លោកយាយ អាយុ ១០២ ឆ្នាំនៅកោះកុង​ ស្ម័គ្រចិត្តចាក់វ៉ាក់សាំង​បង្ការជំងឺកូវីដ​​ផ្ដល់ដោយរាជរដ្ឋាភិបាល

លោកយាយព្រះជន្ម១០២ឆ្នាំ នៅខេត្តកោះកុង ដែលបានស្ម័គ្រចិត្តចាក់វ៉ាក់សាំងបង្ការជំងឺកូវីដ១៩ដែលផ្តល់ដោយប្រមុខរាជរដ្ឋាភិបាលកម្ពុជា តាមរយៈក្រុមគ្រូពេទ្យប្រចាំការ។

នេះជាលើកទី២ហើយដែលមានលោកយាយអាយុ១០២ឆ្នាំ រស់នៅក្នុងភូមិបឹងឃុនឆាង សង្កាត់ស្មាច់មាន​ជ័យ ក្រុងខេមរភូមិន្ទ ដោយលោកយាយ សុខ សារឿន ធ្វើដំណើរមកចាក់វ៉ាក់សាំងតាមការសុំអ្នកមានម៉ូតូជិះមកមណ្ឌលចាក់វ៉ាក់សាំងសាខាកាកបាទក្រហមខេត្ត កាលពីព្រឹកថ្ងៃទី៦ ខែកញ្ញា ឆ្នាំ២០២១នេះ។

បើតាមការលើកឡើងរបស់ក្រុមគ្រូពេទ្យប្រចាំការចាក់វ៉ាក់សាំងថ្លែងថា លោកយាយ សុខ សារឿន ជាអ្នករស់នៅកូនចៅដែលចាំចម្ការកៅស៊ូអោយគេនៅចំណុចផ្លូវបន្ទាយ២៩៧។

ការអញ្ជើញមកចាក់វ៉ាក់សាំងនេះដែរ គឺលោកយាយមិនមានអត្តសញ្ញាណបណ្ណសម្គាល់ខ្លួនជាពលរដ្ឋរស់នៅក្នុងមូលដ្ឋានទេ តែលោកយាយអះអាងថាលោកយាយមានអាយុ១០២ជិតចូល១០៣ឆ្នាំហើយ។

ក្រុមគ្រូពេទ្យ ក៏សុំការសម្របសម្រួលទៅកាន់អាជ្ញាធរភូមិ សង្កាត់ ដើម្បីធ្វើឯកសារសំគាល់ខ្លួនជូនលោក​យាយ ព្រមទាំងរបាយការណ៍ពាក់ព័ន្ធនានាទៅកាន់ក្រសួងសុខាភិបាលពីការស្ម័គ្រចិត្ត ក្រោយការចាក់វ៉ាក់សាំងលោកយាយមានអាការៈសុខភាពល្អប្រសើរ និងធ្វើដំណើរជាមួយចៅឌុបជូនទៅផ្ទះ។

បច្ចុប្បន្ន ក្រុមគ្រូពេទ្យដាក់វេនប្រចាំការចាក់វ៉ាក់សាំងជូនប្រជាពលរដ្ឋ និងកុមារដែលគ្រប់អាយុ១២ដល់​១៧​ឆ្នាំ គ្រាពួកគាត់ខកខានពុំបានចាក់តាមការកំណត់ ដោយសារតែមានបញ្ហាសុខភាព ឬជាប់ខ្លួនធ្វើ​ចត្តា​ឡីស័កនៅមណ្ឌល ក៏ដូចជានៅតាមខ្នងផ្ទះ៕