ក្រសួង​សាធារណការ​កំពុង​សិក្សា​គម្រោង​ជីកព្រែក​ជាង​៧គីឡូម៉ែត្រ​ភ្ជាប់​ទៅ​កំពង់ផែ​សមុទ្រ

ក្រសួងសាធារណការ និងដឹកជញ្ជូន​កំពុងធ្វើការសិក្សា​លើគម្រោងជីកព្រែកជាង៧គីឡូម៉ែត្រ​ភ្ជាប់​ទៅ​កំពង់ផែសមុទ្រកែប ដើម្បីបើកការដឹក​ជញ្ជូន​តាមផ្លូវទឹកពីដងទន្លេនា​នាទៅកាន់​កំពង់ផែសមុទ្រ​ឲ្យអស់លទ្ធភាព ខណៈដែលកម្ពុជាមានសក្ដានុពលផ្លូវទឹកជាច្រើន ដែលមិនទាន់​បានប្រើ​ប្រាស់​អស់។

លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណ​ការ និង​ដឹកជញ្ជូន មានប្រសាសន៍ថា៖ “យើងចង់បានការដឹកជញ្ជូនតាមផ្លូវទឹកឲ្យបានច្រើន និង​សម្បូរបែបដែលការដឹកជញ្ជូនផ្លូវទឹកនេះនឹងកាត់បន្ថយការស្ទះចរាចរ,កាត់បន្ថយការខូចផ្លូវ ចំណេញ​ពេលវេលា និងចំងាយផ្លូវ ចំណេញថវិកា”។

លោក ទេសរដ្ឋមន្ត្រីបញ្ជាក់ថា កម្ពុជាមានលទ្ធភាពប្រើប្រាស់ទឹកទន្លេមេគង្គទាំងការដឹកជញ្ជូន និងការប្រើប្រាស់ ក៏ដូចជាការស្រោចស្រពផលដំណាំផងដែរ។ ហើយថា មានកំពង់ផែរណបចំនួន៧កន្លែងរួមមាន៖ កំពង់ផែរណបពហុបំណង​(TS11) កោះរកា ​ព្រែកតាម៉ាក់​ កំពង់ឆ្នាំង​ឆ្លូង ទន្លេបិទ និងចំណតផែកុងតឺន័រ(LM17)។

តាមការសិក្សាជំហ៊ានដំបូងរបស់ក្រសួងសាធារណការ​ និងដឹកជញ្ជូន គ្រោងនឹងជីកព្រែកថ្មី​មួយ​ខ្សែប្រវែងពី៦ ទៅ៧គីឡូ​ម៉ែត្រ​ទៅកាន់កំពង់ផែកែប លើប្រវែងសរុប១៦៨គីឡូម៉ែត្រពីព្រែក អំបិល​ទៅកែប។

លោកសៅ សាវ័ន្ត នាយកក្រុមហ៊ុន(PTLS)បានឲ្យដឹងថា៖ កំពង់ផែនេះ ជាចរន្តដឹកជញ្ជូន​ទំនិញយ៉ាង​សំខាន់ ក្នុងការប្រមូលនិងការដឹកជញ្ជូនទំនិញក្នុងនិងក្រៅស្រុក ព្រោះកំពង់ផែនេះជាចំណុច​បេះដូង​នៃប្រទេស។
កំពង់ផែនេះស្ថាបនាបានប្រមាណ៨០%ហើយដោយគ្រោងនិងបើកសម្ពោធដាក់ឲ្យ​ប្រើប្រាស់​ជាផ្លូវការ​នៅដើមខែកក្កដា ឆ្នាំ២០២២ខាងមុខនេះ៕

អត្ថបទ៖ ស្រីរ័ត្ន