ព័ត៌មានជាតិ

ឃាត់ខ្លួនជនសង្ស័យ៧នាក់ ក្នុងករណីរារាំងការអនុវត្តវិធានការទប់ស្កាត់ជំងឺកូវីដ-១៩ និងលេងល្បែងស៊ីសង

បានផុស

៥ years មុន

នៅ

ថ្ងៃសុក្រ ១១ មិថុនា ២០២១

ដោយ

សមត្ថកិច្ចនគរបាលខេត្តកំពង់ចាម នៅថ្ងៃទី១០ ខែមិថុនា ឆ្នាំ២០២១ បានចុះបង្ក្រាបករណីរារាំងដល់ការអនុវត្តវិធានការទប់ស្កាត់ការឆ្លងរាលដាលនៃជំងឺកូវិដ១៩ និងលេងល្បែងស៊ីសងខុសច្បាប់ (លេងបៀរភ្នាល់ដាក់ប្រាក់) នៅចំណុចចម្ការស្វាយ ស្ថិតក្នុងភូមិដំណាក់ជ្រៃ ឃុំពាមវាជីកង ស្រុកកងមាស ខេត្តកំពង់ចាម ដោយធ្វើការឃាត់ខ្លួនជនសង្ស័យចំនួន៧នាក់ ។

តាមមន្ត្រីនគរបាល នៃស្នងការដ្ឋាននគរបាលខេត្តកំពង់ចាម បានឲ្យដឹងថា វេលាម៉ោង១៤និង៣០នាទី លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានបញ្ជាដល់កម្លាំងជំនាញរបស់ផែនការងារនគរបាលព្រហ្មទណ្ឌ សហការជាមួយកម្លាំងជំនាញ របស់អធិការដ្ឋាននគរបាលស្រុកកងមាស និងអាជ្ញាធរមូលដ្ឋាន ដោយក្នុងកិច្ចប្រតិបត្តិការក្រោមការដឹកនាំសម្របសម្រួលពីលោក សុធា ពិសិដ្ឋ ព្រះរាជអាជ្ញារង នៃអយ្យការអមសាលា ដំបូងខេត្តកំពង់ចាម ចុះបង្ក្រាប ករណីរារាំងដល់ការអនុវត្តវិធានការទប់ស្កាតការឆ្លងរាលដាល នៃជំងឺកូវីដ១៩ និងលេងល្បែងស៊ីសងខុសច្បាប់ នៅចំណុចចម្ការស្វាយ ស្ថិតក្នុងភូមិដំណាក់ជ្រៃ ឃុំពាមជីកង ស្រុកកងមាស ។

ក្រៅពីការឃាត់ខ្លួនជនសង្ស័យទាំង ០៧នាក់ សមត្ថកិច្ចក៏បានដកហូត វត្ថុតាងរួមមាន ៖ បៀរនីឡុងចំនួន២ហ៊ូ ទូរស័ព្ទដៃចំនួន០៤រឿង ម៉ូតូចំនួន ០៣គ្រឿង ប្រាក់រៀលចំនួន១.៣៥០.០០០រៀល ប្រាក់ដុល្លាចំនួន ៥០ដុល្លារអាមេរិក និងសម្ភារៈផ្សេងៗមួយចំនួនទៀត ។

បច្ចុប្បន្នជនសង្ស័យចំនួន ០៧នាក់ខាងលើ រួមនឹងវត្ថុតាង ត្រូវបានបញ្ចូនមកកាន់ស្នងការដ្ឋាននគរបាលខេត្តកំពង់ចាម ដើម្បីសាកសួរ និងកសាងសំណុំរឿងតាមនីតិវិធី ៕

អត្ថបទ ៖ ហុង ម៉េងហៀ