ព័ត៌មានអន្ដរជាតិ

វៀតណាមពង្រីកបំរាមកូវីដ ខណៈករណីឆ្លងថ្មីខ្ពស់ជាប់កំណត់ត្រា

បានផុស

៤ years មុន

នៅ

ថ្ងៃពុធ ២៦ ឧសភា ២០២១

ដោយ

ប្រទេសវៀតណាមបានពង្រីកបំរាមរបស់ខ្លួននៅភាគខាងជើងដែលជាតំបន់ឧស្សាហកម្មកាលពីម្សិលមិញដើម្បីទប់ស្កាត់កូវីដ-១៩ដែលកំពុងផ្ទុះខ្លាំង ខណៈអាជ្ញាធរបានរាយការណ៍ថា ករណីឆ្លងថ្មីប្រចាំថ្ងៃបានបំបែកកំណត់ត្រាដែលកើនឡើងទ្វេដង។

ក្រសួងសុខាភិបាលវៀតណាមបានប្រកាសថា ករណីឆ្លងកូវីដ-១៩ថ្មីនៅថ្ងៃអង្គារ៍មាន៤៥៧នាក់ ដែលជាចំនួនច្រើនបំផុតចាប់តាំងពីថ្ងៃទី១៦ ខែឧសភា ដែលមានត្រឹមតែ១៩០ករណីប៉ុណ្ណោះ ដែលការឆ្លងជាចង្កោមនៅរោងចក្រនៅងខេត្តពីរភាគខាងជើងប្រទេស។

ខេត្ត Bac Ninh ដែលជាកន្លែងរោងចក្រផលិតគ្រឿងអេឡិចត្រូនិក Samsung បានចាប់ផ្តើមដាក់បំរាមគោចរ និងការរឹតត្បិតចំពោះការធ្វើដំណើរផ្សេងៗដែលចាប់មានប្រសិទ្ធភាពពីថ្ងៃអង្គារ៍ ទី២៥ ខែឧសភា។ នេះបើតាមការផ្សាយរបស់សារព័ត៌មានរដ្ឋ។

បំរាមនេះ បន្ទាប់ពីការបិទឧទ្យានឧស្សាហកម្មចំនួន៤ជាបណ្តោះអាសន្នដែលមានទាំងរោងចក្រ Foxconn ចំនួន៣ដោយអាជ្ញាធរនៅខេត្ត Bac Giang។

ការផ្ទុះកូវីដ-១៩អាចនឹងក្លាយជាបញ្ហាប្រឈមដ៏ធំសម្រាប់ប្រទេសវៀតណាមដែលកាលពីដើមឆ្នាំមុនទប់ស្កាត់បានជោគជ័យដោយមានករណីឆ្លងតិច និងមានផលប៉ះពាល់ដល់សេដ្ឋកិច្ចតិចតូចប៉ុណ្ណោះ។

ខេត្ត Bac Ninh និងខេត្ត Bac Giang ជាកន្លែងនៃការផ្ទុះកូវីដ-១៩សាថ្មីដែលបានឆ្លងមនុស្សជាង២៨០០នាក់ចាប់តាំងពីចុងខែមេសាមក រាប់ទាំងកម្មកររោងចក្ររាប់រយនាក់ផង។

អាជ្ញាធរបាននិយាយថា ការផ្ទុះកូវីដ-១៩ឡើងវិញដែលជិតពាក់កណ្តាលនៃករណីឆ្លងទូទៅរបស់ប្រទេសវៀតណាមបានរាលដាលដល់៣០ទីក្រុងក្នុងចំណោមខេត្ត និងទីក្រុងចំនួន៦៣របស់ខ្លួន។

ទីក្រុង Hanoi កាលពីថ្ងៃអង្គារ៍បានបិទភោជនីយដ្ឋាន និងហាមជួបជុំនៅទីសាធារណៈ ក្នុងនោះរាប់ទាំងកន្លែងហាត់ប្រាណនៅតាមសួន។ Hanoi មានករណីឆ្លងកូវីដ-១៩ចំនួន២២០នាក់គិតចាប់ពីចុងខែមេសាមក។

ភាគច្រើននៃករណីឆ្លងកាលពីថ្ងៃអង្គារ៍គឺនៅរោងចក្រក្នុងខេត្ត Bac Giang ដែលអាជ្ញាធរបាននិយាយថា ការធ្វើតេស្តកំពុងបង្កើន និងកម្មករទាំងអស់ត្រូវដាក់ឲ្យនៅដាច់ដោយឡែក។

រហូតដល់ពេលនេះ ប្រទេសវៀតណាមមានករណីឆ្លងកូវីដ-១៩សរុបចំនួន៥៨៦០នាក់ និងស្លាប់៤៤នាក់៕

ប្រែសម្រួល៖ វីរបុត្រ
ប្រភព៖ bangkokpost