អាជីវករផ្សារបានលុង អាជ្ញាធររៀបចំ​ផ្សារបណ្ដោះអាសន្នលក់​ដូរ

អភិបាលខេត្តរតនគិរី លោក ថង សវុន នៅព្រឹកថ្ងៃទី ៣ ខែកញ្ញា បានណែនាំដល់គណៈបញ្ជាការឯកភាពក្រុងបានលុងដឹកនាំដោយលោក ងិន ណែល អភិបាលក្រុងបានលុង ដែលមានការចូលរួមពីលោកចៅសង្កាត់ និងកងកម្លាំងជាច្រេីនទៀត។

ជាក់ស្ដែងនៅព្រឹកថ្ងៃទី៣ ខែកញ្ញា ឆ្នាំ២០២១នេះ អាជ្ញាធរក្រុងបានលុង​ បានរៀបចំឲ្យអាជីវករមកលក់ដូរ​សារ​ជាថ្មីឡេីងវិញ​ នូវគ្រឿងឧបភោគបរិភោគចាំបាច់នានា នៅបិរវេណមុខមន្ទីរវប្បធម៌ខេត្តរតនគិរី​​ ជាបណ្ដោះអាសន្ន បន្ទាប់ពីរកឃេីញករណីកូវីដ-១៩ ទៅលេីបងប្អូនអាជីវករលក់ដូរនៅផ្សារបានលុងជាច្រេីននាក់ កាលពីថ្ងៃទី១ ខែកញ្ញាកន្លងទៅនេះ។

ហេីយការរៀបចំឲ្យអាជីវករមកលក់ដូរនៅផ្សារជាបណ្ដោះអាសន្ន សារជាថ្មីឡេីងវិញ​ នៅបិរវេណមុខមន្ទីរវប្បធម៌ខេត្តរតនគិរី​​ នាពេលនេះ គឺចាប់ពីថ្ងៃទី៣ ខែកញ្ញា ឆ្នាំ២០២១នេះតទៅ រហូតដល់ស្ថានភាពប្រសើរឡើងវិញ។

លោក ងិន ណែល អភិបាលក្រុងបានលុងបានលើកឡើងថា ដោយសារការកើនឡើងច្រើន នៃការឆ្លងជំងឺកូវីដ-១៩ ក្នុងខេត្តរបស់យើង គណៈបញ្ជាការឯកភាពខេត្តបានបិទខ្ទប់ផ្សារបានលុង ដែលជាហេតុធ្វើឲ្យបងប្អូនប្រជាពលរដ្ឋ ពិបាកក្នុងការទិញគ្រឿងឧបភោគបរិភោគប្រចាំថ្ងៃ។

ដូច្នេះគណៈបញ្ជាការឯកភាពខេត្តក៏បានរៀបចំឲ្យ អាជីវករមកលក់ដូរនៅផ្សារបណ្ដោះអាសន្ន នៅបរិវេណមុខមន្ទីរវប្បធម៌ ដើម្បីបង្កើនជាភាពងាយស្រួលមួយកម្រិតដល់បងប្អូនប្រជាពលរដ្ឋ ក្នុងការទិញម្ហូបអាហារប្រចាំថ្ងៃ។ 

លោកអភិបាលក្រុងបានបន្ថែមទៀតថា ក្នុងការលក់ដូរនៅទីតាំងនេះ គឺមានការរក្សាគម្លាត ការអនុវត្តវិធានសុខាភិបាលបានត្រឹមត្រូវ ដែលបង្កជាភាពងាយស្រួល និងសុវត្ថិភាពដល់បងប្អូនប្រជាពលរដ្ឋដែល​មក​ទិញ។
លោកអភិបាលក្រុងក៏បានសំណូមពរឲ្យបងប្អូនប្រជាពលរដ្ឋទាំងអស់ អនុវត្តតាមវិធានការសុខាភិបាល ៣​ការពារ ៣កុំឲ្យបានខ្ជាប់ខ្ជួន រួមគ្នាពាក់ម៉ាស់ លាងដៃឲ្យបានញឹកញាប់ រក្សាគម្លាត និងត្រូវចូលរួមសហការទាំងអស់គ្នា ដើម្បីយើងអាចកាត់ផ្ដាច់ការចម្លងជំងឺនេះទាំងស្រុងបាន៕

អត្ថបទៈ វុទ្ធឦសាន