ព្យុះទីហ្វុង Bavi វាយប្រហារចិន និងតៃវ៉ាន់៖ មនុស្ស ៥លាននាក់ត្រូវបានជម្លៀសខ្លួន

ប្រទេសចិន កំពុងប្រឈមមុខនឹងគ្រោះមហន្តរាយធម្មជាតិដ៏ធ្ងន់ធ្ងរ បន្ទាប់ពីព្យុះទីហ្វុង Bavi ដែលជាព្យុះទី៩ នៃរដូវកាលនេះ បានបោកបក់ចូលតំបន់ឆ្នេរនៃខេត្តជឺជាំង (Zhejiang) កាលពីព្រឹកព្រលឹមថ្ងៃទី១២ ខែកក្កដា ដោយមានល្បឿនខ្យល់បោកបក់រហូតដល់ ១៤៤គីឡូម៉ែត្រក្នុងមួយម៉ោង បណ្តាលឱ្យមានការជម្លៀសប្រជាពលរដ្ឋប្រមាណ ៥លាននាក់នៅទូទាំងប្រទេសចិន ដើម្បីសុវត្ថិភាព ខណៈដែលនៅតៃវ៉ាន់វិញ ក៏មានសេចក្តីរាយការណ៍ថា មានមនុស្សជាង ២០០នាក់រងរបួសផងដែរ។ នេះ​បើយោងតាម​សារព័ត៌មាន Asia Today ចុះផ្សាយ​ថ្ងៃទី​១៣ ខែ​កក្កដា ឆ្នាំ​២០២៦។

ការបោកបក់នៃព្យុះ Bavi បានបង្កផលប៉ះពាល់យ៉ាងខ្លាំងដល់ជីវភាពរស់នៅរបស់ប្រជាជនចិន។ នៅរដ្ឋធានីប៉េកាំង មនុស្សជាង ១០០ ០០០នាក់ត្រូវបានជម្លៀសចេញពីលំនៅឋាន ដោយសារតែមានភ្លៀងធ្លាក់ខ្លាំងខុសពីធម្មតា។ ក្នុងខេត្តហ្វូជៀន (Fujian) មានប្រជាជន ១៣០ ០០០នាក់ ត្រូវជម្លៀស និងនៅទីក្រុងសៀងហៃ មាន​ចំនួន ៤០ ០០០នាក់។ គិតត្រឹមថ្ងៃទី១២ កក្កដា ជើងហោះហើរជាតិ និងអន្តរជាតិជាង ៣ ០០០ ត្រូវបានលុបចោល ហើយបណ្តាញផ្លូវដែកល្បឿនលឿនក្នុងតំបន់ភាគអាគ្នេយ៍ ក៏ត្រូវបានផ្អាកដំណើរការជាបណ្តោះអាសន្នផងដែរ ដើម្បីការពារសុវត្ថិភាពអ្នកដំណើរ។

គួររំលឹកផងដែរថា មុនពេលព្យុះទីហ្វុងនេះកើតឡើង តំបន់ភាគខាងត្បូងនៃប្រទេសចិន បានជួបប្រទះគ្រោះទឹកជំនន់ និងការរអិលបាក់ដីរួចទៅហើយ ដែលបណ្តាលឱ្យមនុស្សយ៉ាងហោចណាស់ ៤០នាក់បានបាត់បង់ជីវិត។ ចំពោះព្យុះ Bavi នេះ ទោះបីជាគ្មានសេចក្តីរាយការណ៍អំពីអ្នកស្លាប់ក៏ដោយ ប៉ុន្តែវាបានបង្កការខូចខាតទ្រព្យសម្បត្តិយ៉ាងច្រើន រួមទាំងការលិចលង់ដីកសិកម្ម និងការជន់លិចផ្លូវថ្នល់។

សម្រាប់កោះ​តៃវ៉ាន់ ទោះបីស្ថិតក្នុងរង្វង់នៃការប៉ះពាល់ដោយព្យុះក៏ដោយ ក៏គេមិនទាន់ទទួលបានសេចក្តីរាយការណ៍អំពីករណីបាត់បង់ជីវិតនៅឡើយទេ។ គិតត្រឹមល្ងាចថ្ងៃទី១២ កក្កដា មនុស្សជាង ២០០នាក់បានរងរបួស រួមទាំងជនជាតិបរទេសចំនួន ៥នាក់។

ថ្វីដ្បិត​ព្យុះ Bavi ត្រូវបានព្យាករថានឹងថមថយឥទ្ធិពលបន្តិចម្តងៗនៅពេលវាបន្តដំណើរទៅទិសពាយ័ព្យ ក៏អាជ្ញាធរឧតុនិយមបានព្រមានថា ភ្លៀងធ្លាក់ខ្លាំងនឹងបន្តកើតមានរហូតដល់ថ្ងៃទី១៥ ខែកក្កដា។ ជាពិសេសរដ្ឋធានីប៉េកាំង កំពុងតែត្រៀមខ្លួនទប់ទល់នឹងហានិភ័យនៃទឹកជំនន់បន្ថែមទៀត។ អាជ្ញាធរគ្រប់លំដាប់ថ្នាក់នៅតែបន្តការងារជួយសង្គ្រោះ និងត្រួតពិនិត្យស្ថានការណ៍យ៉ាងយកចិត្តទុកដាក់ ដើម្បីធានាបាននូវសុវត្ថិភាពរបស់ប្រជាពលរដ្ឋ៕

ប្រែសម្រួល៖ ឈាង