EU ឈានដល់កិច្ចព្រមព្រៀងសម្រុះសម្រួល លើការហាមឃាត់ប្រេង រុស្ស៊ី (មានវីដេអូ)

មេដឹកនាំសហភាពអឺរ៉ុប (EU) បានយល់ព្រមគ្នាលើផែនការសម្រុះសម្រួលមួយ ដើម្បីទប់ស្កាត់ការនាំចូលប្រេងពីរុស្ស៊ីជាងពីរភាគបី បន្ទាប់ពីប្រទេសហុងគ្រី ប្រឆាំងនឹងការហាមឃាត់ទាំងស្រុង។

ប្រធានក្រុមប្រឹក្សាអឺរ៉ុប លោក Charles Michel និយាយថា កិច្ចព្រមព្រៀងនេះ បានកាត់ផ្តាច់ ប្រភពហិរញ្ញប្បទានដ៏ធំ សម្រាប់កម្លាំងធ្វើសង្គ្រាម របស់រុស្ស៊ី។ លោក​បន្ថែម​ថា បម្រាមនេះ បាន​ដាក់​សម្ពាធ​ជា​អតិបរមា​លើ​រុស្ស៊ី​ដើម្បី​បញ្ចប់​សង្រ្គាម។

ការហាមឃាត់នេះ គឺជាផ្នែកមួយនៃកញ្ចប់ទណ្ឌកម្មទីប្រាំមួយ ដែលត្រូវបានអនុម័តដោយរដ្ឋជាសមាជិកទាំង ២៧ នៅក្នុងកិច្ចប្រជុំកំពូលនាទីក្រុង ព្រុចសែល នៃប្រទេស បែលហ្ស៊ិក។

លោក Michel បន្តថា EU ក៏បានយល់ព្រមលើវិធានការ ដែលផ្តោតលើធនាគារធំបំផុតរបស់រុស្ស៊ី និងទូរទស្សន៍រដ្ឋចំនួនបីផងដែរ។

សមាជិក EU បានចំណាយពេលជាច្រើនម៉ោង ដើម្បីដោះស្រាយការខ្វែងគំនិតគ្នាជាមួយប្រទេសហុងគ្រី ជុំវិញបម្រាមនាំចូលប្រេងពីរុស្ស៊ី។

បម្រាមនាំចូលប្រេងពីរុស្ស៊ី ត្រូវបានស្នើឡើងជាដំបូងដោយគណៈកម្មការអឺរ៉ុប ប៉ុន្តែការតស៊ូ ជាពិសេសពីសំណាក់ប្រទេសហុងគ្រី បានក្លាយជាបញ្ហាចុងក្រោយបង្អស់របស់ EU។

ស្របពេលជាមួយគ្នានោះ ប្រទេសដែលជាប់ព្រំដែនគោកផ្សេងទៀត ដូចជា ស្លូវ៉ាគី និងសាធារណរដ្ឋឆែក ក៏បានស្នើសុំពេលវេលាបន្ថែមទៀតផងដែរ ដោយសារតែការពឹងផ្អែកលើប្រេងរបស់រុស្ស៊ី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ រុស្ស៊ី ប្រើអាវុធពិសេសនៅទីក្រុង Kharkiv របស់ អ៊ុយក្រែន