ព័ត៌មានជាតិ

ស្វាយរៀងបើកយុទ្ធនាការចាក់វ៉ាក់សាំងកូវីដ១៩ ជូនដល់ប្រជាពលរដ្ឋ កម្មករ កម្មការិនី ព្រះសង្ឃ នៅក្នុងក្រុង-ស្រុក៣ក្នុងខេត្ត

បានផុស

៥ years មុន

នៅ

ថ្ងៃអង្គារ ២៩ មិថុនា ២០២១

ដោយ

លោក ម៉ែន វិបល អភិបាល នៃគណៈអភិបាលខេត្តស្វាយរៀង នៅព្រឹកទី២៩ ខែមិថុនា ឆ្នាំ២០២១នេះបានអញ្ជើញចុះពិនិត្យក្នុងកម្មវិធីបើកយុទ្ធនាការចាក់វ៉ាក់សាំងការពារជំងឺឆ្លងកូវីដ១៩ ក្រោមអធិបតីភាពលោក នាយឧត្តមសេនីយ៍ មាស សាវ៉ន អគ្គនាយក អគ្គនាយកដ្ឋានយោធសេវា ក្រសួងការពារជាតិ ជូនដល់ប្រជាពលរដ្ឋ និងកម្មករ កម្មការិនី ព្រះសង្ឃ ក្នុងភូមិសាស្ត្រក្រុងបាវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសនោះលោក ម៉ែន វិបុល អភិបាល នៃគណៈអភិបាលខេត្តស្វាយរៀងបញ្ជាក់ថា យុទ្ធនាការចាក់វ៉ាក់សាំងនាពេលនេះ គឺជាការគិតគូរក្រោមការយកចិត្តទុកដាក់បំផុតរបស់សម្តេចតេជោ ជូនប្រជាពលរដ្ឋឱ្យមានសុខភាពមាំមួន ក្នុងការបង្កើនភាពស៊ាំ និងអង់ទីគ័រការពារប្រឆាំងនឹងជំងឺឆ្លងរាតត្បាតកូវីដ-១៩ ជាពិសេសវ៉ាក់សាំងអាចជួយកាត់បន្ថយការឆ្លងរាលដាលបានមួយផ្នែកធំ ទោះបីវាមានការឆ្លង ក៏អ្នកជំងឺមិនធ្ងន់ធ្ងរ មិនមានហានិភ័យដល់អាយុជីវិតនោះឡើយ។

លោកអភិបាលខេត្តបានបន្តថា ដំណើរការចាក់វ៉ាក់សាំងនៅក្នុងខេត្តស្វាយរៀង នាថ្ងៃនេះ មានចំនួន៣ក្រុង-ស្រុករួមមាន៖ ១.ក្រុងបាវិត មានចំនួន២ទីតាំង ទទួលខុសត្រូវចាក់វ៉ាក់សាំងដោយក្រុមគ្រូពេទ្យ នៃក្រសួងការពារជាតិ។ ២.ស្រុកកំពង់រោទិ៍មានចំនួន១០ទីតាំង ទទួលខុសត្រូវចាក់វ៉ាក់សាំងដោយក្រុមគ្រូពេទ្យមន្ទីរសុខាភិបាល នៃរដ្ឋបាលខេត្ត និង៣.ស្រុករំដួលមានចំនួន៨ទីតាំង ទទួលខុសត្រូវចាក់វ៉ាក់សាំងដោយក្រុមគ្រូពេទ្យមន្ទីរសុខាភិបាល នៃរដ្ឋបាលខេត្ត។

លោកនាយឧត្តមសេនីយ៍ មាស សាវ៉ន អគ្គនាយក អគ្គនាយកដ្ឋានយោធសេវា ក្រសួងការពារជាតិមានប្រសាសន៍ថា នេះជាថ្ងៃទីមួយនៃការបើកយុទ្ធនាការនៃការចាក់វ៉ាក់សាំងជូនប្រជាពលរដ្ឋក្រុងបាវិត ដែលប្រព្រឹត្តទៅដោយមានការសហការជាមួយរដ្ឋបាលខេត្ត-ក្រុងព្រមទាំងអាជ្ញាធរពាក់ព័ន្ធ ដើម្បីផ្សព្វផ្សាយដល់ប្រជាពលរដ្ឋឲ្យមកចាក់វ៉ាក់សាំងតាមលំដាប់លំដោយរបស់ក្រុមគ្រូពេទ្យបានរៀបចំជូន។

លោក នាយឧត្តមសេនីយ៍ បានអំពាវនាវប្រជាពលរដ្ឋដែលមកទទួលការចាក់វ៉ាក់សាំង ត្រូវមកតាមការកំណត់របស់អាជ្ញាធរ ជៀសវាងមកប្រជ្រៀតគ្នាធ្វើឱ្យបាត់សណ្ដាប់ធ្នាប់ជាដើម។ ចំពោះប្រជាពលរដ្ឋដែលដល់វេនមកទទួលវ៉ាក់សាំង ត្រូវអញ្ជើញមកទទួលវ៉ាក់សាំងដូសទី១ ដោយយកឯកសារមកជាមួយមានដូចជា អត្តសញ្ញាណប័ណ្ណ សៀវភៅគ្រួសារ សំបុត្រកំណើត ឬឯកសារពាក់ព័ន្ធនានា ម្យ៉ាងទៀតក្រោយទទួលបានវ៉ាក់រួចត្រូវតែបន្តប្រកាន់ភ្ជាប់នូវវិធានការ”៣ការពារ ៣កុំ”របស់ប្រមុខរាជរដ្ឋាភិបាលឲ្យបានខ្ជាប់ខ្ជួន។

លោកបានបន្តថា ការគិតគូរដ៏ឈ្លាសវៃនិងប៉ិនប្រសព្វរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្តល់វ៉ាក់សាំង និងបានចាត់ឱ្យកងយោធពលខេមរភូមិន្ទចាក់វ៉ាក់សាំងជូនដល់ប្រជាពលរដ្ឋ កម្មករ ព្រះសង្ឃ ដែលមានអាយុចាប់ពី ១៨ឆ្នាំឡើងទៅនៅថ្ងៃនេះ និងជំហានបន្តបន្តបន្ទាប់ទៀតនៅពេលខាងមុខ ប្រជាពលរដ្ឋក្នុងខេត្តស្វាយរៀងទាំងមូល និងទទួលបានការចាក់វ៉ាក់សាំងគ្រប់ៗគ្នា ដើម្បីទប់ស្កាត់នៃការឆ្លងជំងឺកូវីដ-១៩ ព្រមទាំងធ្វើឱ្យស្ថានភាពសេដ្ឋកិច្ច វិលទៅរកភាពដើមវិញនាពេលខាងមុខ។

បន្ទាប់ពីចប់កម្មវិធីបើក និងសំណេះសំណាលជាមួយប្រជាពលរដ្ឋក្នុងយុទ្ធនាការចាក់វ៉ាក់សាំងនៅក្រុងបាវិត លោក ម៉ែន វិបុល អភិបាលខេត្ត បានអញ្ជើញដឹកនាំក្រុមការងារចុះពិនិត្យនៅតាមទីតាំងចាក់វ៉ាក់សាំងជូនប្រជាពលរដ្ឋក្នុងស្រុកកំពង់រោទិ៍ និងស្រុករំដួល ខេត្តស្វាយរៀង ផងដែរ៕

អត្ថបទ៖ គឹមសេង

សូមចុចអាន៖ ខេត្តព្រះសីហនុបានចាក់វ៉ាក់សាំងបង្ការជំងឺកូវីដ១៩ជូនដល់ពលរដ្ឋជាង១៧ម៉ឺននាក់ហើយ

Related Topics: