ឥណ្ឌា ជួបគ្រោះអាសន្នធំមួយទៀត

ការិយាល័យអាកាសធាតុឥណ្ឌាបានព្រមានកាលពីថ្ងៃអាទិត្យទី២៣ខែឧសភាថា ព្យុះស៊ីក្លូនដ៏ខ្លាំងក្លាបំផុតមួយ កំពុងកកើតឡើងនៅឆ្នេរភាគខាងកើតប្រទេសឥណ្ឌា។ 

ការព្រមាននេះបានកើតឡើង ស្របពេលប្រទេសដែលរងគ្រោះដោយវីរុសកូវីដ-១៩មួយនេះ បានកត់ត្រាចំនួនអ្នកស្លាប់យ៉ាងច្រើនដោយសារតែព្យុះដ៏ធំមួយទៀត ដែលបង្កការបំផ្លិចបំផ្លាញភាគខាងលិចប្រទេសកាលពីសប្តាហ៍មុន។

នាយកដ្ឋានឧតុនិយមឥណ្ឌាបាននិយាយថា ព្យុះ Yaas កំពុងកកើតនៅក្នុងឈូងសមុទ្រ Bengal មុនពេលបង្កើនកម្លាំងនិងវាយប្រហាររដ្ឋភាគខាងលិច West Bengal និង Odisha នៅថ្ងៃពុធនេះ។

ព្យុះនេះអាចបញ្ចោញខ្យល់រហូតដល់ទៅ ១៦៥ទៅ១៨៥គីឡូម៉ែត្រក្នុងមួយម៉ោង​ ហើយត្រូវបានគេកំណត់ថា ជាព្យុះស៊ីក្លូនធ្ងន់ធ្ងរនិងអាក្រក់បំផុតប្រភេទទី៣។

នាយកដ្ឋានឧតុនិយម ក៏បានព្រមានពីរលកសមុទ្រ ដែលមានកម្ពស់រហូតដល់៤ម៉ែត្រ នៅតាមតំបន់ឆ្នេរផងដែរ។

លោកនាយករដ្ឋមន្រ្តី Narendra Modi បាននិយាយកាលពីថ្ងៃអាទិត្យថា លោកបានដឹកនាំកិច្ចប្រជុំមួយស្តីពីព្យុះដែលខិតជិតមកដល់នេះ ដោយក្រុមយោធានិងគ្រោះមហន្តរាយ ត្រូវបានដាក់ពង្រាយដើម្បីជួយដល់ការរៀបចំ និងប្រតិបត្តិការជួយសង្គ្រោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះស៊ីក្លូន Yaas នឹងវាយប្រហារភ្លាមៗបន្ទាប់ពីព្យុះស៊ីក្លូន Tauktae ដែលជាព្យុះត្រូពិកដ៏ធំដំបូងបង្អស់របស់ឥណ្ឌានៅរដូវកាលនេះ ដែលបានវាយប្រហាររដ្ឋភាគខាងលិច Gujarat។

កងទ័ពជើងទឹកបាននិយាយថា ចំនួនអ្នកស្លាប់ដោយសារព្យុះ Tauktae បានកើនឡើងដល់១៤០នាក់ គិតត្រឹមថ្ងៃអាទិត្យ៕

ប្រែសម្រួល៖ Vann Vann

ប្រភព៖ CNA

ចុចអាន៖ មិនទាន់ផុតទេ! ឥណ្ឌា កំពុងជួបព្យុះស៊ីក្លូនថ្មីមួយទៀត ខណៈអ្នកស្លាប់ដោយព្យុះ Tauktae កើនដល់ ១១០ នាក់