ព័ត៌មានអន្ដរជាតិ

ផេះផ្ទុះចេញពីភ្នំភ្លើង Mayon នៅហ្វីលីពីន គ្រប់ដណ្តប់លើផ្ទៃដីជាង ៨ ៥០០ហិកតា

បានផុស

២ ខែ មុន

នៅ

ថ្ងៃពុធ ៦ ឧសភា ២០២៦

ដោយ

ទីភ្នាក់ងារអវកាសហ្វីលីពីន (PhilSA) បានចេញផ្សាយផែនទីមួយ បង្ហាញតំបន់គ្របដណ្តប់ដោយស្រទាប់ផេះពីចរន្តដង់ស៊ីតេ «pyroclastic» ក្នុងភ្នំភ្លើង Mayon កាលពីថ្ងៃសៅរ៍ថា មានផ្ទៃដីយ៉ាងហោចណាស់ ៨ ៥៤៤ហិកតា ឬជាងពាក់កណ្តាលនៃទីក្រុង Quezon ត្រូវបានគ្របដណ្តប់ដោយផេះពីសកម្មភាពរបស់ភ្នំភ្លើង ហៅថា «uson» ។

យោងតាមសារព័ត៌មាន The Star ចុះផ្សាយថ្ងៃទី៦ ខែឧសភា ឆ្នាំ២០២៦ ឱ្យដឹងថា ចរន្តដង់ស៊ីតេ «pyroclastic» គឺជាលំហូរលឿននៃឧស្ម័នភ្នំភ្លើងក្តៅ ផេះ និងបំណែកថ្មធ្លាក់ចុះពីជម្រាលភ្នំភ្លើង អំឡុងពេលផ្ទុះ។

ភ្នំភ្លើងរបស់ហ្វីលីពីនកំពុងផ្ទុះ។ រូបភាព៖ NG

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិទ្យាស្ថានភ្នំភ្លើងនិងរញ្ជួយដីហ្វីលីពីនលើកឡើងថា៖ «ផេះដែលផ្សំឡើងពីភាគល្អិតភ្នំភ្លើងមានអង្កត់ផ្ចិតតិចជាង ២មីលីម៉ែត្រនោះ គឺគ្រោះថ្នាក់ដល់សុខភាព។ វាក៏គ្រោះថ្នាក់ដល់យន្តហោះ និងគ្រឿងចក្រឧស្សាហកម្មផ្សេងទៀតផងដែរ ដូចជាគ្រឿងចក្រសម្រាប់ដឹកជញ្ជូន និងផលិតថាមពលជាដើម»។

ទីភ្នាក់ងារស្ទង់មតិភូមិសាស្ត្រសហរដ្ឋអាមេរិក អះអាងថា៖ « ផេះដែលធ្លាក់អាចរំខានសកម្មភាពនានា ដោយបំផ្លាញអគារ ការដឹកជញ្ជូន ប្រព័ន្ធទឹក ការផ្គត់ផ្គង់ថាមពល ឧបករណ៍ទំនាក់ទំនង កសិកម្ម និងផលិតកម្មបឋមយ៉ាងសំខាន់ សូម្បីតែកម្រាស់ត្រឹមតែពីរបីមីលីម៉ែត្រ ឬត្រឹមអ៊ីញក៏ដោយ»។

យ៉ាងណា រហូតមកដល់ពេលនេះ ផេះដែលធ្លាក់ពីភ្នំភ្លើង Mayon បានប៉ះពាល់ដល់គ្រួសារចំនួន ៣០ ៥២២គ្រួសារ ឬមនុស្ស ១០២ ៤០៦នាក់ នៅក្នុងភូមិចំនួន៨៧ ក្នុងតំបន់ Bicol គិតត្រឹមថ្ងៃចន្ទ ថ្ងៃទី៤ ខែឧសភា ឆ្នាំ២០២៦។ នេះបើយោងតាមការិយាល័យការពារជនស៊ីវិលហ្វីលីពីន។

ប្រែសម្រួល៖ ណឺ មិនា