ព័ត៌មានជាតិ

ឧបនាយករដ្ឋមន្ត្រី ស៊ុន ចាន់ថុល ស្នើជប៉ុនគាំទ្រការបង្កើតតំបន់សេដ្ឋកិច្ចពិសេសជប៉ុននៅកម្ពុជា

បានផុស

២៤ វិនាទី មុន

នៅ

ថ្ងៃព្រហស្បតិ៍ ២ កក្កដា ២០២៦

ដោយ

អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លោកឧបនាយករដ្ឋមន្ត្រី ស៊ុន ចាន់ថុល បានស្នើដល់ប្រទេសជប៉ុនគាំទ្រក្នុងការបង្កើតតំបន់សេដ្ឋកិច្ចពិសេសជប៉ុននៅកម្ពុជា ដើម្បីបន្តពង្រីកសក្ដានុពលពាណិជ្ជកម្មនៅកម្ពុជា និងក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងពិធីដាក់ដំណើរការការផ្គុំ និងដំឡើងរថយន្ត Toyota ម៉ូដែលថ្មីនៅកម្ពុជា ព្រឹកថ្ងៃទី២ ខែកក្កដា ឆ្នាំ២០២៦ នៅរោងចក្រតូយូតាក្នុងតំបន់សេដ្ឋកិច្ចពិសេសភ្នំពេញ លោកឧបនាយករដ្ឋមន្ត្រី ស៊ុន ចាន់ថុល បានលើកឡើងថា គំនិតផ្ដួចផ្ដើមបង្កើតតំបន់សេដ្ឋកិច្ចពិសេសកម្ពុជាជប៉ុននេះត្រូវបានលើកឡើងដោយនាយករដ្ឋមន្ត្រីកម្ពុជាកាលពីខែធ្នូ ឆ្នាំ២០២៣ និងបានលើកឡើងបន្ថែមទៀតនៅខែវិច្ឆិកា ឆ្នាំ២០២៤ ដោយសម្ដេចធិបតី បានស្នើដល់វិទ្យាស្ថានសិក្សាសេដ្ឋកិច្ចអាស៊ាន និងអាស៊ីបូព៌ា ឱ្យសិក្សាឱ្យបានស៊ីជម្រៅលើការបង្កើតតំបន់សេដ្ឋកិច្ចពិសេសបៃតងកម្ពុជា-ជប៉ុន បន្ថែមទៀតដែលបម្រើនូវតម្រូវការជាក់ស្ដែង និងកម្រិតស្តង់ដារអ្នកវិនិយោគជប៉ុន ព្រមទាំងសម្រួលដល់ការវិនិយោគនៅកម្ពុជាផងដែរ។

លោកថា៖ «ឆ្លៀតក្នុងឱកាសនេះខ្ញុំសូមស្នើភាគីមិត្តជប៉ុនមេត្តាគាំទ្រ និងជំរុញឱ្យគម្រោងយុទ្ធសាស្ត្រនេះលេចចេញជារូបរាងក្នុងពេលឆាប់ៗខាងមុខ»។

ឯកអគ្គរាជទូតជប៉ុនប្រចាំកម្ពុជាលោក អ៊ូអិណុ អាត់ស៊ូស៊ី មានប្រសាសន៍ថា ទោះបីកម្ពុជាមានបញ្ហាព្រំដែនជាមួយថៃ និងបញ្ហា Scam ដែលធ្វើឱ្យប៉ះពាល់ដល់ការសម្លឹងមើលពីអ្នកវិនិយោគមកក្នុងប្រទេសនេះក្ដី តែការឈរជើងយ៉ាងរឹងមាំរបស់ក្រុមហ៊ុនជប៉ុនដូចជាតូយូតានៅពេលនេះ ជាការបង្ហាញថាប្រទេសកម្ពុជាគួរជាទីចាប់អារម្មណ៍នៃអ្នកវិនិយោគ។ លោកថាលោកនៅតែបន្តគាំទ្រឱ្យមានអ្នកវិនិយោគបន្ថែមទៀតមកកម្ពុជា។

លោកឧបនាយករដ្ឋមន្ត្រី ស៊ុន ចាន់ថុល បានថ្លែងអំណរគុណជប៉ុនដែលផ្ដល់ការទុកចិត្ត និងជំរុញការទូតសេដ្ឋកិច្ចដ៏រឹងមាំជាមួយកម្ពុជា។ លោកបានឱ្យដឹងថាទំហំពាណិជ្ជកម្មកម្ពុជា-ជប៉ុននៅឆ្នាំ២០២៥បានកើនឡើង ២,៥ពាន់លានដុល្លារអាមេរិក កើន១៧%បើធៀបនឹងឆ្នាំ២០២៤ ខណៈក្នុងត្រីមាសទី១ឆ្នាំ២០២៦ មានទំហំប្រមាណ ១,២ ពាន់លានដុល្លារ៕