សម្ព័ន្ធគ្រូពេទ្យ ស.ស.យ.ក ចំនួន៨ក្រុម ចេញដំណើរទៅកាន់ខេត្តព្រះវិហារ ដើម្បីបើកយុទ្ធនាការចាក់វ៉ាក់សាំងជូន​ពលរដ្ឋ

សម្ព័ន្ធគ្រូពេទ្យសហភាពសហព័ន្ធយុវជនកម្ពុជា (ស.ស.យ.ក) ចំនួន៨ក្រុម នៅព្រឹកថ្ងៃទី១៦ ខែកក្កដា ឆ្នាំ​២០​២១​​នេះ បានបន្ដចេញដំណើរឆ្ពោះទៅកាន់ខេត្តព្រះវិហារ ដើម្បីបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋ នៅស្រុករវៀង និងស្រុកជាំក្សាន្ដ ខេត្តព្រះវិហារ។

ក្នុងឱកាសសំណេះសំណាល និងជូនដំណើរប្រធានតំបន់ ប្រធានក្រុម សមាជិក-សមាជិកា លោក លី ចាន់សុភក្ដី អនុប្រធាន សម្ព័ន្ធគ្រូពេទ្យសហភាពសហព័ន្ធយុវជនកម្ពុជា (ស.ស.យ.ក) បានយកនាំការផ្ដាំផ្ញើរសួរសុខទុក្ខ និងជូនពរពីសំណាក់ឯកឧត្តម ហ៊ុន ម៉ានី និងលោកជំទាវ យឹម ឆៃលីន ប្រធានកិត្តិយសសម្ព័ន្ធគ្រូពេទ្យ ស.ស.យ.ក និង លោកបណ្ឌិត ហេង សុខគង់ ប្រធានក្រុមប្រឹក្សាភិបាលសម្ព័ន្ធគ្រូពេទ្យ ស.ស.យ.ក ផងដែរ។

លោក លី ចាន់សុភក្ដី ក៏បានជូនពរសមាជិក-សមាជិកាសម្ព័ន្ធគ្រូពេទ្យ ស.ស.យ.ក ទាំងអស់ ធ្វើដំណើរដោយសុវត្តិភាព មានសុខភាពល្អបរិបូរ៍ និងជោគជ័យ ក្នុងបេសកម្មដ៏ត្រចះត្រចង់នេះ ដើម្បីប្រជាជន និងប្រទេសជាតិ ដោយរួមគ្នា ប្រយុទ្ធប្រឆាំងនឹងជំងឺកូវីដ-១៩ ទាំងអស់គ្នា៕ (ដោយ)៖ ឃួន សុភ័ក្រ