ឆ្នាំ​២០២១ គម្រោង​សំណង់​​​តម្លៃ ៤ ៨៧៦ លានដុល្លារ ផ្តល់​ការ​អនុញ្ញាតិ​ឲ្យ​សាងសង់

ក្នុងរយៈពេល១០ ខែឆ្នាំ ២០២១ ក្រសួងរៀបចំដែនដី នគរូបនីយកម្មនិងសំណង់និងរដ្ឋបាលរាជធានី-ខេត្ត បានផ្តល់លិខិតអនុញ្ញាតសាងសង់ចំនួន ៣,៥៩៨ គម្រោង មានផ្ទៃក្រឡាសំណង់ជិត ១២ លានម៉ែត្រការ៉េនិងមានតម្លៃប៉ាន់ស្មានទុនវិនិយោគប្រមាណជាង ៤,៨៧៦ លានដុល្លារអាមេរិក។ នេះបើយោងតាមការឲ្យដឹងរបស់មន្រ្តីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់នៅថ្ងៃទី ១៥ ខែ វិច្ឆិកា ២០២១ នេះ។

លោក ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់ បានបា្រប់សារព័ត៌មានឲ្យដឹងនៅថ្ងៃទី១៥ខែវិច្ឆិកាឆ្នាំ២០២១នេះថា ក្នុងរយៈពេល ១០ខែឆ្នាំ២០២១ ក្រសួងរៀបចំដែនដីនគរូបនីយកម្ម និងសំណង់ និងរដ្ឋបាលរាជធានី-ខេត្ត បានផ្តល់លិខិតអនុញ្ញាតសាងសង់ចំនួន ៣ ៥៩៨ គម្រោង មានផ្ទៃក្រឡា សំណង់ជិត១២ លាន​ម៉ែត្រ​ការ៉េ និងមានតម្លៃប៉ាន់ស្មានទុនវិនិយោគប្រមាណ ៤ ៨៧៦ ៨០៤ ៨៩៩ដុល្លារ។ ការវិនិយោគគម្រោងភាគច្រើនជាប្រភេទសំណង់លំនៅឋាន អគារស្នាក់នៅរួម អគារពហុមុខងារ ឧស្សាហកម្ម ពាណិជ្ជកម្ម ទេសចរណ៍ និង សំណង់អគារផ្សេងៗទៀត។

ក្រសួងរៀបចំដែនដី នគរូបនីយកម្ម និងសំណង់ ក៏បានចុះបញ្ជីនិងផ្តល់អាជ្ញាបណ្ណប្រកបអាជីវកម្មដល់សហគ្រាសក្រុមហ៊ុនសិក្សា គម្រោងប្លង់ និងសាងសង់បានចំនួន ២៨៥ ក្រុមហ៊ុនក្នុងនោះក្រុមហ៊ុនសិក្សាគម្រោងប្លង់មានចំនួន ១៤ និងក្រុមហ៊ុនសាងសង់មានចំនួន ២៧១ និងបានចុះបញ្ជីដល់រូបវន្តបុគ្គល សិក្សាគម្រោងប្លង់បានចំនួន ៨៧ រូបក្នុងនោះស្ថាបត្យករចំនួន ២៧ រូប និងវិស្វករចំនួន ៦០ រូប។

លោក ឡៅ ទិព្វសីហា បានថ្លែងថា វិស័យសំណង់ត្រូវបានព្យាករណ៍ថានឹងងើបឡើងវិញនៅឆ្នាំខាងមុខនេះ ដោយការរំពឹងទុកនូវការវិលត្រឡប់មកវិញនូវរំហូរទុនវិនិយោគពីបរទេស និងការងើបឡើងវិញនូវតម្រូវការក្នុងស្រុក ស្របពេលដែលរាជរដ្ឋាភិបាលបានបើកសេដ្ឋកិច្ចឡើងវិញ និងមិនតម្រូវឱ្យអ្នកចេញចូលកម្ពុជាធ្វើចត្តាឡីស័ក្កនោះទេសម្រាប់អ្នកដែលបានចាក់វ៉ាក់សាំងពេញលេញរួចរាល់៕

អត្ថបទ៖ ណារី