ជីវិតកម្សាន្ដ

វិថីសិល្បៈរយៈពេល ៦ខែនៃការគ្រងមកុដ MGI របស់បវរកញ្ញា Thuy Tien

បានផុស

៤ years មុន

នៅ

ថ្ងៃចន្ទ ៦ មិថុនា ២០២២

ដោយ

Sonya

Nguyen Thuc Thuy Tien ជាបវរកញ្ញាដំបូង ដែលនាំប្រទេសវៀតណាម មានឈ្មោះល្បីល្បាញកាន់ខ្លាំងទៅកាន់ពិភពលោក ក្រោយពេលនាងបានគ្រងមកុដ Miss Grand International 2021 ហើយមកដល់នឹងពេលនេះ នាងគ្រងតំណែងបាន ៦ខែហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីរាត្រីថ្ងៃទី៤ ខែវិច្ឆិកា ឆ្នាំ២០២១ បវរកញ្ញា Nguyen Thuc Thuy Tien បានធ្វើឱ្យស្ថាប័នសម្រស់ និងទស្សនិកជនក្នុងស្រុកមួយចំនួនធំផ្ទុះនូវអារម្មណ៍រំភើប បន្ទាប់ពីនាងក្លាយជាម្ចាស់ជយលាភីឯក Miss Grand International ដោយជោគជ័យ។ ចាប់តាំងពីពេលនោះមក Thuy Tien ទទួលបានប្រជាប្រិយភាពខ្លាំងឡើងៗ និងទទួលបានការចាប់អារម្មណ៍ ក៏ដូចជាការគាំទ្រយ៉ាងច្រើនពីសំណាក់មហាជន។

បើក្រឡេកទៅមើលដំណើររយៈពេល ៦ខែមកនេះ ចាប់តាំងពី Thuy Tien គ្រងតំណែង បវរកញ្ញារូបនេះបានបំពេញតួនាទីបានយ៉ាងល្អក្នុងអាណត្តិរបស់ខ្លួន។ ជាមួយនឹងប្រជាប្រិយភាព ក្នុងនាមជាម្ចាស់ក្សត្រីនៃ MGI នាងទទួលការងារទាំងក្នុងទាំងក្រៅ សឹងគ្មានពេលសម្រាក។ នាងអាចឆក់បានការាងារដើរបង្ហាញម៉ូដជាច្រើន ផ្សព្វផ្សាយឱ្យម៉ាកយីហោតូចធំ ព្រមទាំងទាក់ទាញអ្នកសារព័ត៌មានយ៉ាងខ្លាំងផងដែរ។

ថ្វីត្បិតថ្មីៗនេះ នៅក្នុងការដើរម៉ូដក្នុងកម្មវិធីបង្ហាញម៉ូដ Vietnam Fashion Week បវរកញ្ញា Thuy Tien បានសាងកំហុសឆ្គងដោយដើរដួលលើឆាកយ៉ាងណាក្ដី ប៉ុន្តែនាងបានបន្សល់ទុកនូវការចាប់អារម្មណ៍យ៉ាងខ្លាំងដល់ទស្សនិកជន ដោយសារអាកប្បកិរិយាប្រកបដោយអាជីពរបស់នាង។

ក្រៅវិស័យម៉ូដ បវរកញ្ញាវ័យ ២៣ឆ្នាំរូបនេះ ក៏មានឱកាសក្នុងការសាកល្បងធ្វើជាវាគ្មិនស្តីពី Star Finding Your Own Crown នៅវេទិកា TED ផងដែរ។ មិនតែប៉ុណ្ណោះ បច្ចុប្បន្ននេះ Thuy Tien បន្តចូលរៀននៅសកលវិទ្យាល័យក្នុងស្រុក និងចូលរួមវេទិកាជជែកពិភាក្សាចែករំលែករឿងរ៉ាវលើកទឹកចិត្តដល់សិស្ស-និស្សិតទៀតផង។ ក្រៅពីនោះ នាងបានជាប់ឈ្មោះជាកំពូលនារីវ័យក្មេងទាំង ១០ របស់វៀតណាម ប្រចាំឆ្នាំ ២០២១។

មិនត្រឹមតែបំពេញតួនាទីនៅក្នុងប្រទេសដោយជោគជ័យប៉ុណ្ណោះទេ Thuy Tien បានចូលរួមសកម្មភាពមិនតិចឡើយទាំងនៅប្រទេសថៃ និងប្រទេសមួយចំនួនទៀតនៅលើពិភពលោក។ ដោយសារសមត្ថភាព រូបសម្រស់ និងការបង្ហាញពីភាពវៃឆ្លាតរបស់នាង នាងទទួលបានការចាប់អារម្មណ៍ពីទស្សនិកជន ក៏ដូចជាប្រព័ន្ធផ្សព្វផ្សាយ មិនធម្មតាឡើយ។

ដោយឡែក សកម្មភាពស្ម័គ្រចិត្ត ក្នុងឋានៈជាបវរកញ្ញាអន្តរជាតិមួយរូប Thuy Tien ក៏បានរួមចំណែកយ៉ាងសស្រាក់សស្រាំផងដែរ។ ពេលចេញទៅសម្តែងនៅស្រុកកំណើត នាងបង្ហាញវត្តមាននៅតាមបណ្តាខេត្ត-ក្រុងជាច្រើន ដើម្បីចូលរួមលើកស្ទួយសហគមន៍ និងផ្ដល់ការគាំទ្រដល់កុមារ ក៏ដូចជាប្រជាជនដែលជួបស្ថានភាពរស់នៅលំបាក។

ទន្ទឹមនឹងកេរ្តិ៍ឈ្មោះរន្ទឺ នាងធ្លាប់រងព្យុះភ្លៀងរឿងអាស្រូវយ៉ាងខ្លាំងផងដែរ។ កាលពីពេលទើបគ្រងមកុដក្ដៅៗ នាងរងនូវពាក្យចចាមអារ៉ាមជុំវិញការហែកក្រដាសបំណុល ហើយរឿងនោះត្រូវបានសាមីខ្លួនសារភាពថាជារឿងពិត។ ទោះយ៉ាងណា អ្នកគាំទ្រមិនបានប្រកាន់ទោសពៃរ៍នឹងនាងឡើយ ក្រោយពេល Thuy Tien ចេញមុខសុំទោសជាសាធារណៈ កាលពីពេលថ្មីៗកន្លងទៅនេះ។

បន្ទាប់ពីបាន ៦ខែ ជាបវរកញ្ញាអន្តរជាតិ បវរកញ្ញា Nguyen Thuc Thuy Tien បានបង្ហាញទស្សនិកជនទាំងក្នុង និងក្រៅប្រទេសពីការខិតខំប្រឹងប្រែង និងការរៀនសូត្រឥតឈប់ឈររបស់នាង ដើម្បីធ្វើខ្លួនឱ្យសក្តិសមនឹងមកុដដែលខ្លួនកំពុងគ្រង ហើយបច្ចុប្បន្ននាងកំពុងមានប្រជាប្រិយភាពលើការផ្សាយម៉ាកយីហោនានាមិនថានៅក្នុងស្រុក និងអន្តរជាតិ។

បើយោងតាមរបាយការណ៍ កាលពី៣ខែមុន បន្ទាប់ពីគ្រងមកុដ Miss Grand International ឆ្នាំ២០២១ បវរកញ្ញា Thuy Tien អាចរកចំណូលចូលហោប៉ៅផ្ទាល់ខ្លួនរហូតដល់ជាង ៣លានដុល្លារអាមេរិកឯណោះ ខណៈបច្ចុប្បន្នមិនទាន់មានសារព័ត៌មានណាទម្លាយចំណូលជាក់ស្ដែងរបស់នាងនៅឡើយ៕