សាច់ និងស្បែកក្រពើគ្មានទីផ្សារ តែខ្លាញ់ក្រពើ​មានតម្រូវការខ្ពស់

សព្វថ្ងៃសាច់ និងស្បែកក្រពើគ្មានតម្រូវការទីផ្សារនោះទេ នៅកម្ពុជា។ ប៉ុន្តែខ្លាញ់ក្រពើមានតម្រូវខ្ពស់ទៅវិញ។ នេះបើតាមការលើកឡើងរបស់លោក ញ៉ែម បូរាណ ម្ចាស់កសិដ្ឋានចិញ្ចឹមក្រពើនៅខេត្តសៀមរាប។

ម្ចាស់កសិដ្ឋានចិញ្ចឹមក្រពើចំនួន ៣០០ក្បាល រូបនេះបានលើកឡើងថា បច្ចុប្បន្នទីផ្សារសាច់ និងស្បែកក្រពើ ពុំមានតម្រូវការនោះទេ ប៉ុន្តែបែរជាមានតម្រូវខ្លាញ់របស់ក្រពើទៅវិញ។ មានតម្រូវការដោយសារតែខ្វះការផ្គត់ផ្គង់។ ខ្វះការផ្គត់ផ្គង់ ក៏ដោយសារតែពុំមានតម្រូវការសាច់ និងស្បែក ដូច្នេះម្ចាស់ក្រពើមិនអាចសម្លាប់ក្រពើយកតែខ្លាញ់ ហើយចោលសាច់ និងស្បែកបាននោះទេ។

ដោយសារតែខ្វះទីផ្សារសាច់ និងស្បែកក្រពើ សព្វថ្ងៃនេះ លោក ញ៉ែម បូរាណ ក៏បានកែច្នៃខ្លាញ់ក្រពើធ្វើជាឱសថព្យាបាលអាការៈមួយចំនួនផងដែរ។ បើតាមលោក បូរាណ ខ្លាញ់ប្រពើមានសមត្ថភាពអាចព្យាបាលដូចជា ស្លាកស្នាម កើតបរមាស់ ដំបៅ សង្វា ឃ្លង់ល្ពៅ និងអាលេកហ្ស៊ីស្បែកជាដើម។ លោកថា ខ្លាញ់ក្រពើមានប្រសិទ្ធភាពខ្ពស់ក្នុងការព្យាបាលជំងឺទាំងអស់នេះ។

បច្ចុប្បន្នលោក ញ៉ែម បូរាណ ងាកមកកែច្នៃខ្លាញ់ក្រពើលក់ជាឱសថ ជំនួសឱ្យការលក់ក្រពើទាំងមូល។ លោក បូរាណ បញ្ជាក់ថា សព្វថ្ងៃកូនក្រពើលក់បានមួយតម្លៃ ២ពាន់រៀលប៉ុណ្ណោះ ពោលគឺខុសពីមុនតម្លៃជាង ១០ដុល្លារក្នុងមួយក្បាល។ ចំណែកក្រពើមេធ្វើពូជទិញចូលពីបរទេសតម្លៃមួយក្បាលចន្លោះពី ៧០០ដុល្លារទៅជាង ១ពាក់ដុល្លារ តែបច្ចុប្បន្នលក់វិញតម្លៃ ៣០-៤០ដុល្លារ ប៉ុណ្ណោះ។