សេដ្ឋកិច្ច

ចំណូលកំពង់ផែព្រះសីហនុសម្រេចបានជាង ៤២,៥ លានដុល្លារ កើនជាង ៥០% នៅត្រីមាសទី១ ឆ្នាំនេះ

បានផុស

១ ខែ មុន

នៅ

ថ្ងៃអង្គារ ១៩ ឧសភា ២០២៦

ដោយ

កំពង់ផែស្វយ័តក្រុងព្រះសីហនុ (PAS) រកចំណូលបានប្រមាណ ៤២,៥ លានដុល្លារ (១៧៤ ពាន់លានរៀល) នៅក្នុងត្រីមាសទី១ ២០២៦ កើនឡើង ៥១,៨៩% ធៀបនឹងរយៈពេលដូចគ្នាកាលពីឆ្នាំមុន និងប្រាក់ចំណេញសុទ្ធក្រោយបង់ពន្ធប្រមាណ ១៥,១៥ លានដុល្លារ (៦២ ពាន់លានរៀល) កើនឡើង ៤៩១%។ នេះបើយោងតាមរបាយការណ៍របស់កំពង់ផែស្វយ័តក្រុងព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក លូ គឹមឈន់ ប្រធានអគ្គនាយកកំពង់ផែស្វយ័តក្រុងព្រះសីហនុ មានប្រសាសន៍ថា កំពង់ផែដើរតួនាទីជាច្រកនាំទំនិញចេញ-ចូលដ៏សំខាន់ អាចដោះស្រាយបញ្ហាប្រឈម និងជំរុញកំណើនសេដ្ឋកិច្ច។

លោក លូ គឹមឈន់ បន្ថែមថា បរិមាណកុតឺន័រឆ្លងកាត់នៅក្នុងត្រីមាសទី១ ឆ្នាំ ២០២៦ មានចំនួន ៣៧៣ ៧៤៨ TEUs កើនឡើង ៣៨,២១% ខណៈនាវាឆ្លងកាត់មានចំនួន ៤៩៤ គ្រឿង កើនឡើង១៣,៧៩% ឆ្លុះបញ្ចាំងពីនិន្នាការនាវាចូលចតផែកាន់តែមានទំហំធំ ជម្រៅទឹកជ្រៅ ធ្វើឱ្យថ្លៃដឹកជញ្ជូនតាមសមុទ្រកាន់តែមានភាពប្រកួតប្រជែង និងទាក់ទាញការវិនិយោគផ្សេងៗ។

លោកបានបន្តថា កំពង់ផែស្វយ័តក្រុងព្រះសីហនុប្ដេជ្ញាលើកកម្ពស់គុណភាពសេវាកម្មដោយបង្កើនការប្រើប្រាស់បរិវត្តកម្មឌីជីថល និងជំរុញការតភ្ជាប់ ដើម្បីប្រែក្លាយទៅជាច្រកទ្វារសម្រាប់ពាណិជ្ជកម្មអន្តរជាតិ និងទាក់ទាញការវិនិយោគនៅកម្ពុជា។

យោងតាមក្រសួងសាធារណការ និងដឹកជញ្ជូន នៅក្នុងឆ្នាំ២០២៥ កំពង់ផែស្វយ័តក្រុងព្រះសីហនុសម្រេចបានបរិមាណកុងតឺន័រឆ្លងកាត់ជាង ១,៣ លាន TEUs កើន ៣០,៥៧% និងទទួលបានចំណូលប្រមាណ ១៥០ លានដុល្លារ កើនឡើង ៣៥% ធៀបនឹងឆ្នាំ ២០២៤៕

អត្ថបទ៖ ឡេង ដេត

Related Topics:កំពង់ផែស្វយ័តក្រុងព្រះសីហនុ