ព័ត៌មានជាតិ

រដ្ឋសភាអនុម័តសេចក្ដីព្រាងច្បាប់ស្ដីពីកាតព្វកិច្ចយោធាដោយសំឡេងគាំទ្រទាំងស្រុងពីសមាជិកសភាដែលមានវត្តមាន

បានផុស

៤ សប្តាហ៍ មុន

នៅ

ថ្ងៃអង្គារ ១២ ឧសភា ២០២៦

ដោយ

រដ្ឋសភាកម្ពុជាបានអនុម័តសេចក្ដីព្រាងច្បាប់ស្ដីពីកាតព្វកិច្ចយោធាក្នុងសំឡេង១១៤ លើ១១៤សំឡេងនៃសមាជិកដែលមានវត្តមានក្នុងកិច្ចប្រជុំវិសាមញ្ញព្រឹកថ្ងៃទី១២ ខែឧសភា ឆ្នាំ២០២៦នេះ។ ការអនុម័តត្រូវបញ្ចប់ទាំងស្រុងនៅម៉ោង១១ និង៤៥នាទីព្រឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការកត់សម្គាល់នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ក៏បានឡើងថ្លែងហេតុក្នុងកិច្ចប្រជុំព្រឹកនេះផងដែរ។ សម្ដេចបានលើកឡើងថា ការរៀបចំច្បាប់នេះគឺមិនមែនជាការគំរាមកំហែងប្រទេសណាមួយទេ តែជាការពង្រឹងស្មារតីជាតិខ្ពស់ ក៏ដូចជាការពង្រឹងថែរក្សាសន្ដិភាពជាតិឱ្យរឹងមាំ។

សម្ដេចថា៖ «ពាក្យថាសន្តិភាពដោយកម្លាំងជារបត់ថ្មី ដែលកម្ពុជាស្រលាញ់ ឬមិនស្រលាញ់ពាក្យនេះ យើងត្រូវតែទទួលស្គាល់វាជាការពិត។ យើងត្រូវតែរឹងមាំខ្លួនឯង! ការស្វែងរកសន្តិភាព ថែរក្សាសន្តិភាពមិនអាចសុំពីអ្នកណាបានទេ»។

ជាមួយគ្នានេះសម្ដេចធិបតីបានបញ្ជាក់ផងដែរថា កម្ពុជាមានច្បាប់កាតព្វកិច្ចយោធាតាំងពីឆ្នាំ២០០៦ តែមានមូលហេតុមួយចំនួនដែលមិនអាចអនុវត្តបានដោយសារ ស្ថានភាពមិនចាំបាច់ ត្រូវកាត់ចំណាយដើម្បីផ្ដោតលើការអភិវឌ្ឍសង្គមសេដ្ឋកិច្ចរបស់ប្រជាជន ហើយរដ្ឋាភិបាលឱ្យតម្លៃលើសន្តិភាព និងជឿជាក់លើប្រព័ន្ធពហុភាគីនិយម សណ្ដាប់ធ្នាប់អន្តរជាតិផ្អែកលើច្បាប់ និងធម្មនុញ្ញសហប្រជាជាតិ។ ទោះជាយ៉ាងណាស្ថានភាពពិភពលោកបច្ចុប្បន្ននេះធ្វើឱ្យរដ្ឋាភិបាលត្រូវមានការត្រៀមខ្លួន។

តាមច្បាប់ស្ដីពីកាតព្វកិច្ចយោធាដែលកំពុងឆ្លងនៅស្ថាប័ននីតិបញ្ញាត្តិនេះពលរដ្ឋខ្មែរភេទប្រុសចាប់ពី១៨ ដល់ ២៥ឆ្នាំ គឺអ្នកដែលមានភារកិច្ចចាំបាច់ដែលត្រូវបំពេញកាតព្វកិច្ចយោធា រយៈពេល ២៤ ខែ។ ចំពោះស្ត្រី មិនតម្រូវជាកាតព្វកិច្ចឡើយ ប៉ុន្តែត្រូវបានលើកទឹកចិត្តឱ្យចូលរួមតាមគោលការណ៍ស្ម័គ្រចិត្ត។ កាតព្វកិច្ចយោធានេះបានលើកលែងចំពោះព្រះសង្ឃ, បព្វជិតសាសនា, អ្នកមានពិការភាព និងអ្នកជំនាញជាន់ខ្ពស់ដែលកំពុងបំពេញបេសកកម្មសំខាន់ៗជូនជាតិ។

សូមជម្រាបជូនផងដែរថា សេចក្ដីព្រាងច្បាប់ស្ដីពីកាតព្វកិច្ចយោធាត្រូវបានគណៈរដ្ឋមន្ត្រីកម្ពុជាសម្រេចអនុម័តកាលពីថ្ងៃទី២៣ ខែមេសាកន្លងទៅដែលមាន៨ជំពូក និង២០មាត្រា។ បន្ទាប់ពីត្រូវបានសភាអនុម័តនៅថ្ងៃនេះ សេចក្ដីព្រាងនេះនឹងត្រូវបញ្ជូនទៅព្រឹទ្ធសភាដើម្បីពិភាក្សាយល់ព្រម មុននឹងទូលថ្វាយព្រះមហាក្សត្រឡាយព្រះហស្តលេខា ដាក់ឱ្យប្រើប្រាស់នាពេលខាងមុខ៕

អត្ថបទដោយ ហ៊ុន សិរីវឌ្ឍន៍