សេដ្ឋកិច្ច

គម្រោងសាងសង់កំពង់ផែទឹកជ្រៅព្រះសីហនុ ជំហានទី២ ចាប់ផ្ដើមនាពាក់កណ្ដាលឆ្នាំនេះ

បានផុស

៣ ខែ មុន

នៅ

ថ្ងៃពុធ ៨ មេសា ២០២៦

ដោយ

គម្រោងអភិវឌ្ឍន៍កំពង់ផែទឹកជ្រៅក្រុងព្រះសីហនុជំហានទី២ គ្រោងចាប់ផ្ដើមសាងសង់នៅពាក់កណ្ដាល ឆ្នាំ ២០២៦នេះ ខណៈជំហានទី១ សម្រេចបានប្រមាណ ៦៥% ដែលគ្រោងបញ្ចប់នៅឆ្នាំ ២០២៧ លឿនជាងផែនការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក លូ គឹមឈន់ ប្រធានអគ្គនាយកកំពង់ផែស្វយ័តក្រុងព្រះសីហនុ មានប្រសាសន៍នៅថ្ងៃទី ០៦ ខែមេសា ២០២៦ថា នៅឆ្នាំក្រោយ កំពង់ផែទឹកជ្រៅជំហានទី១ នឹងសាងសង់រួចរាល់ នោះថ្លៃដឹកជញ្ជូនតាមសមុទ្រនៅក្នុងតំបន់អាស៊ីប៉ាស៊ីហ្វិក មកកម្ពុជានឹងថយចុះ ២០០ ដុល្លារ ក្នុងមួយកុងតឺន័រ។

លោក លូ គឹមឈន់ បានឱ្យដឹងថា នៅឆ្នាំ ២០២៩ នឹងបញ្ចប់ការសាងសង់គម្រោងកំពង់ផែទឹកជ្រៅជំហានទី២ ដែលកប៉ាល់នៅទូទាំងឥណ្ឌូប៉ាស៊ីហ្វិក ពោលគឺកប៉ាល់ដែលបើកតាមសមុទ្រឥណ្ឌូប៉ាស៊ីហ្វិក និងសមុទ្រឥណ្ឌា និងអាមេរិកអាចចូលចតបានដោយផ្ទាល់ ដែលនឹងកាត់បន្ថយថ្លៃដឹកជញ្ជូនបន្ថែមទៀត ធ្វើឱ្យមានការទាក់ទាញវិនិយោគិន និងជំរុញការធ្វើពាណិជ្ជកម្ម និងសេដ្ឋកិច្ច។

លោក លូ គឹមឈន់ បញ្ជាក់ថា៖ «កំពង់ផែទឹកជ្រៅជំហានទី២ ដែលមានជម្រៅទឹក ១៩,៥ ម៉ែត្រ កំពុងដាក់ដេញថ្លៃ ខែ ៦ ខែ ៧ ចាប់ផ្ដើមសាងសង់ ហើយជំហានទី៣ កំពុងគូប្លង់លម្អិតរួចហើយ រៀបចំឯកសារដាក់ដេញថ្លៃនៅចុងឆ្នាំនេះ»។

លោក លូ គឹមឈន់ បានបន្ថែមថា បច្ចុប្បកម្ពុជា មានកំពង់ផែកុងតឺន័រប្រវែងជាង ៦៥៣ ម៉ែត្រ ហើយបើបូកបន្ថែម ៣ ជំហាននេះទៀត នឹងឡើងដល់ជា ២ ពាន់ម៉ែត្រ ខណៈរាជរដ្ឋាភិបាលមានទិសដៅសាងសង់កំពង់ផែជាបន្តបន្ទាប់ឱ្យដើរស្របនឹងកំណើនសេដ្ឋកិច្ច។

តាមផែនការដំណើរការសាងសង់កំពង់ផែទឹកជ្រៅជំហានទី១ ដែលមានជម្រៅ ១៤,៥ ម៉ែត្រ គ្រោងបញ្ចប់ការសាងសង់នៅឆ្នាំ ២០២៨។

ការអភិវឌ្ឍចំណតផែកុងតឺន័រថ្មីទាំង ៣ ដំណាក់កាល នឹងប្រែក្លាយកំពង់ផែស្វយ័តក្រុងព្រះសីហនុទៅជាកំពង់ផែអន្តរជាតិខ្នាតធំ (Hub Port) ដែលអនុញ្ញាតឱ្យនាវាកុងតឺន័រធុនធំៗ មានផ្លូវដឹកជញ្ជូនពីគ្រប់តំបន់នៅក្នុងពិភពលោកអាចចូលចតបាន ដោយពុំមានឧបសគ្គលើជម្រៅទឹក៕