ព័ត៌មានជាតិ

ពលរដ្ឋកម្ពុជាលើអាយុ ១៨ ឆ្នាំ ជិត ៩០ % បានចាក់វាក់សាំងកូវីដ

បានផុស

៥ years មុន

នៅ

ថ្ងៃសៅរ៍ ២៨ សីហា ២០២១

ដោយ

គិតមកត្រឹមថ្ងៃ ២៧ សីហា ឆ្នាំ ២០២១ យុទ្ធនាការចាក់វ៉ាក់សាំងដល់ពលរដ្ឋលើអាយុ ១៨ ឆ្នាំសម្រេចបានជិត ៩០ ភាគរយ និងកុមារពីអាយុ ១២ ឆ្នាំដល់ក្រោម ១៨ ឆ្នាំបានជាង ៦៩%។

រដ្ឋាភិបាលបានដាក់ផែនការក្នុងការចាក់វ៉ាក់សាំងដល់ពលរដ្ឋអាយុ ១៨ ឆ្នាំឡើងឲ្យបាន ១០ លាននាក់ និងកុមារអាយុ ១២ ដល់ក្រោម ១៨ ឆ្នាំចំនួន ២ លាននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាផែនការយុទ្ធសាស្ត្រក្នុងការប្រយុទ្ធប្រឆាំងនឹងជំងឺកូវីដ-១៩ រដ្ឋាភិបាលកម្ពុជាបានប្រឹងប្រែងក្នុងការរកវ៉ាក់សាំងចាក់ជូនប្រជាពលរដ្ឋ តាមរយៈផែនការយុទ្ធសាស្ត្រ ដោយប្រើប្រាស់វ៉ាក់សាំងជំនួយពីប្រទេសចិន តាមរយៈយន្តការកូវ៉ាក់ ប្រទេសជាមិត្តមួយចំនួនទៀត រួមទាំងការបញ្ជាទិញផ្ទាល់ផងដែរ។

ត្រឹមពាក់កណ្តាលខែសីហា កម្ពុជាទទួលបានវ៉ាក់សាំងចំនួនជាង ២៦ លានដូស គ្រប់គ្រាន់សម្រាប់ការចាក់ជូនពលរដ្ឋ១០លាននាក់ និង ចាក់ឲ្យកុមារនិងយុវវ័យចំនួន ២លាននាក់ ដោយមិនមានការខ្វះវ៉ាក់សាំងនោះទេ ។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានបញ្ជាក់ថា ប្រទេសកម្ពុជានឹងទទួលបានវ៉ាក់សាំងទាំងការបញ្ជាទិញ វ៉ាក់សាំងអំណោយរបស់ប្រទេសជាមិត្ត តាមរយៈយន្តការកូវ៉ាក់ ត្រឹមពាក់កណ្តាលខែសីហាចំនួនជាង ២៦ លានដូស។

វ៉ាក់សាំងដែលកម្ពុជាទទួលបានរួចមកហើយនោះ រួមមានវ៉ាក់សាំងស៊ីណូហ្វាម (Sinopharm) ជាជំនួយរបស់រដ្ឋាភិបាលចិនចំនួន ២,២ លានដូស វ៉ាក់សាំងស៊ីណូហ្វាម ៤ លានដូសទិញពីក្រុមហ៊ុនស៊ីណូហ្វាម វ៉ាក់សាំងស៊ីណូវ៉ាក់(Sinovac) ទិញពីប្រទេសចិនចំនួន ១១,៥ លានដូស វ៉ាក់សាំងអាស្ត្រាហ្សេនីកា(Astra Zeneca)ជំនួយរបស់ខូវ៉ាក់ (Covax Facility) តាមអង្គការសុខភាពពិភពលោក (WHO) ចំនួន ៣២៤,០០០ដូស,វ៉ាក់សាំង Astra Zeneca ជំនួយរដ្ឋាភិបាលជប៉ុនតាមរយៈ Covax Facility ចំនួន ៣៣០,០០០ ដូស និងវ៉ាក់សាំង Johnson & Johnson របស់សហរដ្ឋអាមេរិកតាមរយៈ Covax Facility ចំនួន ៥០ ម៉ឺនដូស វ៉ាក់សាំង Astra Zeneca ជំនួយអង់គ្លេស ៤១ ម៉ឺនដូស៕

Related Topics: