អាជ្ញាធរខណ្ឌទួលគោក ចុះពិនិត្យទីតាំងសង្ស័យចំនួន៩ រកឃើញជនបរទេស១១នាក់ តែពុំមានបទល្មើស Online Scamទេ

គណៈបញ្ជាការឯកភាពខណ្ឌទួលគោក នៅថ្ងៃទី១២ ខែកក្កដា ឆ្នាំ២០២៦នេះ បានចុះរដ្ឋបាល និងស្រង់ស្ថិតិជនបរទេសនៅតាមបុរី សណ្ឋាគារ ខុនដូ អាផាតមិន ការដ្ឋានសំណង់ អគារស្នាក់នៅរួម ផ្ទះសំណាក់ និងផ្ទះជួលបាន ចំនួន៩ទីតាំង ក្នុងនោះមានជនបរទេសស្នាក់នៅសរុបចំនួន១១នាក់ ប៉ុន្តែពុំមានបទល្មើសOnline Scam កើតឡើងឡើយ។

តាមរបាយការណ៍របស់រដ្ឋបាលខណ្ឌទួលគោក នៅថ្ងៃទី១២ ខែកក្កដា ឆ្នាំ២០២៦នេះ បានឱ្យដឹងថាអនុវត្តតាមអនុក្រឹត្យលេខ០៣ អនក្រ.បក ចុះថ្ងៃទី០៥ ខែមករា ឆ្នាំ២០២៦ និងបទញ្ជាលេខ០១ បប ចុះថ្ងៃទី១៤ ខែកក្កដា ឆ្នាំ២០២៥ របស់រាជរដ្ឋាភិបាល និងក្រោមការដឹកនាំរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ នៅថ្ងៃទី១២ ខែកក្កដា ឆ្នាំ២០២៦ លោក ជា ពិសី អភិបាល នៃគណៈអភិបាលខណ្ឌ និងជាប្រធានគណៈបញ្ជាការឯកភាពរដ្ឋបាលខណ្ឌទួលគោក បានដឹកនាំ និងប្រគល់ភារកិច្ចជូនគណៈអភិបាលខណ្ឌ ដឹកនាំកម្លាំងចុះរដ្ឋបាល និងស្រង់ស្ថិតិជនបរទេសនៅតាមបុរី សណ្ឋាគារ ខុនដូ អាផាតមិន ការដ្ឋានសំណង់ អគារស្នាក់នៅរួម ផ្ទះសំណាក់ និងផ្ទះជួល នៅតាមសង្កាត់ទាំង១០ បានចំនួន ៩ទីតាំង ក្នុងនោះមានជនបរទេសស្នាក់នៅសរុបចំនួន១១នាក់ (ស្រីចំនួន ៥នាក់) និងចំនួន ៥សញ្ជាតិ មានលិខិតឆ្លងដែន និងទិដ្ឋការត្រឹមត្រូវ ពុំមានបទល្មើស Online Scam កើតឡើងឡើយ៕

អត្ថបទ៖ ស្រីរ័ត្ន