ម្ចាស់ការពារជើងឯកឆ្នាំចាស់ អាហ្សង់ទីន នឹងមិនលំបាកឆ្លងផុតវគ្គក្នុងពូល World Cup

ក្រុមពពកស អាហ្សង់ទីន ហាក់មិនពិបាកក្នុងការឆ្លតផុតវគ្គចែកពូលនៃព្រឹត្តិការណ៍បាល់ទាត់ជើងឯកពិភពលោក World Cup 2026 នេះនោះទេ បន្ទាប់ពីស្ថិតនៅពូល J ដែលភាគច្រើន ក្រុមគូប្រជែងជាក្រុមស្ថិតនៅកម្រិតមធ្យម។

ជម្រើសជាតិ អាហ្សង់ទីន បានស្ថិតនៅក្នុងពូល J ជាមួយនឹងក្រុមជម្រើសជាតិ អាល់ហ្ស៊េរី អូទ្រីស និងហ្ស៊កដានី។ ផ្អែកតាមចំណាត់ថ្នាក់ FIFA គឺ អាហ្សង់ទីន បច្ចុប្បន្នស្ថិតនៅលេខ ១ ដែលនៅលើគ្រប់ក្រុមក្នុងពូលទាំងអស់។ ងាកទៅកាន់ក្រុម អាល់ហ្ស៊េរី វិញ ស្ថិតនៅលេខ ២៨, អូទ្រីស ស្ថិតនៅលេខ ២៣ និង ហ្ស៊កដានី ស្ថិតនៅលេខ ៦៣។

ក្រុមពពកស ក្រោមការដឹកនាំដោយគ្រូបង្វឹកលោក Lionel Scaloni បានបង្ហាញការត្រៀមខ្លួនល្អគួរឱ្យកត់សម្គាល់ បន្ទាប់ពីការប្រកួតមិត្តភាព ៥ ប្រកួតចុងក្រោយ ពួកគេឈ្នះទាំង ៥ ប្រកួត។ ពួកគេបានឈ្នះក្រុម វេណេស៊ុយអេឡា ១-០, ឈ្នះក្រុម ព័រតូរីកូ, ឈ្នះក្រុម អង់ហ្គោឡា ២-០, ឈ្នះក្រុម ម៉ូរីតានី ២-១ និង ចុងក្រោយឈ្នះក្រុម ហ្សាំប៉ី ៥-០។

ក្រឡេកទៅមើលបញ្ជីឈ្មោះកីឡាករទាំង ២៦ នាក់វិញ​ អាហ្សង់ទីន ក៏បានកោះហៅកីឡាករពេញសាច់ផងដែរ ដែលមានទាំងកីឡាករវ័យក្មេងកំពុងឡើងជើង និងកីឡាករជើងចាស់សម្បូរបទពិសោធ។ ជាពិសេស​ ពួកគេមានខ្សែប្រយុទ្ធកំពូល Lionel Messi ដែលនឹងក្លាយជាអ្នកដឹកនាំក្រុមលេងនៅលើទីលាន។ ក្រៅពីនេះទៀត ពួកគេនៅមាន Julian Alvarez, Lautaro Martinez, Nico Paz, Enzo Fernandes និង Mac Allister ជាដើម។

យោងតាមស្ថិតិ និងសមាសភាពកីឡាករខាងលើ គឺ អាហ្សង់ទីន ត្រូវបានចាត់ទុក ជាក្រុមមានសមត្ថភាពដាច់គេនៅក្នុងពូលតែម្តង។ ប្រការនេះ បានបង្ហាញ ថា គ្មានក្រុមណាមួយ នឹងក្លាយជាឧបសគ្គធំ ដើម្បីរារាំងមិនឱ្យក្រុមការពារតំណែងជើងឯករូបនេះឡើងទៅកាន់វគ្គ ៣២ ក្រុមនោះទេ។

កាលវិភាគប្រកួតសម្រាប់ពូល J គឺ អាហ្សង់ទីន ត្រូវប្រកួតបើកឆាកជួបក្រុម អាល់ហ្ស៊េរី នៅថ្ងៃទី ១៧ ខែ មិថុនា ម៉ោង ៨ ព្រឹក។ ចំណែកមួយគូទៀត ក្រុមអូទ្រីស ត្រូវជួប ហ្ស៊កដានី នៅថ្ងៃដដែល ម៉ោង ១១ ព្រឹក។ ឈានចូលប្រកួតទី ២ ក្រុម អាហ្សង់ទីន ត្រូវជួបក្រុមអូទ្រីស នៅថ្ងៃទី ២៣ ខែ មិថុនា ម៉ោង ១២ រំលងអាធ្រាត្រ។ រីឯ ហ្ស៊កដានី ត្រូវជួបក្រុម អាល់ហ្ស៊េរី នៅថ្ងៃដដែលម៉ោង ១០ ព្រឹក។

ចុងក្រោយ ជាការប្រកួតទី ៣ ក្រុម អាល់ហ្ស៊រី ត្រូវជួប អូទ្រីស និង ហ្ស៊កដានី ត្រូវជួបក្រុម អាហ្សង់ទីន នៅថ្ងៃទី ២៨ ខែ មិថុនា ម៉ោង ៩ ព្រឹកដំណាលគ្នា៕

អត្ថបទ​៖ សេម កុសល