឡា

នារីពូកែដៃ Jackie ប្រាប់យុទ្ធសាស្ត្រយកឈ្នះ Ekaterina ថ្ងៃទី២៩មេសានេះ

បានផុស

៤ years មុន

នៅ

ថ្ងៃអង្គារ ២៧ មេសា ២០២១

ដោយ

កីឡាការិនីហ្វីលីពីន-អាមេរិក Jackie Buntan ត្រូវឡើងសង្វៀន ONE ជាលើកទី២នាចុងខែមេសានេះ បន្ទាប់ពីបង្កការចាប់អារម្មណ៍យ៉ាងខ្លាំងក្នុងការប្រកួតលើកទី១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃព្រហស្បតិ៍ ទី២៩ ខែមេសា ឆ្នាំ២០២១នេះ Jackie Buntan ត្រូវតទល់នឹងកីឡាការិនី Ekaterina Vandaryeva នៅព្រឹត្តិការណ៍ស៊េរីទី៤ “ONE on TNT IV”ដែលផ្សាយទៅកាន់ម៉ោងពិសេសនៅអាមេរិក។

អ្នកតាមដានប្រដាល់ទូទាំងពិភពលោកបានចាប់អារម្មណ៍យ៉ាងខ្លាំងទៅលើកីឡាការិនីវ័យក្មេង Buntan ដែលបានប្រកួតលើកទី១ឈ្នះដាច់លើកីឡាការិនីថៃកំពុងល្បីឈ្មោះ Wondergirl Fairtex កាលខែកុម្ភៈកន្លងទៅ។ ពេលនោះ នាងវ៉ៃពោរពេញដោយបច្ចេកទេសគឺចូល ចេញ និងការពារបានយ៉ាងលឿនរហ័ស ហើយកណ្តាប់ទាំងឆ្វេង និងស្តាំចេញយ៉ាងល្អឥតខ្ចោះ។ សូម្បីតែជើង នាងក៏ទាត់បានល្អថែមទៀត។ នាងបានវ៉ៃកីឡាការិនីថៃ Wondergirl ឲ្យដួលអាជ្ញាកណ្តាលរាប់៨នៅទឹកទី១ និងនៅទី៣ចេញអាវុធផ្ទួនៗស្ទើរតែឲ្យកីឡាការិនីថៃសន្លប់ទៅហើយ។

តាមរយៈជំនាញដ៏ល្អឥតខ្ចោះនោះ អ្នកស្នេហាប្រដាល់ទូទាំងពិភពលោកពិតជាចង់ឃើញ Jackie Buntan ឡើងប្រកួតទៀតណាស់។ ទីបំផុត មិនដល់ជាង២ខែផង នាងទទួលបានឱកាសទៀតហើយដោយត្រូវជួបកីឡាការិនីបេឡារុស្ស Ekaterina។

Jackie បានប្រាប់ថា ដៃគូខាងមុខនេះមានកម្ពស់ខ្ពស់ និងទាត់ជើងឆ្វេងបានល្អ ដូច្នេះនាងត្រូវតែរៀបចំផែនការប្រកួតឲ្យច្បាស់លាស់ទើបអាចយកឈ្នះបាន។ នាងបានពន្យល់ថា ៖«ខ្ញុំជឿថា លក្ខណៈពិសេសដែលខ្ញុំអាចយកប្រៀប Ekaterina គឺចូលកៀក។ យុទ្ធសាស្ត្ររបស់ខ្ញុំគឺចូលឲ្យកៀក និងចេញកណ្តាប់ដៃវ៉ៃឲ្យលឿនៗ ហើយដកថយវិញដើម្បីការពារ»។ «ខ្ញុំឃើញគាត់ប្រកួតជាមួ Janet ដូច្នេះខ្ញុំដឹងពីអ្វីដែលជាចំណុចល្អរបស់គាត់។ ខ្ញុំជឿថា ល្បឿនកណ្តាប់ដៃឆ្វេងស្តាំ និងការទាត់របស់ខ្ញុំជាកត្តាសំខាន់ដើម្បីឲ្យឈ្នះការប្រកួតមួយនេះ»។ នាងបានសង្កត់ធ្ងន់។

Jackie Buntan បានបន្ថែមថា នាងបានយល់ច្បាស់ពីអាវុធរបស់ដៃគូ ដូច្នេះប្រសិនបើនាងធ្វេសប្រហែសនឹងនាំឲ្យមានផលមិនល្អសម្រាប់ការប្រកួតនេះ។ សម្រាប់ការប្រកួតនេះ នាង Jackie Buntan មានកត្តាពីរចំណុចទៀតដែលធ្វើឲ្យនាងមានទំនុកចិត្តខ្លាំង។ ទី១ ការផ្តល់ដំបូន្មានពីជើងឯកពិភពលោក Todd ដែលជាមិត្តរួមក្លឹប និងទី២ជ័យជម្នះលើ Wondergirl ពីការប្រកួតលើកទី១។

ឱកាសមាសអាចនឹងស្ថិតនៅចំពោះមុខ ប្រសិនបើកីឡាការិនីហ្វីលីពីន-អាមេរិករូបនេះទទួលបានជ័យជម្នះនាព្រឹកថ្ងៃព្រហស្បតិ៍នេះ នោះគឺឱកាសប្រកួតដណ្តើមខ្សែក្រវាត់ពិភពលោក៕