សេដ្ឋកិច្ចស្រុតចុះខ្លាំង! ទំនុកចិត្តអ្នកប្រើប្រាស់ថៃ ដាំក្បាលចុះទាបបំផុតមិនធ្លាប់​មាន

យោងតាមរបាយការណ៍សន្ទស្សន៍ទំនុកចិត្តអ្នកប្រើប្រាស់សកលរបស់ក្រុមហ៊ុន Ipsos នៅក្នុងខែមេសាកន្លងទៅនេះ ទំនុកចិត្តរបស់អ្នកប្រើប្រាស់ថៃ បានធ្លាក់ចុះយ៉ាងគំហុក រហូតឈានដល់ដំណាក់កាលវិបត្តិ ដែលនេះជាការធ្លាក់ចុះប្រចាំខែយ៉ាង​ខ្លាំង​បំផុតមិនធ្លាប់មាន ទាំងនៅក្នុងកម្រិតសកល និងនៅក្នុងតំបន់អាស៊ីប៉ាស៊ីហ្វិក។

សារព័ត៌មានបាងកក​ប៉ុស្តិ៍ បាន​ចុះផ្សាយ​​នា​ថ្ងៃទី​១៩ ខែ​​ឧសភា ឆ្នាំ​២០២៦ ​ថា វិបត្តិនេះ បានកើតឡើង ដោយសារតែភាពមិនច្បាស់លាស់នៃសេដ្ឋកិច្ច ភាពតានតឹងផ្នែកភូមិសាស្ត្រនយោបាយ តម្លៃជីវភាពរស់នៅដែលកាន់តែហក់ឡើងខ្ពស់ ព្រមទាំងការមិនពេញចិត្តរបស់ប្រជាពលរដ្ឋ ទៅ​លើ​រដ្ឋាភិបាល ក្នុងការដោះស្រាយបញ្ហាសេដ្ឋកិច្ច ដែលកត្តាទាំងអស់នេះបានធ្វើឱ្យប៉ះពាល់ដល់អារម្មណ៍ និងការគិតរបស់សាធារណជនយ៉ាងខ្លាំង។ ផ្អែកលើការរកឃើញនេះ គេរំពឹងថា ការប្រុងប្រយ័ត្នខ្ពស់ ក្នុងការចំណាយរបស់អ្នកប្រើប្រាស់ នឹងបន្តអូសបន្លាយរហូតដល់ដំណាច់​ឆ្នាំនេះតែម្តង។

លោកស្រី Pimtai Suwannasuk ដែលជាអ្នកគ្រប់គ្រងជាន់ខ្ពស់ផ្នែកអតិថិជនរបស់ក្រុមហ៊ុន Ipsos ប្រចាំប្រទេសថៃ បានលើកឡើងថា នេះជាលើកទីមួយហើយ ដែលការស្ទង់មតិបានបង្ហាញថា ទំនុកចិត្តរបស់អ្នកប្រើប្រាស់ថៃ បានធ្លាក់ចុះដល់កម្រិតទាបបំផុត ក្នុងរយៈពេលបួនឆ្នាំចុង​ក្រោយ។ សន្ទស្សន៍រួមរបស់ប្រទេសថៃ បានធ្លាក់ចុះមកត្រឹម ៤៥.៥ ពិន្ទុ ពោលគឺថយចុះអស់ ១០.៩ ពិន្ទុ ដែលជាការធ្លាក់ចុះធំបំផុត នៅក្នុងពិភពលោក ក្នុងរយៈពេលមួយខែចុងក្រោយនេះ ហើយក៏ជាការធ្លាក់ចុះដ៏អាក្រក់បំផុតលំដាប់ទីពីររបស់ប្រទេសថៃ បន្ទាប់ពីវិបត្តិជំងឺកូវីដ១៩ កាលពីឆ្នាំ ២០២០។ លោកស្រីបានពន្យល់ថា កាលពីចុងឆ្នាំមុន អារម្មណ៍របស់អ្នកប្រើប្រាស់ ហាក់បីដូចជាមានភាពវិជ្ជមានច្រើន ដោយសារតែកម្មវិធីគាំទ្រពីរដ្ឋ និងការបោះឆ្នោតដែលខិតជិតមកដល់ ប៉ុន្តែនៅក្នុងខែមេសានេះ ទំនុកចិត្តបានរលាយបាត់ទៅវិញ ដោយសារតែប្រជាពលរដ្ឋ មិនបានឃើញមានគោលនយោបាយជាក់ស្តែងណាមួយ ដើម្បីដោះស្រាយបញ្ហាប្រឈមសេដ្ឋកិច្ចនោះឡើយ។

តាមទិន្នន័យនៃការស្ទង់មតិ ប្រជាជនថៃរហូតដល់ ៧១% បានពណ៌នាអំពីស្ថានភាពសេដ្ឋកិច្ចបច្ចុប្បន្នថា «អាក្រក់» ដែលចំនួននេះ បានកើនឡើងរហូតដល់ ១៧% ក្នុងរយៈពេលតែមួយខែប៉ុណ្ណោះ ដែលវាស្តែងឱ្យឃើញពីការព្រួយបារម្ភ ដែលកំពុងតែកើនឡើងយ៉ាងឆាប់រហ័ស។ ជាងពាក់កណ្តាលនៃប្រជាជនថៃ មានការរុញរា ក្នុងការចំណាយលុយលើទំនិញ ដែលមានតម្លៃថ្លៃ និងសម្ភារៈប្រើប្រាស់ក្នុងផ្ទះ ហើយប្រហែល ៦៦% បានកាត់បន្ថយការចំណាយ និងមានការប្រុងប្រយ័ត្នខ្ពស់ជាងមុន។ ជាមួយគ្នានេះដែរ មានប្រជាជនជិតពាក់កណ្តាល នៅតែបារម្ភពីភាពមិនប្រាកដប្រជានៃការងាររបស់ពួកគេ ហើយ ៥៦% ផ្សេងទៀត មានអារម្មណ៍មិនសូវមានទំនុកចិត្តលើការវិនិយោគនាពេលអនាគត លុយសន្សំសម្រាប់ពេលចូលនិវត្តន៍ និងការសិក្សារបស់កូនៗនោះឡើយ។

អ្វីដែលគួរឱ្យកត់សម្គាល់នោះគឺ សូម្បីតែគ្រួសារដែលមានចំណូលខ្ពស់ ក៏ចាប់ផ្តើមមានអារម្មណ៍មិនសូវមានផាសុកភាព ក្នុងការចំណាយលុយកាក់ដែរ ដែលនេះជាលើកទីមួយហើយ ដែលក្រុមអ្នកមានចំណូលខ្ពស់ មានការបារម្ភខ្លាំងជាងក្រុមអ្នកមានចំណូលមធ្យម និងទាបទៅទៀត ព្រោះពួកគេអាចមើលឃើញរូបភាពវែងឆ្ងាយថា សេដ្ឋកិច្ចកំពុងតែដើរទៅរកផ្លូវកាន់តែដុនដាប។ នៅក្នុងរបាយការណ៍ដដែលនេះ ក៏បានបង្ហាញផងដែរថា បញ្ហាធំបំផុត ដែលប្រជាជនថៃព្រួយបារម្ភបំផុតនោះគឺ «អំពើពុករលួយ» ដែលមានរហូតដល់ ៤៩% ខណៈដែលជាងពាក់កណ្តាលនៃអ្នកចូលរួមការស្ទង់មតិមានអារម្មណ៍ថា ប្រទេសជាតិកំពុងតែដើរទៅរកទិសដៅខុសហើយ។ បញ្ហាអតិផរណា (ទំនិញឡើងថ្លៃ) ក៏បានហក់មកចូលក្នុងចំណោមការព្រួយបារម្ភកំពូលទាំងប្រាំវិញដែរ រួមជាមួយនឹងបញ្ហាភាពក្រីក្រ ជម្លោះអន្តរជាតិ និងបញ្ហាបទល្មើសផ្សេងៗ៕

ប្រែសម្រួល៖ ឈាង