ព័ត៌មានអន្ដរជាតិ

តួលេខអ្នកស្លាប់កើនដល់ជិត ២ ០០០នាក់ហើយ ព្រោះគ្រោះរញ្ជួយដីនៅវ៉េណេស៊ុយអេឡា

បានផុស

២៣ វិនាទី មុន

នៅ

ថ្ងៃពុធ ១ កក្កដា ២០២៦

ដោយ

Chheang

ក្រោយមហន្តរាយរញ្ជួយដីដ៏ខ្លាំងក្លាពីរដងជាប់ៗគ្នា បានវាយប្រហារប្រទេសវ៉េណេស៊ុយអេឡា កាលពីថ្ងៃទី២៤ ខែមិថុនា ឥឡូវនេះតួលេខអ្នកដែលបាត់បង់ជីវិត បានហក់ឡើងខ្ពស់រហូតដល់ ១ ៩៤៣នាក់ទៅហើយ គិតត្រឹមថ្ងៃទី១កក្កដា។ នេះបើយោងតាមការថ្លែងប្រាប់ទាំងក្តីក្តុកក្តួលរបស់លោក Jorge Rodriguez ប្រធានរដ្ឋសភាជាតិ តាមរយៈកញ្ចក់ទូរទស្សន៍រដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់សារព័ត៌មាន TRT World ក្រៅពីអ្នកស្លាប់ លោក Rodiguez ក៏បានបន្ថែមទៀតថា មានមនុស្សរហូតដល់ ១០ ៥៧១នាក់ផ្សេងទៀត ដែលកំពុងសម្រាកព្យាបាលរបួសនៅឯមន្ទីរពេទ្យនៅឡើយ។

នៅក្នុងគ្រាដ៏ខ្មៅងងឹតនេះ ក្រុមអ្នកសង្គ្រោះ កំពុងតែប្រជែងនឹងពេលវេលា ដើម្បីកាយគំនរបាក់បែកជួយអាយុជីវិតមនុស្ស។ មកទល់នឹងបច្ចុប្បន្ន ពួកគេអាចទាញមនុស្សចំនួន ៦ ៤៦១នាក់ ចេញពីមាត់ជ្រោះនៃសេចក្តីស្លាប់បានដោយជោគជ័យ។ យ៉ាងណាមិញ លោកប្រធានរដ្ឋសភា Jorge Rodriguez បានបង្ហើបថា ចំនួនអ្នកដែលរួចជីវិតពិតប្រាកដ អាចមានរហូតដល់ទៅជិត ២០ ០០០នាក់ឯណោះ។ តួលេខដ៏ច្រើននេះ គឺដោយសារតែនៅរដ្ឋ La Guaira ដែលជាកន្លែងរងគ្រោះធ្ងន់ធ្ងរជាងគេ មានពលរដ្ឋរាប់ពាន់នាក់ បាននាំគ្នាខំប្រឹងវារលូនចេញពីគំនរបែកបាក់ដោយខ្លួនឯង ខ្លះទៀតក៏ត្រូវ បានសាច់ញាតិ និងមិត្តភក្តិជិតខាងមកជួយកាយទាញចេញទាន់ពេលវេលា។

ការរញ្ជួយដីភ្លោះនៅវ៉េណេស៊ុយអេឡា មានកម្រិតធ្ងន់ធ្ងរបំផុត រហូតដល់ ៧.២រ៉ិចទ័រ និង ៧.៥រ៉ិចទ័រ។ ទំហំនៃការបំផ្លិចបំផ្លាញវិញ គឺធំធេងហួសពីការស្មាន ដោយសារតែទីភ្នាក់ងារអវកាស NASA បានពិនិត្យមើលពីលើមេឃមក ហើយរាយការណ៍ថា មានផ្ទះសម្បែង និងអគារប្រហែល ៥៨ ៨៧០ខ្នង ត្រូវបានបាក់រលំខ្ទេចខ្ទី ឬខូចខាតស្ទើរតែទាំងស្រុង ដោយបន្សល់ទុកត្រឹមតែគំនរផេះផង់ និងទឹកភ្នែកពលរដ្ឋរាប់សែននាក់ដែលគ្មានទីជម្រក៕